Ribka kedi nala Isak, fo fee baba'e-babatik neu Yakob
27
Neu faik fo Isak namalasi so, matan kelembuak nalan seli so, de noke ana ka'an, fo ana sue nalan seli nae, “Esau! O mai ia dei!”Esau nataa nae, “Hatina, ama?”
2 Isak nafadan nae, “Leo iak! Au amalasi so. Au ta bubuluk faik bee fo au mate. 3 De muu ha'i mala o manalam mala, fo muu sombu fee au banda fui esa dei. 4 Basa, na muu tunu-nasu malan malada-malada, tungga au hihiing, fo munin mai au. Au u'a basa, bei fo au fee memak o baba'e-babatik. Mete ma au fee basa baba'e-babatik neu o so, mae au mate boe oo, malole.”
5 Basa boe ma Esau kalua neu sombu. Tehuu Ribka boe oo namanene Isak kokolan ndia. 6 Boe ma Ribka neu nafada Yakob nae, “Wei, Yakob! O mamanene neulalau! Isinaak bei fo au amanene amam kokolak no Esau leo iak: 7 ‘O muu sombu mala banda fui esa, fo tunu-nasu malan malada-malada fee au. Mete ma au u'a basa so, bei fo au fee o baba'e-babatik, nai MANETUALAIN matan.’ 8 De o mamanene neulalau! Tungga tebe-tebe au palendang ia. 9 Hatematak ia, o muni ita mamana bi'iae-bi'ilombon nala muu, fo hele mala bi'i-ae tenak ma'ao dua. Basa, na hala sala, fo ha'i mala mbaan nala, ma muni sala mai au. Dei fo au tunu-nasun, tungga amam hihiin. 10 Mete ma au tunu-nasu basa so, na, o muni fee amam fo na'a. Basa, na ana fee o baba'e-babatik dei, bei fo ana mate. No leo ndiak, o ndia hambu baba'e-babatik ndia. Ta ndia o ka'am.”
11 Tehuu Yakob kokolak no inan nae, “Ina! Ndia dede'an, leo iak. Ka'a Esau aon kabuluk, tehuu au momoik! 12 Boso losak ama nafaloe la'e au aong, ana bubuluk memak au kedin. Boe ma ana sumba-soo au!”
13 Tehuu inan nataa nae, “Yakob! O boso masapangga. Fee basan mai au, dei fo au heti! Mete ma amam sumba-soo o, na dei fo au lemba! Hatematak ia, o muu ha'i mala bi'i-aek kala sila leo.”
14 Basa de Yakob neu ha'i nala bi'i-aek kala sila, boe ma ana hala sala, de neni sala neu inan. Ribka tunu-nasun tungga Isak hihiin. 15 Boe ma Ribka neu ha'i nala Esau balo'a neulaun, de fee Yakob pake. 16 Ndia boe oo, mboti Yakob liman ma lesuha'in, pake bi'i-aek ndia bulun. 17 Boe ma ana fee Yakob nana'a malada ndia, ma loti fo ana taon so.
18 De Yakob neni nana'ak ndia fee aman. Ana kokolak nae, “Ama! Au mai so.”
Isak nataa nae, “Heeh? O ia see?”
19 Boe ma Yakob nataa nae, “Au ia, ama ana ka'an, Esau! Au tao tungga hata fo isinaak, ama madenu au. Fo'a fo mu'a leo. Au tunu-nasu ala mbaa, fo au humu alan neme nula dale. Ama na'a fo basa, na fee au baba'e-babatik leo!”
20 Boe ma Isak kokolak nae, “O ia ana seli, maa! Huu o bisa hambu banda lai-lai leo ndiak!”
Yakob nataa nae, “Au hambu ia, huu MANETUALAIN fo ama nakaluku-nakatele neun ndia tulun au.”
21 Boe ma Isak noke Yakob nae, “O mai deka-deka, fo au afaloe sudik o! O ia tetebes Esau, do?”
22 De Yakob neu deka-deka no aman, boe ma aman mulai nafaloen. De ana kokolak nae, “Halak ia, sama leo Yakob halan! Tehuu limak ia, Esau liman.” 23 Tehuu Isak ta bubuluk Yakob ndindia, huu liman kabuluk sama leo Esau. Tehuu neu faik fo ana sangga fee baba'e-babatik neu Yakob, 24 ana natane seluk bali nae, “O ia, tetebes Esau, do?”
Yakob nataa nae, “Tetebes, ama!”
25 Basa boe ma Isak kokolak nae, “Loo mbaa la sila mai, fo au sangga u'a. Basa bei fo au fee o baba'e-babatik.” Boe ma Yakob loo mbaa neu ndia, ma ana fee anggol oek fo ninu. 26 Basa boe ma aman kokolak nae, “Ana, ei! Deka-deka mai ia, fo idu au.”
27 Ledo-eik Yakob neu deka-deka de idun, boe ma Isak hae nala Esau balo'an boon. Boe ma ana kokolak fee baba'e-babatik neu Yakob nae,
“Au anang boon, sama leo moo na'u fo MANETUALAIN fee baba'e-babatik so.
28 Ela Manetualain nakonda dinis neme lalai mai,
fo tao o osim mala, dadik dae mamina!
Ela Ana fee o hade makadotok,
ma anggol boak henu-henuk.
29 Hataholi nusak kala dadik neu o atam,
ma leo la lakatele fee hadak neu o.
O palenda basa o tolanoom mala,
ma ala sendek leu o matam.
See sumba-soo o, na, sila boe oo hambu sumba-sook.
Ma see fee o baba'e-babatik, na, sila boe oo hambu baba'e-babatik.”
Esau fali, ma noke Isak fee ndia baba'e-babatik boe
30 Ledo-eik Isak fee baba'e-babatik nate'e, ma Yakob bei fo kalua la'o ela aman, boe ma ka'an Esau fali neni banda fo ana sombu nalak. 31 Boe ma neu tunu-nasu, de neni fee aman. Ana kokolak nae, “Ama! Fo'a fo mu'a leo. Au tunu-nasu ala mbaa, fo au sombu alak so. Ama na'a basa, na, fee au baba'e-babatik leo.”
32 Boe ma Isak namanggonggoak, de natane nae, “Heeh? O ia, see bali?”
Esau nataa nae, “Au ia, Esau! Ama ana ka'an.”
33 Boe ma Isak mulai dele, de natane nae, “Mete ma leo ndiak, na, isinaak see ndia neni fee au mbaa, de au u'a so? Basa de au feen baba'e-babatik so. Ma ta bisa fe'a heni baba'e-babatik ndia bali.”
34 Esau namanene aman kokolak leo ndiak, boe ma dalen hedis, de namatani nakaleleu ma kokolak natingga nae, “Awii! Ama! Fee au baba'e-babatik boe, ama!”
35 Tehuu Isak nae, “O fadim mai kedi nala au, ma namana'o nala o baba'e-babatim so.”
36 Boe ma Esau kokolak nae, “Ana kedi nala au la'i dua so. Makahulun ana kedi nala au haak ka'ang. Hatematak ia ana kedi nala au baba'e-babating bali. Nandaa ndia nade, ‘Yakob’ (fo ndandaan nae, ‘to'u ei tingga deak’, ma ndandaa fe'en nae, ‘mana kedik’). Tehuu ama bei hambu baba'e-babatik fe'ek bali fee au, do?”
37 Isak nataa nae, “Au so'u alan dadik o malanggam so. Ma basa ndia tolanoon nala dadik ndia atan so. Au feen hade makadotok, ma anggol henu-henuk so. De ana, ei! Hatematak ia, bei hambu baba'e-babatik hata bali, fo au bisa fee o?”
38 Esau namanene leo ndiak, boe ma nambue kokoe nakandoo aman nae, “Ama baba'e-babatin kada esak, do? Neu ko ama bei bisa sangga fee au baba'e-babatik fe'ek. Mae kada baba'e-babatik kadi'ik boe oo, malole!” Boe ma ana mulai namatani bali.
39 Basa boe ma Isak nataa nae,
“O sodam dei fo dook neme osi dae mamina mai,
huu ta hambu dinis konda neme lalai mai, fo tao nakataba dae.
40 O tafam dei fo tao o masoda.
Tehuu mae leo bee boe oo, o dadik ata neu o fadim.
Kada mete ma o bisa laban ndia, na, bei fo o makambo'ik muma ndia liman mai.”
Ribka nadenu Yakob nalai
41 Esau binci Yakob nalan seli, huu fadin namoa nala ndia baba'e-babatin. Tehuu ana dudu'a nae, “Ta dook bali, te ama mate. De kada mahani. Dei fo basa bebe'en, na, au tao isan!”
42-43 Ledo-eik Ribka nameda Esau dala dudu'an, boe ma ana noke Yakob, de nae, “O mamanene neulalau! O ka'am sangga bala dale hedin, fo nau tao nisa o. De o malai lai-lai muni to'o Laban muu nai Haran. 44 Leo mala dook faa nai ele, losa o ka'am ta namanasa o so bali. 45 Mete ma ana nafalende heni hata fo o taok neu ndia so, dei fo au adenu hataholi leu loke falik o. Huu au ta nau au anang dua sala, mopo nai faik esa.”
46 Boe ma Ribka kokolak no Isak nae, “Au mbela ua Esau saon hataholi Het asa so! Mete ma Yakob sao nala ina ana Het, na, malolenak au mate leo.”