Ala sangga fee Isak inak, fo ana sao
24
Abraham teun naluk losa namalasi nalan seli so. Ma MANETUALAIN nanea neulalaun, boe ma Ana feen nasoda no soda-molek. 2-3 Abraham hataholi namahehelen esa, fo nakaneni basa ndia hata-heton. La'i esa, Abraham noke nalan nae, “Mamanene neulalau! Au oke o soo matea munik MANETUALAIN naden. Fo ndia Manetualain mana nakadadadik lalai ma dae-bafok. Mae, o ta bole ha'i ina anak neme hataholi Kana'an asa mai, fo makasasaok kana no au anang Isak. 4 Tehuu o musi muni au nusa heheling muu, nai au bobonggi nggala. O sangga ina anak esa nai ndia, fo takasasaok kana no au anang.”5 Basa boe ma ata ndia natane Abraham nae, “Malole, Ama! Tehuu leo bee, mete ma ina anak ndia ta nau tungga ia mai? Mete ma leo ndiak, na, au musi ua ama anan, fo neu sao nai ele, do leo beek?”
6 Abraham nataa nae, “O masanenedak neulalau! Mae talo bee boe oo, o ta bole mua au anang neni ele neu! 7 Masanenedak huu MANETUALAIN to'u koasa nai lalai, noo au kalua uma au nusa heheling mai, de noo au losa dae ia. Ana mba'a heheluk no au nae, ‘Dei fo Au fee basa dae ia neu o numbu-sadum mala.’ De boso makandaa! O muu leo. Huu dei fo Manetualain nadenu ata nusa sodan mai soi dalak fee o, fo o bisa matonggo mua ina anak ndia, fo dei fo dadik au anang saon. 8 Mete ma ina anak ndia ta nau tungga o ia mai, na, o makambo'ik muma soo ia mai. Mae leo bee boe oo, o boso mua au anang ele neu.”
9 De ata ndia soo neu Abraham nae, dei fo ana tao tungga basa Abraham hihiin.
10 Boe ma ata ndia hele nala banda onta sanahulu. Basa de ana fua bua malole mata-matak kala leu banda onta la sila. Boe ma ana la'o neni Nahor kotan neu nai Mesopotamia.b
11 Mate'en, ata ndia losa kota ndia. Boe ma ana fee banda ontan nala hahae leme kota bifin, dekak no oe dolu esa. Faik ndia ledo bobok so, nandaa no ina anak kala mai dolu oe nai oe dolu ndia. 12 Boe ma ata ndia hule-haladoi nae, “MANETUALAIN, au malanggang Abraham Manetualain. Tulun soi dalak, fo au lala'ong ia, hambu buna-boa malole. Matudu Manetualain dale malolen neu au malanggang, ma masaneda ndia hehelun neu au. De ela au atonggo ua inak, fo sangga dadik Isak saon. 13 Manetualain, au ambadeik nai oe dolu ia boboan. Ma ina anak kala leme kota mai, dolu oe nai ia. 14 De au oke leo iak: mete ma au kokolak ua ina anak esa ae, ‘Ina! Tulun makonda o ule oem, fo au inu oe faa dei.’ Mete ma ana nataa nae, ‘Ama minu leo! Ma dei fo au fee ama banda ontan nala linu boe.’ Ndia dadik tanda nae, ina anak ndia fo Manetualain hele nalan dadik Isak saon so! No tanda leo ndiak, au bisa bubuluk ae, Manetualain natudu dale malolen neu au malanggang Abraham so.”
Abraham atan natonggo no ina anak Ribka
15-16 Ana bei ta hule-haladoi nate'e, te ina anak esa mai. Nade Ribka. Ndia ndia, Abraham fadin Nahor no saon Milka, umbun. Ribka aman, nade Betuel. Ribka ndia, mana'a hiak ma bei ao tema. Ana konda neni oe dolu ndia neu, boe ma isi oe neni ule oen, de ana fali lain neu.
17 Ledo-eik Ribka losa lain, boe ma Abraham atan nalai neni ndia neu. De noke nae, “Ina. Tulun fee au inu faa dei.”
18 Ina anak ndia nataa nae, “Minu leo, to'o!” Boe ma ana nakonda lai-lai ndia ule oen, de fee ata ndia ninu. 19 Ninu basa boe ma, ina anak ndia nae, “Ela au ha'i oe fee to'o banda ontan nala linu losa lakabete.” 20 Boe ma ana neu mbo'a oe elak neu banda la mamana nininun. De ana konda-hene neu ha'i oe neme oe dolu ndia, fo ana fee basa banda onta la linu, losa lakabete. 21 Abraham atan nambadeik nee-nee, fo pasak matan neu ina anak ndia tataon. Ana dudu'a nae, “Ina anak ia, fo ndia Manetualain helek, do?”
22 Basa onta la linu losa lakabete. Boe ma ata ndia ha'i nala ndeli idu lilo mbilas esa, ma liti lilo mbilas pasan esa, de ana odun neu ina anak ndia liman dua sala.c 23 Boe ma ata ndia natane nae, “Ina aman, nade see? Mete ma bisa, na, au sunggu tataak nai ina aman uman.”
24 Ina anak ndia nataa nae, “Au amang nade Betuel. Au ba'ing Nahor, ma au being, Milka. 25 Nai ai uman hambu mamana susungguk dai neu to'o sala. Ma hambu na'u no'uk fo to'o bandan nala la'a.”
26 Ata ndia nakatele, de nakaluku-nakatele neu MANETUALAIN. 27 Boe ma ana kokolak nae, “Koa-kiok neu Manetualain! Manetualain soi dalak fee au so, losa au atonggo tutik ua malangga Abraham bobonggin nai ia so. No leo ndiak, Manetualain natudu dale malolen neu au malanggang Abraham so, ma tao natetu hehelun neu au so.”
28 Boe ma ina anak ndia nalai fali lai-lai, de tui basa uma isin nala, hata fo mana dadik ndia so. 29-30 Ribka naan, nade Laban. Ledo-eik ana nita bua lilo-mbilas ndia, ma namanene Ribka tutuin, boe ma Laban nalai lai-lai deak neu, de neu natonggo no ata ndia, fo bei nambadeik no banda ontan nala, dekak no oe dolu ndia. 31 Boe ma Laban kokolak nae, “To'o! MANETUALAIN noo to'o losa ia no sodak so. De boso mambadeik muu deak ia! Mai fo teni ai uman teu. Ai sadia mala kama so. Nana'ak soa-neu to'o banda ontan nala boe oo makadotok.”
Abraham atan neu natane Ribka
32 Basa boe ma Abraham atan tungga Laban, de maso neni Betuel uman neu. Boe ma Laban asa tulun lakonda bua fufuak kala, leme banda onta la lain mai. Ala fee banda onta la la'a na'u. Ala leni oe boe, fo ata ndia no hataholin nala safe ei nala. 33 Ledo-eik ala sadia nana'ak neu mei, boe ma ata ndia nae, “Ai sangga mi'a, tehuu au oke palamisi fo sangga afada dede'ak esa dei.”
Laban nataa nae, “To'o, kokolak leo.”
34 Ata ndia nae, “Au ia, ei ba'im Abraham atan. 35 MANETUALAIN fee baba'e-babatik makadotok neu au malanggang so, losa ana namasu'i nalan seli. Manetualain feen lilo mbilas-lilo fulak, ata touk ma inak, ma banda makadotok so, fo ndia: sapi, banda onta, banda keledei, ma bi'iae-bi'ilombo. 36 Neu faik fo au malangga nggala sao tou-sao inak lamalasi so, boe ma ina Sara bonggi fee malangga Abraham ana tou anak esa. Dei fo ndia simbo basa malangga Abraham pusakan nala. 37 De malangga Abraham nadenu au soo ae, ‘O ta bole ha'i ina ana Kana'an, fo makasasaok kana no au anang Isak. 38 Tehuu o musi ha'i ina anak neme au bobonggi heheling mai, dadik ndia saon.’
39 Boe ma au atane au malanggang ae, ‘Mete ma ina anak ndia, ta nau tungga au, na, leo beek?’
40 Au malanggang nataa nae, ‘MANETUALAIN fo au tungga taa-taa Ndia hihiin, dei fo nadenu Ndia ata nusa sodan mai soi dalak fee o, fo suek o bisa hambu ina anak neme au bobonggi heheling mai, fo dadik au anang saon. 41 Tehuu mete ma au bobonggi nggala, ta nau mbo'i ina anak ia mai, na, o makambo'ik muma soo ndia mai.’
42 De isinaak au losa oe dolu ndia, au hule-haladoi nai au daleng ae, ‘MANETUALAIN, au malanggang Abraham Manetualain. Tulun soi dalak, fo suek au lala'ong ia, hambu buna-boa malole. Ela au atonggo ua ina anak, fo sangga dadik Isak saon. 43 Manetualain, au ambadeik nai oe dolu ia. Ma ina anak kala leme kota mai ha'i oe nai ia. De au oke leo iak: mete ma au kokolak ua ina anak esa ae, “Ina! Tulun makonda o ule oem, fo fee au inu oe faa dei.” 44 Mete ma ndia nataa nae, “Ama minu leo! Ma dei fo au fee ama banda ontan nala linu boe.” Ndia dadik tanda nae, ina anak ndia fo Manetualain hele nalan so, dadik neu au malangga kadi'ing saon!’
45 Au bei ta hule-haladoi ate'e, te ina anak Ribka mai so, neni ndia ule oen, fo dolu oe nai oe dolu ndia. Ana hene losa lain, boe ma au oke ae, ‘Ina, fee au inu faa dei.’ 46 Boe ma nakonda ndia ule oen lai-lai, de nae, ‘To'o minu leo! Ma dei fo au fee to'o banda ontan nala linu boe.’ De au inu, ma au banda onta nggala linu boe.
47 Boe ma au atane ae, ‘Ina aman, nade see?’
Ana nataa nae, ‘Au amang, nade Betuel. Au ba'ing Nahor ma au being Milka.’ Basa boe ma au papaken ndeli neu idun, ma odu liti lilo-mbilas pasan esa neu liman.
48 Boe ma au akatele fo akaluku-akatele neu Manetualain ae, ‘Koa-kio Manetualain! Manetualain soi dalak fee au, losa au atonggo tutik ua malangga Abraham bobonggin nai ia so. Ma au atonggo tutik ua ina anak fo sangga dadik Isak saon.’ 49 De hatematak ia, mete ma ama sala nau matudu susuem neu au malanggang Abraham, na, mafada au no manggaledok. Ma mete ma ta boe oo, mafada no manggaledok. Fo suek au bubuluk au musi tao hata.”
Ribka bobonggin nala simbok natane inak ndia
50 Ata ndia kokolak nate'e, boe ma Laban no Betuel lataa lae, “Mete ma MANETUALAIN heti nalan leo ndiak so, na, ai sangga mae leo bee bali. 51 Ribka nai ia. Moke malan, fo muan neni ele neu leo. Ela ana dadik ba'i Abraham feto-feun, tungga hata fo MANETUALAIN hetin so.”
52 Abraham atan namanene leo ndiak, boe ma nakatele losa dae, de noke makasi neu MANETUALAIN. 53 Boe ma ana ha'i kalua bua lilo mbilas-lilo fulak, ma balo'a malole la, fo feen neu Ribka. Ndia boe oo fee Ribka naan ma inan bua mabeli la. 54 Basa boe ma Abraham atan no hataholin nala la'a feta. De ala sunggu leme ndia. Fo'a fafain, ala fo'a, de ata ndia nafada maumak nae, “Au oke makambo'ik, fo mete ma bisa, na, hatematak ia, ai sangga fali mini au malanggan miu.”
55 Tehuu Ribka naan ma inan lae, “Sangga la'o lai-lai tao hata? Ela Ribka leo no ai faik sanahulu dei. Basa, na, mian leo.”
56 Tehuu ata ndia nataa nae, “Awii! Boso makalelee au! Huu MANETUALAIN tulun au so, losa au atonggo ua malangga kadi'ik saon so. De ina sala mbo'i ai, fo ai fali miu mafada malanggan dei.” 57 Boe ma ala lataa lae, “Leo iak! Mai fo tatane aon Ribka. Ndia hihiin leo beek?”
58 Boe ma ala loken, de latanen lae, “Ribka! Hatematak ia, neme kada o mai. O nau tungga tutik mua hataholi la ia, do leo beek?”
Boe ma ina anak ndia nataa nae, “Au nau tungga.”
Ala dode-diku--Isak no Ribka sao
59-60 Boe ma ala mbo'i Ribka, ma ndia ata inan fo nakaneni ndia neme kadi'i anan mai, fo leu lo Abraham atan nala. Boe ma ala kokolak fee baba'e-babatik neu Ribka lae, “Ribka! Ai mamahena Manetualain fee o bonggi mala makadotok, fo o numbu-sadum mala dei fo dadik lifu-lifuk. Ma ai boe oo mamahena, fo o numbu-sadum mala senggi musu la!”
61 Basa boe ma Ribka no ata inan nala lafafa'u balo'an nala, de ala sa'e banda onta, fo la'o tutik lo Abraham atan nala.
62 Isak leo nai dae Negeb. Faik ndia, bei fo ana fali neme oe dolu Beer Lahai Roi mai. 63 Ledo bobok esa, ana kalua neme tenda mai, fo lala'ok sangga ani. Ana botik matan, boe ma nita banda onta la mai.
64 Ledo-eik Ribka nita Isak, boe ma ana konda lai-lai neme ndia banda ontan mai. 65 De natane Abraham atan nae, “To'o! Touk fo mana la'ok neme ele mai ndia, see ndia?”
Ata ndia nataa nae, “Au malangga kadi'ing ndindia.” Boe ma Ribka ha'i nala lafa anan, de ana lalaan neu matan.