2 b Faik ndia, Yakob anan esa neme saon Rahel mai, nade Yusuf. Ndia teun sanahulu hitu, ana no ka'an nala lateme leu lanea sila bi'iae-bi'ilombon nala sama-sama. Ndia ka'an nala, anak neme Yakob saon Bilha ma Silpa mai. Tehuu Yusuf ia, mana nateme nafada aman, la'e-neu ka'an nala tatao-nono'in.

3 Neu faik fo bonggi Yusuf, Yakob namalasi so. Huu ndia de ana sue Yusuf lena heni ana fe'en nala. La'i esa, Yakob seu badu manalu neulau hiak esa^a fee Yusuf. 4 Ledo-eik ka'an nala lita aman sue Yusuf lena heni sala, ala binci lalan seli neun, losa ala ta nau kokolak loon no malole bali.

5-7 Le'odaek esa, Yusuf nalame'i. Boe ma ana tui mein ndia neu ka'an nala nae, “Wei! Ei mamanene dei! Au alame'i ae, ita basa nggata mba'a ita hade-nggandum nai osi dale. Boe ma au hadeng nambadeik lido-lido. Tehuu ei hadem mala lambadeik e'o, fo lakatele au enang.” Ka'an nala lamanene leo ndiak, boe ma ala boe lamanasan bali.

8 De ala sapa Yusuf lae, “Woi! O mae hetuk o sangga dadik malanggan fo palenda ai, do?” Ala lamanasa lalan seli neu ndia, huu nafada me'is ndia.

9 Basa boe ma Yusuf nalame'i seluk bali. Boe ma ana tui ka'an nala nae, “Wei! Au alame'i bali. Au ita ledo, bulak, ma nduuk sanahulu esa. Basa sala lakatele neu au.” 10 Ledo-eik Yusuf tui basa me'is ndia neu aman ma ka'an nala so, aman sapan no hala belak nae, “Me'is leo hata ndia! O mae hetuk au, inam, ma ka'a-fadim mala, mai fo idu o eim? O hihiim dei!” 11 De Yusuf ka'an nala dale hedi lalan seli neu ndia. Tehuu aman dudu'a doak me'is ndia.

12 Faik esa, Yusuf ka'an nala leni sila aman bi'iae-bi'ilombon nala dekak no nggolo Sikem. 13 Ta dook boe ma, aman nae, “Yusuf! O ka'am mala lanea bi'iae-bi'ilombo deka nai Sikem. De mahehele fo muu tilo sala dei.”

Boe ma Yusuf nataa nae, “Malole, ama.”

14 Boe ma aman nae, “O muu tilo ka'am asa ma au bi'iae-bi'ilombo nggala dei. Ala talo bee, na, o fali mai mafada au.”

Basa boe ma Yusuf la'o ela dae Hebron moon, de nakandoo losa Sikem. 15 Losa boe ma ana sangga nafeok kasa nai mook ndia. Basa de ana natonggo no hataholi esa, natanen nae, “O sangga hata?”

16 Yusuf nataa nae, “To'o. Au sangga au ka'a nggala. Ala hoo bi'iae-bi'ilombo sangga na'u deka-deka nai ia. To'o mita sala boe, do?”

17 Boe ma hataholi ndia nafada nae, “Ala ta lai ia bali. Tehuu ala lae, ala sangga leu deka-deka nggolo Dotan.”

Basa boe ma Yusuf neu tungga ka'an nala, losa nita sala leme Dotan. 18 Tehuu Yusuf bei nai dook, te ala litan so. Boe ma ala lala halak, fo sangga tao lisan. 19 Boe ma sila esa nafada esa nae, “Ei mete dei. Malangga mana malame'ik mai so! 20 Mai fo ita tao tisan leo. Basa, na, ita mbian neni oe dolu madak esa neu. Dei fo tafada ama tae, banda fui la la'a henin so! Bei fo ita tita ndia me'in nala dadik leo beek!”

21 Ka'an Ruben namanene leo ndiak, boe ma ana sangga dalak fo nau nasala'e Yusuf. Boe ma ana sapa fadin nala nae, “Wei! Boso ita tao tisan! 22 Malolenak kada ita mbian neni oe dolu madak dale neu. Nai ia mamana nees, de ta hambu hataholi bubuluk. Sadi boso tao madaan.” Ana kokolak leo ndiak, huu ana sangga mbo'i Yusuf, fo nadenun fali.

23 Ledo-eik Yusuf losa sila, ka'an nala humu lalan, de ala lu'i heni badu malolen ndia. 24 Basa boe ma ala hela loloson, de ala timban neni oe dolu madak neu.

25 Basa boe ma ala fali leu la'a. Ala bei la'a, nggengge neuk, ala lita hataholi bubuak esa mai. Hataholi bubuak kala sila banda ontan nala, fua leni bua danggan, sama leo ai daa kaboo menik, bumbu-fani, ma akidoo mata-matak. Ta bubuluk te bubuak ndia hataholi Ismael leme nggolo Gilead mai, sangga leni dook leu nai nusa Masir.

26 Basa boe ma Yahuda nafada ka'a-fadin nala nae, “Wei! Malolenak kada leo iak. Ita boso tao tisan. Ndia nanalan hata? Mae leo bee boe oo, ita ta bisa tafuni tala ndia daan. 27 Malolenak ita se'on neu hataholi Ismael asa sila. Mae ita taon leo bee boe oo, ndia bei ita fadi bonggin. Huu ndia de boso ita tao tahedin!” Boe ma basa sala lala halak lo ndia kokolan.

28 Nandaa no hataholi mana danggan nala^b lesik ndia, boe ma Yusuf ka'an nala helan neme oe dolu dale mai. Basa de ala se'on neu hataholi Ismael asa, no belin doi lilo fulak dua hulu.^c Basa boe ma ala loo Yusuf neni Masir neu.

29 Neu faik fo ala se'o Yusuf, Ruben ta bubuluk. Huu ndia de ledo-eik ana fali neni oe dolu neu, ana nggengge nalan seli, huu Yusuf taak kana so bali. Boe ma ana sisii balo'a manai aon, huu dalen hedis nalan seli. 30 Boe ma ana fali neni fadin nala neu nae, “Awii! Kakanak ta nai ndia so bali! Hatematak ia, au musi tao hata bali?”

31 Boe ma ala hala lala bi'i-aek esa, de ala ha'i lala Yusuf badu malolen ndia, de domben neni daak dale neu. 32 Boe ma ala ha'i lala badu kadaak ndia, lenin neu sila aman, de lafada lae, “Ama! Ai hele mala badu ia. Ama mita sudik kana dei. Boso losak fadi Yusuf badun ia.”

33 Yakob nita badu ndia, boe ma nalelak tutik kana. De nataa nae, “Awii! Memak au anang badun ia. Ta bubuluk banda fui sii nalan nai bee so. Awii! Au anang maten so!”

34 Basa boe ma Yakob sisii badun, de ana pake karon akinaak, huu ana dale hedi nalan seli.^d Boe ma namatani nakaleleu anan, ta pake hahae. 35 Basa ana tou anan nala ma ana ina anan kokoen, tehuu ta lala sana. Ana nae, “Taa! Au bisa dale hedi losa mate, huu au ta bisa afalende heni kakanak ia.” Boe ma Yakob dale hedi nakandoo, huu nasaneda ndia anan Yusuf maten so.

36 Neu faik fo Yakob bei dale hedi leo ndiak, te hataholi mana danggan nala sila^e losa Masir so. Boe ma ala se'o Yusuf neu hataholi ina-huuk esa, nade Potifar. Ndia ia, mane Masir malangga mana manean.