5 Yakob namanene hambu hataholi perkosa ndia ana ina anan so, tehuu kada ana nee-nee, ma ta tao hata-hata. Huu faik ndia, ndia ana tou anan nala lanea banda lai mook. De ana nahani losa basa sala fali.

6 Faik ndia, Sikem aman Hemor neni Yakob neu, fo sangga natane Dina. 7 Nandaa no dua sala bekola, Yakob anan nala fali leme mook mai. Ledo-eik ala lamanene lae, Sikem perkosa sila feton so, boe ma dalen nala hedis, ma ala luli lalan seli. Boe ma lae, “Tatao mata leo ndiak, ta nandaa nai Israel. De ita ta bole simbok hataholi tao manggalauk matak leo ndiak.”

8 Boe ma Hemor kokoe Yakob asa nae, “Tolanoo Yakob! Au anang Sikem sue tebe-tebe no tolanook ana ina anan. De au oke fo makambo'ik au anang saon. 9 Mete ma bisa, na, ita anan nala laha'ik kala. Ei ana tou anam mala, sao ai ana ina anan nala. Ma ai ana tou anan nala, sao ei ana ina anan nala, 10 Ela ei leo mabali ao mia ai nai ia. Ei nana mbo'ik leo sudi nai bee, ma danggan fo hambu hata-heto nai ia.”

11-12 Basa boe ma Sikem kokolak no Dina aman, ma ka'an nala nae, “Ei nau moke sudi hata, na au tungga. Ei nau moke ndia doi kena mamaek, ma ndia belin sudi ba'u bee, na au bae. Sadi ei mbo'i fo au sao ei feton.”

13 Tehuu Yakob anan nala bubuluk lae, Sikem perkosa sila feton Dina so. De ala lataa pepekok Sikem ma aman Hemor. 14 Boe ma ala lataa lae, “Ai ta bisa makasasaok ai feton no hataholi ta mana sunat! Ndia tao nakamamaek ai! 15 Tehuu ndia dala kaluan leo iak: basa ei touk kala, inahuu-kadi'ik, musi sunat sama leo ai. 16 Mete ma ei tao leo ndiak, na, bei fo ai bisa maha'ik kala. Ma ai boe oo bisa leo sama-sama mia ei nai ia, fo ita bisa dadik nusak esa. 17 Tehuu mete ma ei ta tungga ai hihiin, ma ta nau sunat, na, dei fo ai ha'i falik ai feton, boe ma ai hu'a mima ia mai.”

18 Hemor no Sikem simbok no malole sila kokolan. 19 Tehuu Sikem ta nau nahani so bali, huu ana sue mate no Dina. Basa hataholi malai nusak ndia, fee hadak neu Sikem. 20 De Hemor no Sikem leni mamana naketu dede'ak leu, nai nggolok lelesu inan, de ala lakokola lo basa hataholi malai nusak lae, 21 “Basa tolanoo nggala ei! Hataholi Israel asa ia, lahiik lasoda mole lo ita. De ela ala leo sama-sama lo ita nai nusak ia. Nusak ia loan dai soa-neu ita basa nggata. Ita bisa taha'ik to sila ana ina anan nala. Sila boe oo bisa lasaok lo ita ana ina anan nala. 22 Ala loke kada dede'a kadi'ik esa, neme ita mai. Ndia basa ita touk kala musi sunat sama leo sila. 23 Mete ma ita tasoda takabubua so, na, dei fo basa sila bandan nala ma hata-heton nala dadik ita pusakan boe, hetu? De malolenak ita simbok sila hihiin. Mai fo ita basa nggata sunat sama-sama! Makaheik, do?”

24 Boe ma basa hataholi mana makabubuak lai ndia, lakaheik neu Hemor no Sikem kokolan. De basa touk malai nusak ndia, ala sunat rame-rame.

25 Neu fai katelun, ledo-eik basa mana sunat hinan bei hedis, boe ma Dina ka'an, Simeon no Lewi, hela lala tafan nala, de ala maso no nee-neek leni nggolok dale leu. Boe ma ala tao lisa basa touk kala. 26 Ala tao lisa Hemor no Sikem boe. Boe ma ala loo Dina kalua neme Sikem uman mai, de ala fali.

27 Basa boe ma Yakob ana fe'en nala, maso leni nusak ndia leu, de ala lamoa lala nusak ndia isin. Ala luli, huu hataholi perkosa sila feton nai ndia. 28 Ala lamoa lala basa hataholi buan nala, leme uman nala mai, ma ala hoo leni basa bandan nala leme mook. 29 Ala ha'i leni basa inak kala, ma kakanak kala, ma lamoa leni basa nusak ndia bua mabelin nala.

30 Ledo-eik Yakob bubuluk dede'ak ndia, ana kokolak no Simeon ma Lewi nae, “Ei tao tatao nggoak hata ia so? Kada tao makatoto'ak au! Dei fo hataholi Kana'an, hataholi Peris, ma basa hataholi manai dae baba'ek ia, binci mate lo ita. Sila hataholin nala no'uk, tehuu ita hataholin nala kada lumak. Mete ma ala mai sambu ita, na, ita takalulutuk leo, maa.”

31 Tehuu lataa lo nasak lae, “Ama! Ama mae hetuk ai nau ela sala tao ai feton, dadik ina kalabik, do?”