Abraham sao seluk
25
Abraham sao seluk no inak esa, nade Ketura. 2 Ketura bonggi feen anak kala, sila: Simran, Yoksan, Medan, Midian, Isbak, ma Sua. 3 Yoksan anan nala, Seba no Dedan. Dedan numbu-sadun nala sila, hataholi Asyur, hataholi Letus, ma hataholi Leum. 4 Midian anan nala, sila: Efa, Efer, Henok, Abida ma Eldaa. Basa sala Ketura numbu-sadun.5-6 Neu faik fo Abraham bei nasoda, ana ba'e fee Hagar no Ketura anan nala, esa-esak no ndia hata-heton so. Basa de nadenu sala, fo leu leo lai dae Kana'an boboan dulu, fo suek ala dook leme anan Isak mai. Tehuu basa ndia hata pusakan nala, feen neu Isak.
Abraham maten
7-8 Abraham maten teuk 175 so. 9-10 Boe ma anan Isak no Ismael latoin nai lua Makpela fo mana dekak no Mamre. Makahulun Abraham hasa osi ndia neme hataholi Het, fo ndia Sohar anan, Efron. Makahulun ala latoi Sara neme luak ndia boe. 11 Abraham mate, boe ma Manetualain fee baba'e-babatik neu Isak, losa ana nasoda no mole-dame. Faik ndia, Isak leo dekak no oe dolu, nade Beer Lahai Roi.
Ismael numbu-sadun nala
12 Ismael tutuin. Ndia ndia, Abraham no sao mulin Hagar anan. Hagar ndia, Sara atan neme Masir mai. 13-16 Ismael ana tou anan 12. Sila naden nala betunggak neme ka'ak mai losa mulik, sila: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, ma Kedma. Kakanak kala sila, dadik bei-ba'i neme hataholi nusak 12, esa-esak no ndia nusa hehelin. Ala foi nusak kala sila, esa-esak tungga sila bei-ba'in nala naden.
17 Ismael maten teuk 137 so. 18 Tehuu ndia numbu-sadun nala, esa musu no esa. Boe ma ala leo latanggela mulai neme Hawila losa Syur, fo natoo no nusa Masir, nakandoo losa Asyur.
Esau no Yakob
19 Abraham anan Isak tutuin. 20 Neu faik fo Isak sao no Ribka, Isak teuk 40. Ribka aman, Betuel ma naan, Laban. Sila ndia, hataholi Aram leme Padan Aram mai.a
21 Ribka ta hambu anak. Huu ndia de Isak hule-haladoi neu MANETUALAIN, fo noke Ana soi Ribka ana manan. MANETUALAIN namanene huhule-haladoin, boe ma Ribka nailu. 22 Naa te ana nailu kakanak dua. Tehuu kakanak kala sila, lambue lafitik lakandoo lai inan tein dale. Boe ma Ribka natane nai dalen nae, “Hatina de kakana kaduak kala ia, leo iak?” Boe ma natane MANETUALAIN.
23 De MANETUALAIN nataa nae,
“Nai O teim dale, hambu hataholi nusak dua, dei fo lamusuk lakandoo.
Dei fo fadik balakain lena heni ka'ak.
Ma ka'ak tao ues fee fadin.”
24 Ledo-eik fain losa, boe ma Ribka bonggi nala ana tou anak kaduak. 25 Ana ka'ak aon mbilas, ma basa ao-inan kabuluk. Huu ndia de ala foin nade, Esau (liin hihii sama leo l, fo ndandaan nae ‘kabuluk’).
26 Basa, bei fo fadin kalua. Tehuu ana to'u ka'an ei tingga dean. Huu ndia de ala foin nade, Yakob (liin hihii sama leo dede'a de'ek fe'ek, fo ndandaan nae, ‘ei tingga deak’). Neu faik fo bonggi dua sala, Isak teuk 60 so.
Yakob kedi nala Esau haak ka'an
27 Neu faik fo kakana kaduak kala sila ina-huu mai, Esau dadik mana sombu fo ana seli. Ana nahiik leo nai nula. Tehuu Yakob ndia, mana neneek, ma nahiik nahani kada uma. 28 Isak hihiin na'a mbaa banda fui. Huu ndia de ana sue nalan seli neu Esau. Tehuu Ribka sue nalan seli neu Yakob.
29 La'i esa, ledo-eik Yakob nasu fufue, Esau bei fo sombu fali. Ana manggu ma ndoe nalan seli. 30 Boe ma nafada Yakob nae, “Fadi! Fee o fufue mbilam nana nasuk nai ulek ndia faa dei, fo au u'a! Huu au ndoe alan seli.” (Huu ndia de loken lae, Edom, liin hihii sama leo dede'a de'ek fe'ek, ndandaan nae ‘mbilas’.)
31 Boe ma Yakob nataa nae, “Malole, ka'a. Tehuu fee au, ka'a haak ka'an dei!”b
32 Esau nataa nae, “Sokolaa haak ka'ak ndia! O soan leo. Au ndoe alan seli ia so. O sode lai-lai fufue ndia, fo munin mai leo, te au hii u'a so.”
33 Tehuu Yakob kokolak bali nae, “Ka'a mahani dei! Ka'a soo dei mae, ka'a fee haak ndia neu au so.” Boe ma Esau soo leo ndiak. 34 Basa de Yakob sode feen fufue nana nasuk ndia, ma loti. Esau na'a-ninu basa, boe ma ana fo'a la'o.
No leo ndiak, Esau fee heni hiak, ndia haak ka'an.