Esau numbu-sadun nala
36
Ia Esau numbu-sadun nala. Ndia nade fe'en, Edom boe. 2 Esau sao ina Kana'an dua. Esa, hataholi Het, ndia Elon ana ina anan, nade Ada. Kaduan, hataholi Hewi, nade Oholibama. Ndia aman, nade Anah ma ba'in, nade Sibeon. 3 Esau sao Ismael ana ina anan esa boe, nade Basmat. Basmat naan, nade Nebayot.4 Esau sao ulun, Ada, bonggi Elifas. Basmat bonggi Rehuel. 5 Boe ma Oholibama bonggi Yeus, Yalam ma Kora. Bonggi basa Esau anan nala leme nusa Kana'an.
6 La'i esa, Esau hu'a neni nusa fe'ek esa neu, dook neme Yakob mai. Ana noo sao-anan, hataholi mana tao uen, bandan, ma basa hata-heton nala. 7 Esau nasidak no Yakob, huu sila bandan ma hata-heton nala no'un seli, de ala lasoda lakase'e lai nusak ndia. 8 Boe ma Esau (ndia Edom), neu leo nai lete mbukuk kala nai Seir.
9 Ia, Esau numbu-sadun nala, fo lae, ‘hataholi Edom’. Ala leo lai lete mbukuk kala nai Seir.
10-13 Esau saon Ada, bonggi ana tou anak esa, nade Elifas. Elifas ana tou anan lima, sila: Teman, Omar, Sefo, Gatam ma Kenas. Elifas sao nakaboin, nade Timna. Ana bonggi ana tou anak esa, nade Amalek.
Esau saon Basmat, bonggi ana tou anak esa, nade Rehuel. Rehuel hambu ana tou anak haa, sila: Nahat, Sera, Syama, ma Misa.
14 Esau saon Oholibama, ndia Anah anan, fo Sibeon umbun, bonggi ana tou anak telu, sila: Yeus, Yalam ma Kora.
15-16 Esau umbu-anan nala lababa'e dadik leo no'uk. Esa-esak no ndia mane leon. Esau ana ulun Elifas, anan nala dadik mane leo Teman, mane leo Omar, mane leo Sefo, mane leo Kenas, mane leo Kora, mane leo Gatam, ma mane leo Amalek. Basa sala sila, Esau no saon Ada numbu-sadun nala.
17 Esau anan Rehuel, anan nala dadik mane leo Nahat, mane leo Sera, mane leo Syama, ma mane leo Misa. Basa sala sila, Esau no saon Basmat numbu-sadun nala.
18 Esau no saon Oholibama anan nala dadik mane leo Yeus, mane leo Yalam, ma mane leo Kora.
19 Basa leo la sila, Esau numbu-sadun nala.
Seir numbu-sadun nala
20-21 Nai mamanak ndia boe oo, hambu hataholi Hori esa, nade Seir. Ndia anan nala lababa'ek dadik leo no'uk. Esa-esak no mane leon. Boe ma ndia anan nala dadik mane leo Lotan, mane leo Sobal, mane leo Sibeon, mane leo Anah, mane leo Dison, mane leo Eser, ma mane leo Disan.
22 Lotan anan nala, sila Hori no Heman (Lotan feton, nade Timna).
23 Sobal anan nala, sila Alwan, Manahat, Ebal, Sefo, ma Onam.
24 Sibeon anan nala, sila Aya, ma Anah. Anah ndia natonggo oe mata matobik nai moo salaek, neu faik fo ana hoo aman banda keledein nala.
25-26 Anah ana ina anan, ndia Oholibama. Ma ana tou anan, ndia Dison. Dison anan nala, sila Hemdan, Esban, Yitran, ma Keran.
27 Eser anan nala, sila Bilhan, Sa'awan, ma Akan.
28 Disan anan nala, sila Us ma Aran.
29-30 De mane leo hataholi Hori la, sila Lotan, Sobal, Sibeon, Anah, Dison, Eser ma Disan. Basa sala leo lai nusa Seir.
Edom manen nala
31 Neu faik fo nusa Israel manen bei taa, nai dae Edom hambu manek so. Sila naden nala latutunggak, sila:
32 Bela, fo Beor anan, dadik manek nai kota Dinhaba.
33 Neu faik fo Bela maten, Yobab nggatin dadik manek. Ndia aman, nade Sera neme nggolo Bosra mai.
34 Neu faik fo Yobab maten, Husam nggatin dadik manek. Husam ndia, neme hataholi Teman asa nusan mai.
35 Neu faik fo Husam maten, Hadad nggatin dadik manek. Aman, nade Bedad neme nggolo Awit mai. (Ndia ndia senggi hataholi Midian neu faik fo ala latati leme Moab.)
36 Neu faik fo Hadad maten, Samla nggatin dadik manek. Samla ndia, neme nggolo Masreka mai.
37 Neu faik fo Samla maten, Saul nggatin dadik manek. Saul ndia, neme nggolo Rehobot mai, nai lee bifin.
38 Neu faik fo Saul maten, Ba'al-Hanan nggatin dadik manek. Aman, nade Akbor.
39 Neu faik fo Ba'al-Hanan maten, Hadar nggatin dadik manek. Hadar ndia, neme nggolo Pau mai. Saon, nade Mehetabel. Mehetabel aman, nade Matret. Ma ba'in, nade Mesahab.
40-43 De mane leo fo numbu-saduk neme Esau sala mai, sila: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel, ma Iram. Sila esa-esak foi sila nusan tungga sila nade hehelin.
De basa sila, tutuik la'e-neu Esau numbu-sadun nala, fo hataholi Edom asa.