Yakob losa to'o Laban uman
29
Basa boe ma Yakob la'o nakandoo neni dulu neu. 2 Faik esa, nita oe dolu esa dekak no nggolok esa. Deka-deka nai ndia, hambu bi'iaek-bi'ilombo bubuak telu, lahani fo bisa linu oe nai ndia. Tehuu hambu batu ina-huuk esa tatana oe dolu ndia. 3 Tungga natetemen, mete ma basa bi'iae-bi'ilombo lakabubua so, bei fo mana hoo ko'o heok batu ndia, fo ha'i oe fee banda la linu. Ala linu late'e, na, tatana falik oe dolu ndia bali.4 Boe ma Yakob neu natane mana hoo la sila nae, “Wei! Ei mima bee mai?”
Ala lataa lae, “Ai mima nggolo Haran ia mai.”
5 Yakob natane bali nae, “Ei malelak au to'ong Laban, do? Ndia ndia, Nahor anan.”
Ala lataa lae, “Ai malelak kana.”
6 Yakob natane bali nae, “Ndia sodak, do?”
Ala lataa lae, “Tou lasik sodak. Hena suli, ndia ana ina anan ndia ele, nade Rahel, hoo neni ndia bi'iae-bi'ilombon nala mai fo linu oe lai ia. O mahani ia leo.”
7 Yakob kokolak bali nae, “Hatematak ia, ledo bei kamatetuk. De malolenak banda bee lakabubua lai ia so, na, fee sala linu leo. Basa, na hoo mini sala leni mook leu, fo la'a na'u bali.”
8 Tehuu ala sapa lae, “Awe'e, ta bisa leo ndiak! Ai musi mahani basa mana hoo la loo bandan nala lakabubua lai ia dei, bei fo ai ko'o heok batu ndia, fo fee banda la linu.” 9 Yakob bei kola-kola no hataholi la sila, te Rahel losa no aman bi'iae-bi'ilombon nala. Ndia ndia nateme hoo banda la sila.
10 Ledo-eik Yakob nita Rahel no bi'iae-bi'ilombon nala, boe ma neu ko'o heok oe dolu ndia tatanan. De ana fee to'on bandan nala linu. 11 Basa boe ma Yakob neu holu nala Rahel, de idun ma namatani. 12 De ana tui Rahel nae, “Fadi! Au ia, o amam fetom Ribka anan.” Boe ma Rahel nalai fali, neu nafada aman.
13 Ledo-eik Laban namanene Rahel tutuin la'e-neu Yakob, fo feton Ribka anan, boe ma ana nalai neu soluk kana. Ala latonggo, boe ma Laban holu nalan de idun, de noo Yakob neni uma neu. Basa de Yakob tui basan neu Laban. 14 a Boe ma Laban kokolak nae, “Memak tetebes! Ita dua nggata bobonggik!”
Yakob sao nala Lea ma Rahel
14 b Neu faik fo Yakob leo no sala losa bulak esa, 15 Laban kokolak noon nae, “Leo iak, Yakob! Au ta nau o tao ues hiak fee au, huu ita dua nggata bobonggik. O moke nggadi ba'u bee?”
16 Laban ana fe'on dua. Ka'ak nade Lea, ma fadik nade Rahel. 17 Lea matan mana mamalek.a Tehuu Rahel matan mana'a hiak, ma aon lolen seli. 18 Yakob sue Rahel. De ana nataa Laban nae, “Au tao ues fee to'o teuk hitu, sadi to'o fee au sao ala Rahel.”
19 Boe ma Laban nataa nae, “Hei! Malolenak au fee Rahel sao no o, fo au bobonggi heheling! Ana ta paluu sao no hataholi fe'ek. De o leo kada ia, fo tao ues fee au.” 20 Boe ma Yakob tao ues teuk hitu, fo bisa hambu Rahel. Tehuu ana sue mate-mate no Rahel. De teuk hitu ndia, nameda sama leo kada faik hida.
21 Seli teuk hitu, boe ma Yakob fee nasanenedak neu Laban nae, “To'o! Au tao ues fee to'o teuk hitu ia so, de hatematak ia fee au sao ala Rahel leo.”
22 Boe ma Laban tao feta kabin, ma hoka basa hataholi malai nusak ndia. 23-27 Le'odaen ndia, Laban ta fee Rahel, tehuu ana fee Lea maso neni Yakob tendan neu. De Yakob sunggu noon. Fo'a, bei fo Yakob bubuluk nae, ndia sao no Lea. Boe ma Yakob neu sapa Laban nae, “Hatina de to'o maeok au? Au tao ues mbilu-mbuse teuk hitu fo au hambu Rahel! Tehuu hatina de to'o nggatin no Lea?”
Boe ma Laban nataa nae, “O boso mamanasa leo ndiak! Tungga ai hadan nai ia, na, fadik ta bole sao nakahuluk neme ka'ak mai. De malolenak kada leo iak! O mahani losa feta kabin ia, basa faik hitu dei. Bei fo o hambu Rahel, sadi o tao ues fee au teuk hitu bali.” Boe ma Laban fee ndia ata inan, nade Silpa, fo dadik neu Lea atan.
28 Yakob nakaheik. Huu ndia de basa feta faik kahitun, boe ma Laban fee Rahel sao no Yakob. 29 Laban fee ata inan esa bali, nade Bilha, fo dadik Rahel atan. 30 Boe ma Yakob sunggu no Rahel. Ana sue Rahel lena heni Lea. De ana tao ues tamba teuk hitu fee ali-aman.
Yakob anan nala
31 Tehuu MANETUALAIN bubuluk Yakob sue Rahel lena Lea. De Ana mbo'i Lea bonggi. Tehuu Rahel ta hambu anak. 32 Boe ma Lea nailu, de ana bonggi ana tou anak esa. Ana foin nade, Ruben (fo ndandaan, ‘nita, hambu anak’),b huu ana nae, “Memak MANETUALAIN nita au to'a-taang so. Huu ndia de hatematak ia, au saong nau mete au boe.”
33 Basa boe ma Lea nailu bali, de ana bonggi ana tou anak esa. Ana foin, nade Simeon, (fo ndandaan meda nae, ‘hataholi namanene so’), huu ana nae, “MANETUALAIN namanene nae, au saong ta mbali au so. Huu ndia de Ana fee au anak esa bali.”
34 Basa boe ma Lea nailu bali, de ana bonggi ana tou anak esa bali. Ana foin, nade Lewi,c huu ana nae, “No kakanak ia, au dede'ang basan so. Neu ko au saong dei fo nana mba'ak no au, huu au bonggi feen ana tou anak telu so.”
35 Basa boe ma Lea nailu bali, de ana bonggi ana tou anak esa. Ana foin, nade Yahuda (fo ndandaan meda nae, ‘koa-kiok’), huu ana nae, “Oek ia, au nau koa-kio MANETUALAIN!” Basa boe ma Lea ta bonggi so.