28
Boe ma Isak noke Yakob, de feen baba'e-babatik ma nanoli-nafadan nae, “Mamanene neulalau! O boso sao ina ana Kana'an. 2 Tehuu o muni Padan Arama muu, nai ba'i Betuel uman. O muu sao mala to'o Laban ana ina anan esa. 3 Ela Manetualain Mana Koasa Manai Lain fee baba'e-babatik neu o, fo o umbu-anam mala boe lamano'u, ma o numbu-sadum mala dadik hataholi nusak fo ana seli. 4 Manetualain hehelun neu Abraham konda neu o ma o numbu-sadum mala. O maena dae fo Manetualain helu feen neu Abraham so.” 5 Isak kokolak basa leo ndiak, boe ma ana mbo'i Yakob neni Padan Aram neu, nai to'on Laban ma ba'in Betuel uman.Esau sao Ismael ana fe'on
6 Esau namanene nae, Isak fee Yakob baba'e-babatik so, ma ka'in ta bole sao ina ana Kana'an. Ndia boe oo namanene nae, aman nadenu fadin neu sao to'on ana ina anan esa, nai Padan Aram. 7 Basa de Yakob namanene aman ma inan palendan, boe ma ana la'o neni Padan Aram neu.
8 Esau boe oo bubuluk nae, aman ta hii saon nala fo hataholi Kana'an. 9 De ana neni ama ina-huun Ismael neu, boe ma ana sao nala Ismael anan bali, nade Mahalat. Mahalat ndia, Nebayot feton.
Yakob nalame'i neme Betel
10 Boe ma Yakob la'o ela Beer Syeba, fo sangga neni Haran neu. 11 Ledo-eik ledo tesa, ana losa mamanak esa, de ana sunggu neu ndia. Ledo-eik ana sangga sunggu, ana ha'i nala batu esa, de taon dadik kailunu.
12 Le'odaen ndia, nalame'i. Ana nita edak esa huun nai dae, ma mbedan losa lalai. Boe ma Manetualain ata nusa sodan nala konda-hene edak ndia. 13 Nai me'is ndia, Yakob nita MANETUALAIN nambadeik nai ndia boboan, boe ma kokolak nae, “Au ia MANETUALAIN, o ba'im Abraham ma amam Isak Manetualain. Dei fo Au fee dae ia neu o ma o numbu-sadum mala. 14 Dei fo o numbu-sadum mala dedesin sama leo afu. Ma dei fo ala latanggela leni sudi bee leu, nai basa mamanak. Neme o numbu-sadum mala mai, dei fo basa hataholi nusak lai dae-bafok, hambu baba'e-babatik. 15 Masaneda neulalau! O muni sudi bee muu, Au sama-sama ma anea o. Dei fo Au ua falik o muni nusak ia mai. Au ta ela o mesa nggo. Ma dei fo Au tao atetu basa Au hehelung neu o.”
16 Ledo-eik Yakob fo'a, boe ma nae, “Bei fo au bubuluk ae, MANETUALAIN nai ia boe!” 17 Ana bii, de ana dudu'a nae, “Wei! Mamanak ia, tao nala au aong mumulu. Neu ko Manetualain uman nai ia! Naa fo ia lelesu neni nusa sodak neu.”
18 Fo'a fafain, Yakob fo'a, boe ma ana ha'i nala batu fo ana paken dadik kailunu ndia, de nambadedein dadik neu tanda nasanenedak. Basa boe ma ana di'a mina neu batu ndia, de nakaluku-nakatele neu Manetualain. 19 Ana foi mamanak ndia, nade Betel, fo ndandaan nae, ‘Manetualain uman’. (Makahulun mamanak ndia, nade Lus).
20 Basa boe ma Yakob soo nae, “Mete ma Manetualain sama-sama no au, ma nanea au nai au dalang ia, ma Ana fee au nana'ak ma balo'as, 21 losa au fali ua sodak, na, dei fo MANETUALAIN dadik neu au Manetualaing. 22 Batu fo au ambadedein ia, dadik mamana nakaluku-nakatelek neu Manetualain. Ma basa hata fo Manetualain fee au, dei fo au fee falik baba'ek esa neme baba'ek sanahulu mai.”