2 Boe ma Yakob nasapalak kana nae, “O mae hetuk au ia Manetualain, fo bisa fee o anak!?”

3 Boe ma Rahel kokolak nae, “Leo iak! Malolenak ama ha'i mala au atang, Bilha. Muu sunggu muan, fo ana bonggi fee au anak.”

4 Boe ma ana fee Bilha neu saon, de sunggu no ndia. 5 Basa boe ma Bilha nailu, de ana bonggi ana tou anak esa. 6 Boe ma Rahel kokolak nae, “Manetualain namanene au huhule-haladoing so. Huu ndia de Ana fee au ana tou anak esa. Manetualain naketu au dede'ang no ndoos so.” Boe ma ana foi kakanak ndia, nade Dan (fo ndandaan nae, ‘naketu dede'ak’).

7 Basa boe ma Bilha nailu seluk bali, de ana bonggi ana tou anak esa. 8 Boe ma Rahel kokolak nae, “Au akasusudik ua au ka'ang so, de au senggin.” Huu ndia de ana foi kakanak ndia, nade Naftali (fo ndandaan nae, ‘nakasusudik’).

9 Neu faik fo Lea nameda ta hambu anak so bali, boe ma ana fee atan Silpa neu saon, fo ana saon. 10 Boe ma Silpa bonggi ana tou anak esa. 11 De Lea kokolak nae, “Au ua-naleng malole so.” Ma ana foi kakanak ndia, nade Gad (fo ndandaan nae, ‘ua-nale malole’).

12 Boe ma Silpa bonggi ana tou anak esa bali. 13 De Lea kokolak nae, “Wei! Hatematak ia, bei fo au amahoko! Mete te, dei fo basa inak kala kokolak lae, au nanalang seli so.” Huu ndia de ana foi kakanak ndia, nade Aser (fo ndandaan nae, ‘namahoko’.

14 La'i esa, nandaa no fai kokoluk, Ruben neni nula dale neu, de hambu akidook esa fo bisa tao hataholi hambu anak. Boe ma nenin neu inan Lea. Rahel nita leo ndiak, boe ma noke Lea nae, “Ka'a! Fee au akidook faa, fo Ruben nenik ndia.”

15 Tehuu Lea nataa nae, “Weih! O ia, ana seli so! O mamoa mala au saong so. Hatematak ia, o nau mamoa mala akidook ndia, neme au anang mai bali? O ia, ta mae malelak!”

Tehuu Rahel kokolak nae, “Leo iak, ka'a. Mete ma au hambu akidook ndia, na, le'odaen ia, o bole sunggu mua Yakob.” Boe ma Lea nakaheik.

16 Ledo bobok, Yakob fali neme osi mai. Boe ma Lea neu natonggo noon, de kokolak nae, “Yakob! O musi sunggu mua au le'odaen ia! Huu au bae memak o unik au anang akidoon so.” De le'odaen ndia boe oo, Yakob sunggu no Lea.

17 Boe ma Manetualain namanene Lea huhule-haladoin. Huu ndia de nailu, boe ma ana bonggi ana tou ana kaliman. 18 De Lea foi kakanak ndia, nade Isaskar (fo ndandaan nae, ‘bae sosotak’), huu ana nae, “Manetualain bae au sosotang so, huu au fee Silpa sao nala au saong so.”

19 Basa boe ma Lea nailu bali, de ana bonggi ana tou ana kaneen. 20 Ana kokolak nae, “Manetualain fee au hadia neulauk so. De hatematak ia, au saong musi fee hadak neu au, huu au bonggi feen ana tou anak nee so.” Huu ndia de ana foi kakanak ndia, nade Sebulon (fo ndandaan nae, ‘fee hadak’).

21 Basa boe ma Lea bonggi ana ina anak esa, de ana foin, nade Dina.

22 Boe ma Manetualain nasaneda Rahel, de Ana namanene ndia huhule-haladoin. Huu ndia de Ana soi ana manan. 23 Basa boe ma Rahel nailu, de ana bonggi ana tou anak esa. Ana nae, “Manetualain so'u heni au namemeda maeng so.” 24 De ana foi kakanak ndia, nade Yusuf, (fo ndandaan nae, ‘fee tamba’), huu ana nae, “Au oke fo Manetualain fee tamba au ana tou anak esa bali.”

25 Neu faik fo Rahel bonggi Yusuf so, Yakob kokolak no Laban nae, “Ama! Mete ma bisa, na, au sangga fali uni au nusang uu dei. 26 Ela au ua falik au sao-ana nggala. Ama bubuluk so, au tao ues mbilu-mbuse fee ama, de au bae ketu sala so. Huu ndia de hatematak ia, au haak sila so.”

27 Basa boe ma ali-aman nataa nae, “Ana, ei! O mamanene dei. Au neuk basan so, boe ma au bubuluk ae, Manetualain fee au baba'e-babatik so, huu o. 28 Hatematak ia, o sangga moke ba'u bee, na, au bae! Sadi o leo nai ia, ma tao ues makandoo fee au.”

29 Yakob nataa nae, “Ama mita aom au tao ues tingga-tingga so. Huu ndia de ama bandan nala boe lamano'u lakandoo. 30 Neu faik fo au bei ta mai, ama hata-heton nala ta no'uk. Tehuu hatematak ia, ama mamasu'i so. Manetualain fee baba'e-babatik neu ama so, huu au ueng. Hatematak ia fain losa so, fo au sangga tao ues fee au sao-ana nggala bali.”

31 Basa boe ma Laban natane nae, “De au musi bae leo beek neu o?”

Yakob nataa nae, “Ama ta paluu fee au hata-hata. Dei fo au akaboi akandoo ama bandan nala, sadi au bisa tao dede'ak esa. 32 Makambo'ik au, fo faik ia boe oo, au uni ama bandan nala uu, fo hele ala bi'iae-bi'ilombo. Ta kokotok, ma ta keke'ak kala, na, ama enan. Tehuu kokotok ma keke'ak kala, na, ela au hambu sala. Ma au boe oo ha'i ala basa bi'i-lombo nggeok kala. Basa sila, baen neu au sosotang.^a 33 Nai fai makabuin, dei fo ama bisa bubuluk au ia ndoos, do taa. Sudi faik bee, ama bisa mai palisak au banda nggala. Mete ma mita bi'i-ae ta kokotok, do ta keke'ak, do bi'i-lombo fulak, na, ama bubuluk memak mae, au ndia amana'o ama bandan nala.”

34 Laban nakaheik nae, “Malole! Leo ndiak leo.” 35 Tehuu faik ndia boe oo, Laban tada kofe'e basa banda kokotok, keke'ak, ma bi'i-lombo nggeok. Boe ma nadenu ndia anan nala lakaneni banda la sila. 36 Boe ma ala leni banda la sila leni mamanak esa leu, fo doon la'o eik faik telu, neme Yakob mai. De Yakob bei nakaboi ali-aman bi'iae-bi'ilombo elan nala.

37 Basa boe ma Yakob tati nala ai ndanak neme ai matak telu mai, de ana lufa loun tao kekela-kekelak. 38 Ana tao ai nana kekelak kala sila, neu banda la mamana nininun. Banda la lahiik lahoak lai mamana nininuk. 39 De neu faik fo banda la lahoak neu ai nana kekelak kala sila matan, dei fo anan nala kalua mai, bulun nala kokotok ma keke'ak boe.

40 Boe ma neu faik fo Laban bandan nala sangga lahoak, na Yakob fee sala lasale leni banda kokotok ma keke'ak leu. Boe ma anan nala kalua kokotok ma keke'ak boe. No leo ndiak, ndia banda hehelin nala boe lamano'u. Boe ma ana tada kofe'e sala leme Laban bandan nala mai. 41 Neu faik fo banda balakaik kala lahoak, na Yakob tao ai nana kekelak kala neu matan nala, nai sila mamana nininun. 42 Tehuu mete ma ana nita banda mana mamalek kala lahoak, na, ana ta tao ai sila neu sala. De Laban hambu basa banda mana mamalek kala. Tehuu Yakob hambu basa banda balakaik kala. 43 No leo ndiak, Yakob namasu'i nalan seli. Ndia bi'i-ae, bi'i-lombo, banda onta, banda keledein nala, ma atan nala no'un seli.