3 Basa boe ma Yakob nadenu atan hida, la'ok lakahuluk leni nusa Edom leu (fo ndia Seir), fo lafada ka'an Esau lae, ana sangga mai. 4 Yakob nafada atan nala nae, “Ei miu mafada au ka'ang Esau leo iak: ‘Ama Esau! Ama atam, fo fadi Yakob, haitua soda-molek no'un seli neu ama. Neme au lala'ong makahulun mai losa hatematak ia, ama atan leo nai to'o Laban uman. 5 Hatematak ia, ama atan naena sapi, banda keledei, bi'iae-bi'ilombo, ata touk ma inak so. Au adenu hataholi la ia lakahuluk, fo fee halak neu ama, la'e-neu au mamaing. Au amahena, ama mahiik simbok ai no dale malenggak.”’ Boe ma hataholi la sila la'o.

6 Neu faik fo ala fali leni Yakob mai, ala lafada lae, “Ai matonggo mia ama ka'an Esau so. Hatematak ia, ana mai no touk 400, fo sangga latonggo lo ama.”

7 Yakob namanene leo ndiak, boe ma dalen nduka-ndukak, ma ana bii nalan seli. Boe ma ana ba'e basa hataholin nala ma bandan nala, dadik bubuak dua. 8 Ana dudu'a nae, “Mete ma Esau mai, fo sambu nala bubua kaesan, na, bubua kaduan bisa lalai sangga sodak.”

9 Basa boe ma Yakob hule-haladoi nae, “Manetualain! Manetualain fo au ba'ing Abraham ma au amang Isak lakaluku-lakatele neun. Mamanene au dei! Fai maneuk, Manetualain nadenu au fali uni au bobonggi nggala mai nai nusak ia. Manetualain helu nae, dei fo Manetualain heti neulalau basan. 10 Au ta andaa simbok Manetualain susuen, ma Manetualain dale kateman neu au. Makahulun, neu faik fo au lena lee Yarden, kada au uni tete'e-aik. Tehuu hatematak ia, au fali maing uni hataholi ma banda bubuak dua. 11 Au bii, boso losak ka'a Esau mai sambu tao nisa ai basa nggai. De au oke, fo Manetualain nasala'e nala au, ma basa au sao-ana nggala, neme ka'a Esau mai. 12 Manetualain helu nae, Manetualain fee baba'e-babatik makadotok neu au, ma tao au numbu-sadu nggala tamba lamano'u, sama leo salaek malai tasi bifik, fo hataholi ta bisa hingga lalan.”

13 Boe ma Yakob sunggu neu mamanak ndia. Fo'a mai, boe ma ana ha'i banda fo sangga fee palsen neu ka'an. 14 Ana hele nala bi'i-ae ina 200, bi'i-ae mane 20, bi'i-lombo ina 200, bi'i-lombo mane 20, 15 banda onta ina 30 no ana bei mana susun nala, sapi ina 40, sapi mane 10, banda keledei ina 20, ma banda keledei mane 10. 16 Boe ma ana ba'e banda la sila, esa-esak no numban ma bubuan. De ana fee bubua esa-esak no mana hoon. Ana nafada sala nae, “Ei la'ok makahuluk. Dei fo au tungga dea. Tehuu ei musi manea fo bubuak esa dook faa neme bubua fe'ek mai.”

17 Boe ma Yakob palenda mana hoo neme bubua kaesan mai nae, “Mete ma au ka'ang Esau natonggo no o, ma natane nae, ‘O sangga muni bee muu? O ia, see atan? Banda la ia, see enan?’ 18 Na, ei musi mataa mae, ‘Banda la ia, ama atan Yakob enan. Ana haitua fee ka'an, Esau. Tehuu ndia mesak kana bei tungga dea.”’ 19-20 Ndia boe oo palenda leo ndiak neu basa mana hoo bubua fe'ek kala nae, “Mete ma matonggo mia ka'a Esau so, na, ei palsen banda la sila neun. Boe ma ei mafada mae, au tungga dea.” Yakob dudu'a nae, mete ma ana fee basa banda la sila neu Esau, dei fo Esau dalen makasufu neu ndia. 21 De ana haitua banda la sila lakahuluk. Tehuu le'odaen ndia, ana bei nahani nai ndia.

22 Le'odaen ndia, Yakob fo'a, boe ma ana heti fo saon dua sala, sao nakaboin dua sala, ma ana kasanahulu esan nala, fo ala lena lee Yabok selik leu. 23 Neu faik fo basa sala losa selik so, boe ma ana haitua basa pusakan nala ele leu.

24 Tehuu Yakob mesak kana leo nai ndia. Basa boe ma touk esa mai, de naule no ndia losa lole mbilak. 25 Ledo-eik touk ndia nameda elaba'ik senggin, boe ma ana femba fee Yakob ikoain, losa ndia dui sesesun posi henin neme mamana nanggatutuun mai. 26 Boe ma touk ndia nae, “Mbo'i au leo, huu ba'ianak bali ledo sangga sadu so.”

Tehuu Yakob nataa nae, “O kokolak fee au baba'e-babatik dei, bei fo au mbo'i o!”

27 Boe ma touk ndia natane nae, “O nade see?”

Ana nataa nae, “Yakob.”

28 Boe ma touk ndia kokolak nae, “O nadem ta Yakob bali. Tehuu mulai neme hatematak ia mai, hataholi loke o lae, Israel (fo ndandaan nae, ‘naule no Manetualain’.) Huu o masusua laban hataholi, ma Manetualain, losa o senggi so.”

29 Boe ma Yakob natane nae, “O nade see?”

Tehuu touk ndia nataa nae, “O nau matane au nadeng tao hata?” Basa boe ma ana kokolak fee baba'e-babatik neu Yakob neme ndia.

30 Boe ma Yakob kokolak nae, “Au ita Manetualain matan no au mata heheling so, tehuu au bei asoda.” Huu ndia de ana foi mamanak ndia, nade Peni'el, fo ndandaan nae, ‘Manetualain matan’.

31 Ledo sadu so, neu faik fo Yakob la'o ela mamanak ndia. Tehuu ana la'ok doka-doka, huu ndia ikoain heok sala. 32 Huu ndia de losa hatematak ia, hataholi Israel asa ta la'a mbaa ikoaik, huu Manetualain femba sila ba'in Yakob ikoain, de duin nalai sala.