Yakob asa lalai leni Betel leu
35
Basa boe ma Manetualain kokolak no Yakob nae, “Au ia, Manetualain fo atudu aong neu o so, neu faik fo o malai muma ka'am Esau mai. Hatematak ia, o hu'a muni Betel muu leo. Losa ele, na, o tao mei tunu-hotuk fee Au. Basa de o leo muu ndia leo.”2-3 Basa boe ma Yakob kokolak no basa uma isin nala nae, “Hatematak ia, ita basa nggata sangga la'o teni Betel teu. Makahulun, neu faik fo au nai susa dale, Manetualain fali nala au nai ndia. Au sangga tao mei tunu-hotuk esa nai ndia. De hatematak ia, ei nggali heni basa ei bua nana doki sosonggom mala. Tao malalao ei ao-inam mala, ma nggati balo'am mala, huu ita sangga takaluku-takatele neu Manetualain.” 4 Boe ma ala fee basa sila bua nana doki sosonggon ma lolo'en nala.a De Yakob natoi basa buas sala sila, neu ai ina-huuk esa huun, dekak no nggolo Sikem. 5 Neu faik fo Yakob bubuan nala la'o leme Sikem mai, Manetualain fee namemeda bibiik neu hataholi malai basa nusak ndia, losa ala ta lambalani tao manggalauk neu Yakob asa.
6 Boe ma Yakob no basa bubuan nala, losa Betel lo sodak (fo makahulun, nade Lus), nai dae Kana'an. 7 Nai ndia, Yakob nambadedei mei batu tunu-hotuk. Boe ma ana foi mamanak ndia, nade El Betel, (fo ndandaan nae, ‘Betel Manetualain’), huu makahulun Manetualain natudu aon neu Yakob neme ndia, neu faik fo nalai neme ka'an mai.
8 Dekak no nggolo Betel, hambu ai ina-huuk esa, fo hataholi foin nade Alon Bakut. Ndandaan nae, ‘ai makaleleuk’. Ana hambu nadek ndia, huu ledo-eik Ribka ina koko'on, nade Debora maten, latoin neme ai ndia huun.
9 Neu faik fo Yakob fali neme Padan Aram mai so, Manetualain natudu aon bali, ma feen baba'e-babatik. 10 Manetualain kokolak nae, “Mulai neme hatematak ia mai, o nadem ta Yakob bali. Tehuu Au fee o nade beuk, fo ndia, Israel.b 11 Au ia, Manetualain fo Mana Koasa Nai Lain Seli. De o bonggi ma maumbu makadotok leo! Dei fo hataholi nusak kala kalua leme o numbu-sadum mala mai. Ma dei fo o bonggi mala manek kala. 12 Nusak fo Au fee o ba'im Abraham, ma amam Isak ndia so, hatematak ia, Au feen neu o ma o numbu-sadum mala.”
13-14 Manetualain kokolak basa leo ndiak, boe ma Yakob nambadedei dii batu esa neu ndia, fo suek dadik tanda nasanenedak neu Manetualain hehelun ndia. Boe ma ana di'a anggol oek, ma mina neu batu ndia lain, fo nakaluku-nakatele neu Manetualain. 15 Mamanak ndia, ana foin nade Betel.
Yakob saon Rahel bonggi lenggu
16 Basa boe ma Yakob asa la'o ela Betel. Neu faik fo ala bei doo-doo ana neme Efrata mai, (fo ndia Betlehem), Rahel fain fo sangga bonggi losa so. Tehuu ana bonggi nakalele'ok. 17 Ledo-eik ana bei nakanasa nalan seli, boe ma ina mana makabobonggik nafadan nae, “Ina Rahel! Tao matetea o dalem, huu ina hambu ana tou anak bali!” 18 Ledo-eik sangga ketu Rahel ani hahaen so, boe ma ana foi kakanak ndia nade, Ben-Oni, (fo ndandaan nae, ‘kakanak neme au doidosong mai’). Basa boe ma ana mate. Tehuu Yakob foi kakanak ndia, nade Benyamin, (fo ndandaan nae, ‘kakana lima konak’).
19 Basa boe ma ala latoi Rahel neu dalak bifin, fo mana sangga neni Efrata neu, (fo hatematak ia, nade Betlehem). 20 Boe ma Yakob nambadedei batu lates esa neu ndia. Losa faik ia boe oo, Rahel laten bei nai ndia.
Yakob anan nala
21 Basa boe ma Yakobc lali-lali nakandoo. La'i esa, ana nambadedei tenda nai manara Eder boboan. 22 Neu faik fo leme ndia, Ruben sunggu no aman sao nakaboin, Bilha. Yakob bubuluk dede'ak ndia.
Yakob ana tou anan sanahulu dua.
23 Lea anan nala, sila: Ruben (Yakob ana ulun), Simeon, Lewi, Yahuda, Isaskar, ma Sebulon.
24 Rahel anan nala, sila: Yusuf ma Benyamin.
25 Rahel atan Bilha anan nala, sila: Dan ma Naftali.
26 Boe ma Lea atan Silpa anan nala, sila: Gad, ma Aser.
Bonggi kakanak kala sila leme Padan Aram.
Yakob aman Isak maten