6 Neu faik fo Er ina-huu so, Yahuda neu natane feen ana ina anak esa, nade Tamar. Basa de dua sala sao. 7 Tehuu Er manggalaun ana seli. Huu ndia de Manetualain huku nisan. De Er mate ta ela anak.

8 Basa boe ma Yahuda nadenu ana kaduan nae, “Onan! O ka'am maten so, tehuu anan taa. De hatematak ia, tungga hataholi lasik kala hadan, na, o musi nggati ka'am fo sao mala saon, fo suek o fee ka'am numbu-saduk.”

9 Onan bubuluk hadak ndia so. Tehuu ana ta nau fee ka'an Er numbu-saduk. De mete ma ana sunggu no Tamar, na, nakalalambu heni ndia binin, fo suek Tamar boso bonggi. 10 Onan tataon leo ndiak, tao nala Manetualain luli nalan seli. Huu ndia de Manetualain huku nisan boe.

11 Neu faik fo Yahuda nita ana kaduan nala sao lala Tamar mate sala so, boe ma ana bii. Ana dudu'a nae, boso losak ndia ana mulin Sela sao nala Tamar bali, dei fo maten boe. Huu ndia de ana neu nafada feto-feun Tamar nae, “Ana, ei. Malolenak o fali muni o ina-amam muu leo. Dei fo au anang Sela ina-huu so, na, bei fo o fali mai, fo sao ndia.” Boe ma Tamar fali.

12 Ta dook boe ma mate Yahuda saon. De ana dale hedi losa basa fai fafaluk.^a Boe ma ana noke nonoon Hira, fo dua sala leni nggolo Timna leu. Nai ndia, hataholi la sama-sama nggute bi'i-lombo bulun, fo se'o.

13 Boe ma hataholi lafada Tamar lae, “O ali-amam neni Timna neu, fo heti hataholi suek nggute ndia bi'i-lombon nala bulun.”

14 Faik ndia, Yahuda ana mulin Sela ina-huuk so. Tehuu Tamar bubuluk so nae, ali-aman ta nau ana sao Sela. Boe ma Tamar sangga dalak fo noke ndia haak. De ana odu heni balo'a ina-falun, basa de nggati pake balo'a malole. Ana pake lafa anak fo lalaa langgan ma matan. Boe ma ana nanggatuuk neu nggolo Enaim lelesu inan, nandaa no dalak neni Timna neu. 15 Ledo-eik Yahuda nesik lelesu ina ndia, ana nita inak esa. Nae hetuk ina kalabik ndia, huu Tamar heo-hilu no balo'as, ma babaa matan bali. 16 Yahuda ta dudu'a nae, inak ndia, ndia feto-feun. De neu deka-deka no inak ndia, boe ma natanen nae, “Wei! Mete ma au ua o, na, o moke ba'u bee?”

Tamar nataa nae, “Neu! Neme kada ama hihiin mai.”

17 Yahuda kokoe nae, “Leo bee, mete ma au fee o bi'i-aek esa?”

Boe ma Tamar bala nae, “Malole, ama. Sadi ama fee au to'u bua namahehelek esa dei. Losa sudi faik bee, bei fo ama haitua bi'i-aek ndia mai.”

18-19 Boe ma Yahuda natane bali nae, “Au fee o bua namahehelek hata?”

Tamar nataa nae, “Ama ela cap fo mana londak, no talin manai ama lesuha'in. Ma ela tete'e-aik ndia boe.” Yahuda namanene leo ndiak, boe ma ana fee buas sala sila neu ndia.

Boe ma dua sala leu sunggu sama-sama. Basa boe ma Tamar fali. Ana odu heni balo'a malolen ma ndia lafa anan, fo pake seluk ndia balo'a ina-falun. Ta bubuluk te Tamar nailu so.

20 Ta dook boe ma Yahuda noke tulun nonoon Hira nae, “O muni bi'i-aek ia fee ina kalabik ndia, nai Enaim ele, fo ha'i falik au bua nggala fo ana to'uk ndia.” Hira losa ele, natane neu-mai, tehuu ta natonggo no inak ndia. 21 Boe ma ana natane hataholi malai ndia nae, “Wei! Ei mita ina kalabik fo mana nateme nanggatuuk nai lelesu ina ia, do? Nai bee bae?”

Tehuu lataa lae, “Ama, ina kalabik ta nai ia.”

22 De Hira fali neni Yahuda neu. Ana nafada nae, “Au ta atonggo ua inak ndia. Au asanggak, tehuu hataholi malai ele lafada lae, nai mamanak ndia, ta hambu ina kalabik.”

23 Yahuda nataa nae, “Ela bua sala sila, fo ana soan leo! Sadi hataholi boso lakamamaek ita! Huu au nau bae so, tehuu ita ta tatonggo to ndia.”

24 Seli bulak telu, boe ma hataholi neu nafada Yahuda nae, “O feto-feum Tamar tao aon dadik ina kalabik so. Hatematak ia, nailu.”

Yahuda namanene leo ndiak, boe ma ana luli nalan seli. De ana palenda hataholi ndia nae, “Muu hela mua inak ndia mai, fo hotu kanalaok kana!”

25 Boe ma ala leu hela lo Tamar mai. Tehuu ana kalua heni cap no tete'e-aik. De nadenu sala leu lafada ndia ali-aman lae, “Ama, tulun palisak buas sala ia dei. Hataholi maena cap ma tete'e-aik ia, ndia tao nailu au.”

26 Yahuda nita buas sala sila, boe ma nalelak tutik kana, te ndia enan. Boe ma nafada nae, “Memak! Inak ndia ta sala. Au ndia sala. Ndia tetebes. Tungga hadak, na, au musi akasasaok kana no au anang Sela. Tehuu au ndia ta nau. Mbo'i henin leo!” Basa boe ma Yahuda ta nakabubua no Tamar bali.

27 Tamar fain sangga bonggi losa so, boe ma ana bonggi kakana kaduak. 28 Neu faik fo ana bonggi, kakanak esa liman nakahuluk. Boe ma ina makabobonggik mba'a aba mbilas neu liman. Ana nae, “Ia ndia uluk.” 29 Tehuu kakanak ndia hela falik liman. Boe ma nonoo kaduan kalua nakahuluk. Ina makabobonggik nafada kakanak ndia nae, “Wei! O ia memak balakaik! Huu ndia de o makaseseti makahuluk deak mai.” De ala foi kakanak ndia, nade Peres (ndandaan nae, ‘nakaseseti deak mai’). 30 Basa, bei fo fadik nana mba'a aba mbilas ndia kalua. Ala foin nade, Sera (ndandaan nae, ‘mbila manggadedek’).