3 Basa boe ma MANETUALAIN kokolak no Yakob nae, “Hatematak ia, fain losa so. De o musi fali muni o ina-amam mala muu. Dei fo Au sama-sama ua o.”

4 Basa boe ma Yakob nadenu leu loke Rahel ma Lea, fo mai latonggo lo ndia nai banda la mamanan nai mook. 5 Boe ma nafada sala nae, “Fai makabuin ia, au ita ei amam matan kada mamada ndoos neu au so. Ndia boe oo, ta malole no au sama leo makahulun so bali. Tehuu Manetualain fo au amang nakaluku-nakatelek ndia, sama-sama no au. 6 Ei dua nggei bubuluk, doo basa ia, au tao ues mbilu-mbuse alan seli so, fee ei amam! 7 Mae leo ndiak, tehuu ana nambue kedi nala au taa-taa. Ana nggati au sesebang losa lai sanahulu. Mae leo ndiak, tehuu Manetualain nanea nahele au. 8 Neu faik fo ei amam kokolak nae, ‘Banda kokotok kala, dadik o sesebam,’ boe ma basa banda la sila bonggi kokotok. Fai seluk, ana kokolak bali nae, ‘Hatematak ia, banda keke'ak kala, dadik o sesebam,’ boe ma basa banda la sila bonggi keke'ak. 9 Manetualain tao leo ndiak, fo suek Ana ha'i nala ei amam bandan nala, fo feen neu au.

10 La'i esa, neu faik fo banda sila fai nahoan, au ita nai me'is dale ae, basa banda mane mana mahoak kala sila, hambu keke'ak ma kokotok. 11 Boe ma Manetualain ata nusa sodan noke au nai me'is dale nae, ‘Wei! Yakob!’

Boe ma au ataa ae, ‘Hata Manetualain?’

12 Boe ma nafada nae, ‘Mete dei! Basa banda mane mana mahoak kala, kada hambu keke'ak ma kokotok. Au ndia heti basa sila, huu Au ita hata fo Laban taon neu o so. 13 Au ia, Manetualain fo atudu aong neu o neme Betel. Nai ele, o mambadedei batu esa, boe ma di'a mina neun, de makaluku-makatele neu Au. Boe ma o mba'a heheluk mua Au muma ndia. Hatematak ia, o musi la'o ela nusak ia, fo fali muni o ina-amam mala nusan muu.”’

14 Rahel no Lea lataa lae, “Neu! Kada ai tungga! Huu ai ta maena pusa hata-hata so bali, neme ama Laban mai. 15 Doo basa ia, tou lasik taok ai sama leo hataholi fe'ek so. Ana se'o heni basa ai, ma na'a heni ai belin so. 16 Basa hata fo Manetualain ha'in neme ama Laban mai, hatematak ia dadik neu ita, ma ita anan nala pusakan so. De mete ma Manetualain nae leo bee so, na, kada tungga!”

17-18 Basa boe ma Yakob mulai nafafa'u buan nala. Boe ma ana nakahehenek basa sao-anan nala leu banda onta, ma hoo neni basa bandan nala, ma buas sala fo ana hambun neme Padan Aram, fo ala fali leni dae Kana'an leu.

19 Faik ndia, Laban neu nggute bi'i-lombon nala bulun. Boe ma Rahel namana'o neni aman bua nana doki sosonggon nala. 20 Yakob asa kada la'o no nee-neek, ma ta nate'a ali-aman. 21 Ana ha'i neni basa hata-heton nala, boe ma ala la'ok lai-lai lesik lee Efrat, boe ma lasale leni lete Gilead leu.

22 Seli faik telu, boe ma Laban hambu halak nae, Yakob asa lalai so. 23 Boe ma Laban nakabubua nala hataholin nala, de leu husi tungga mane-feun. Ala husi tungga losa faik hitu, bei fo hambu sala leme letek kala manai Gilead.

24 Le'odaen ndia, boe ma Manetualain natudu aon neu Laban nai me'is dale. Ana nae, “Laban! Mete ma o kokolak mua Yakob, na, manea neulalau o bafam.”

25 Le'odaen ndia, Yakob nambadedei tenda neme lete Gilead. Boe ma Laban asa lambadedei sila tendan ta dook neme ndia mai.

26 Basa boe ma Laban mai natonggo no Yakob. Boe ma kokolak nae, “Heh, Yakob! Hatina de o malai mua au ana ina ana nggala no nee-neek leo iak? Sama leo o mamoa mala hataholi leme musu dale mai. 27 Talo bee de o malai no nee-neek, fo ta mate'a au bali! Mete ma o mafada au no malole, neu ko au tao feta nakasoe, fo mia ei pake meko-labu,^a bei fo mbo'i ei la'o. 28 O salam esa bali, ndia o ta fee au lelak fo idu au umbu-ana nggala, bei fo mbo'i sala. O tataom ia, nggoan seli! 29 Lofo anak au bisa tao o soe! Tehuu le'odaek, Manetualain fo o amam nakaluku-nakatele neu ndia, ka'i au nae, mete ma au kokolak ua o, na, au musi anea neulalau au bafang. 30 Memak au bubuluk ae, o la'o huu o dokodoe sangga fali so. Tehuu hatina de, o bei mamana'o muni au bua nana doki sosonggo nggala?”

31 Yakob nataa nae, “To'o boso mamanasa au! Au la'o no nee-neek, huu au bii, boso losak to'o nakalelee nala kakanak kala ia, na, talo bee?” 32 Tehuu Yakob ta bubuluk saon Rahel ndia namana'o neni bua nana doki sosonggok kala sila. De ana nae, “To'o! La'e-neu bua nana doki sosonggok sila, na, sangga leo! Mete ma hambun nai see, na, huku misan. Palisak basan leo! Mete ma hambu to'o bua pusaka fe'en, na, ha'i falik kana. Ela basa hataholi la ia, dadik sakasii.”

33 Boe ma Laban neu palisak esa-esak tendan. Sososan Yakob tendan. Basa de neni Lea tendan neu. Boe ma ata ina kaduak kala sila tendan nala. Tehuu ta hambu bua nana doki sosonggok kala sila. Babasan, ana maso neni Rahel tendan neu. 34 Tehuu Rahel nafuni bua nana doki sosonggok kala sila nai banda onta bebelan buin. De nanggatuuk neu lain. Laban palisak lutu-lutuk nai Rahel tendan, tehuu ta hambu sala.

35 Boe ma Rahel kokolak no aman nae, “Ama boso mamanasa. Au ta bisa ambadeik, huu au hambu bulak.” De Laban nasanggak bali, tehuu ta hambu bua nana doki sosonggok kala sila.

36 Boe ma Yakob daan sa'e, de nasapalak Laban nae, “Au tao manggalauk hata neu to'o? Losa to'o husi tungga au, nonook leo au hataholi manggalauk! 37 To'o palisak basa au bua nggala so. De to'o hambu hata? Hena taon neu mata ia, fo ita basa nggata tita! Fo ela hataholi la ia laketu lae, bua sala sila, see enan. 38 Teuk 20, au dadi kuli fee to'o so. Neu faik fo au anea to'o bandan nala, ta hambu esa boe kalaheni. Au ta u'a esa boe. 39 Mete ma hambu banda fui tao nisa to'o bandan esa, na, au ta afada to'o, tehuu au nggati. Ma mete ma hataholi lamana'o to'o bandan, na, to'o fee au nggati, mae au salang ta ndia. 40 Leledok, na ledo hotu au. Le'odaek, na au manili. Au be'e losa au ta bisa sunggu, huu anea to'o bandan nala. 41 Memak teuk 20 ndia tetebes! Au tao ues teuk 14, fo hambu to'o ana ina anan nala. Basa de au tao ues tamba teuk 6 bali, fo bisa hambu au banda nggala. To'o nambue nggati au sesebang losa la'i sanahulu, naa te au dadi kuli doo basa ndia. 42 Uak Manetualain, fo ba'i Abraham ma ama Isak lakaluku-lakatele neun, nanea au. Mete ma taa, na, neu ko to'o husi falik au ua lima louk so. Tehuu Manetualain matan ta mbokek neu au toto'ang, ma Ndia nita basa au ueng. Huu ndia de le'odaek, Ana mai sapa to'o.”

43 Laban namanene basa Yakob kokolan leo ndiak, boe ma nataa nae, “Leo iak! Ina kaduak kala sila, au ana nggala. Kakanak kala fo ala bonggi lalak sila, basa sala au umbu nggala. Basa banda la ia au enang. Basa hata fo o mita nai ia, memak au enang. Tehuu au sangga tao hata? Au ta bisa akalelee sala. 44 De malolenak, ita dua nggata mba'a heheluk. Ma ita musi tasoda tungga heheluk ndia.”

45 Basa boe ma Yakob ha'i nala batu ina-huuk esa, de nambadedein neu ndia dadik tanda. 46 Boe ma Yakob nadenu hataholin nala leu lakaduduluk batu, fo lakatotodok kasa. Boe ma basa sala langgatuuk la'a dekak lo batu la sila. 47 Boe ma Laban foi batu nana nakatotodok sila nae, Yegar Sahaduta. Tehuu Yakob foin, nade Galeed.^b

48 Boe ma Laban nae, “Batu nana nakatotodok ia, dadik sakasii neu ita dua nggata.” Huu ndia de mamanak ndia, nade Galeed. 49 Laban boe oo, foi mamanak ndia, nade Mispa (fo liin hihii leo dede'a de'ek fe'ek, fo ndandaan nae, ‘mamana nanea madema’), huu ana kokolak nae, “Dei fo MANETUALAIN mesak kana nanea ita dua nggata, fo mae ita takadodook boe oo, ita ta bole la'o lena heheluk ia. 50 Mete ma o tao manggalauk neu au ana nggala, do sao ina fe'ek kala, na, neu ko au ta bubuluk. Tehuu masanenedak! Manetualain dadik sakasii neu o ma au. 51-52 Hena mete batu nana nambadedeik ia, ma batu nana nakatotodok ia. Masanenedak, te batu la ia, dadik too boe. O ta bole lena seli batu la ia, fo tao manggalauk neu au. Ma au boe oo, ta bole lena seli batu la ia, fo tao manggalauk neu o. 53 Ita mba'a heheluk ia, pake ita bei-ba'in nala Manetualain. Fo ndia o ba'im Abraham, ma au ba'ing Nahor Manetualain. Dei fo Ndia mesak kana dadik mana maketu dede'ak fo naketu ita dua nggata dede'an.”

Yakob namanene basa leo ndiak, boe ma ana soo mate pake Manetualain naden, fo ndia aman Isak nakaluku-nakatele neun.

54 Basa boe ma Yakob hala banda, de ana nenin dadik neu tunu-hotuk fee Manetualain nai letek ndia lain. Boe ma noke basa hataholi la, fo la'a sama-sama, ma ala be'e leme ndia losa fafain.

55 Fo'a fafain, boe ma Laban neu holu-idu basa umbu-anan nala. Basa de ana kokolak fee baba'e-babatik neu sala, de ana fali neni nusan neu.