Isak kedi nala mane Abimelek
26
La'i esa, hambu fai ndoes ana seli nai nusak ndia, sama leo fai ndoes neu lelek fo Abraham bei nasoda. De Isak neu noke nakambo'ik neme Abimelek, fo hataholi Filistin manen, suek ana bisa leo nai Gerar. 2 Ana tao leo ndiak, huu MANETUALAIN natudu aon neun so nae, “O boso muni Masir muu. Dei fo au atudu o mamana fe'ek. 3-4 Mete ma o leo tataak nai mamanak ndia, na, dei fo Au sama-sama ua o, ma fee o baba'e-babatik mata-matak. Dei fo Au tao o numbu-sadum mala boe lamano'u, sama leo nduuk malai lalai. Ma Au fee o, ma o numbu-sadum mala, basa dae baba'ek ia no nusan. Neme o numbu-sadum mala mai, dei fo basa hataholi nusak kala malai dae-bafok, hambu baba'e-babatik. No leo ndiak, Au tao atetu Au hehelung neu o amam, Abraham. 5 Au tao basa ia, huu o amam tungga Au hihiing, Au palendang ma Au heti-heung so.” 6 De Isak leo tataak nai Gerar.7 Ribka ndia mana'a hiak. De ledo-eik hataholi malai ndia litan, ala latatanek la'e-neu ndia. Tehuu Isak nataa nae, “Ribka ndia, au fetong.” Ana bii, mete ma ana manaku nae ndia saon, na, dei fo hataholi sila tao lisan, fo ala ha'i lala Ribka. 8 Isak leo doo-doo neme ele, boe ma la'i esa, manek titilo neme jendela mai, te ana nita Isak no Ribka, laholuk ma laiduk. 9 Boe ma ana nadenu hataholi la leu loke lala Isak, de ana kasilanggan nae, “Isak! Au bubuluk no teteben so, inak ndia, memak o saom! Tehuu hatina de o mae, o fadim?”
Boe ma Isak nataa nae, “Leo iak, ama! Au bii, mete ma au ae, au saong ndia, boso losak dei fo hataholi la tao lisa au.”
10 Boe ma manek nae, “Mete ma hambu hataholi nai ia, sunggu no o saom, na, neu ko o soli salak neu ai! Hatina de o tao leo ndiak neu ai?”
11 Basa boe ma Abimelek fee nasanenedak no hala belak neu lau-inggun nala nae, “Ei basa nggei masanenedak neulalau! Ei see ndia nambalani babalik hataholi ia, do saon, na, dei fo au huku akamaten.”
Ala lasisimbo bafak la'e-neu oe dolu
12 Faik ndia, Isak sele-nggali nai nusak ndia boe. De ana hambu falik buna-boan la'i 100, huu MANETUALAIN feen baba'e-babatik. 13 Ndia su'in tamba lakandoo, losa namasu'i nalan seli. 14 Ndia sapin ma bi'iae-bi'ilombon nala tamba lamano'u. Ndia atan nala no'uk boe. Losa hataholi Filistin asa dale hedi.
15 Makahulun Isak aman Abraham asa, kali oe dolu no'uk so. Tehuu hatematak ia, hataholi Filistin asa leu lakadofu basa oe dolu la sila.
16 Boe ma mane Abimelek kokolak no Isak nae, “Isak! Malolenak o la'o ela nusak ia leo. Huu o koasam lena heni ai so.”
17 Basa boe ma Isak heok neme ndia mai, de neu leo neme Gerar bafan. 18 Boe ma ana kali seluk oe dolu la bali, fo ala lakadofuk kala sila so. Ma ana foi oe dolu la sila, tungga nadek fo aman foi sala so.
19 Neu faik fo Isak atan nala kali oe dolu nai Gerar bafan ndia, boe ma ala kali la'e oe matan, de nasambumbulak deak mai. 20 Tehuu mana hoo Gerar asa, lasisimbo bafak lo Isak mana hoon nala, huu oe ndia. Ala lae, “Ia, ai oen!” Huu ndia de Isak foi oe dolu ndia, nade Esek, fo ndandaan nae, ‘lasisimbo bafak’.
21 Basa de Isak hataholin nala, kali oe dolu esa bali. Tehuu ala lahuu bali, huu oe dolu ndia. Huu ndia de Isak foi oe dolu ndia nade, Sitna, (fo ndandaan ‘lahuu’).
22 Basa boe ma ana la'o ela mamanak ndia, de ana kali oe dolu fe'ek esa bali. Oek ia, ala ta lasisimbo bafak. Huu ndia de Isak foi oe dolu ndia, nade Rehobot, fo ndandaan nae, ‘mamana loak’. Ma ana kokolak nae, “Hatematak ia, Manetualain fee ita leo nai dae loak. Boe ma nai ia, bei fo ita bisa boe tamano'u.”
23 Neme ndia mai, boe ma Isak asa la'o bali, fo sangga leu leo nai Beer Syeba. 24 Le'odaen ndia, boe ma MANETUALAIN natudu aon neu ndia, ma kokolak nae, “Isak! Au ia, o amam Abraham Manetualain. De o boso bii, huu Au anea o. Dei fo Au fee o baba'a-babatik. Ma o numbu-sadum mala, dei fo boe lamano'u. Au tao leo iak, huu Au hehelung neu o amam.”
25 Boe ma Isak nakatotodok batu, de nambadedei mei tunu-hotuk nai ndia. Boe ma noke makasi neu MANETUALAIN nai mamanak ndia. Ana leo neme ndia, ma hataholin nala mulai kali oe dolu bali.
Mane Abimelek no Isak mole
26 Faik ndia, mane Abimelek neme Gerar mai. Ana sama-sama no nonoon Ahusat, ma ndia malangga musun, Fikol, mai latonggo lo Isak. 27 Boe ma Isak natane nae, “Ama manek! Makahulun ei husi kalua heni ai so. De hatematak ia, ei sangga mai tao hata bali?”
28 Boe ma ala lataa lae, “Leo iak! Hatematak ia ai bubuluk mae, Manetualain nanea o. Huu ndia de ai dudu'a mae, malolenak ita dua nggata tao heheluk leo iak: o soo mae, 29 ei ta tao manggalauk neu ai, sama leo ai ta tao manggalauk neu ei boe. Memak ai dalen malole neu ei. Huu ndia de fai maneuk ei kalua no mole neme ai daen mai. Ai bubuluk tetebes, MANETUALAIN ndia fee baba'e-babatik neu ei.”
30 Boe ma Isak tao feta fee sala, de basa sala la'a-linu no'u. 31 Fo'a fafain, boe ma ala lasook. Basa de Isak mbo'i sala, de ala la'o lo mole.
32 Faik ndia, Isak hataholi mana tao uen nala, mai lafada la'e-neu ala kali oe dolu lae, “Ama! Ai hambu oe so.” 33 Boe ma Isak foi oe dolu ndia nade, Syeba, fo ndandaan nae, ‘soo’. De ala foi kota ndia, nade Beer Syeba,a losa hatematak ia.
Esau sao inak dua leme leo fe'ek mai