Mate Sara, de Abraham natoin
23
1-2 Mate Sara neu teun 127 so. Neu faik fo ana mate ndia, Abraham asa leo nai nggolo Kiryat-Arba (fo ndia Hebron), nai dae Kana'an. Abraham namatani nakaleleu, ma be'e saon fo mana matek so.3 Boe ma Abraham neu natonggo no hataholi Het asa. De ana kokolak nae, 4 “Au ia kada mana taik nai ei laladam mala. Au daeng taa, fo atoi au saong. De mete ma ei nau, na, fee au hasa ala ei daem faa, fo suek au atoin neu ndia.”
5 Ala lataa lae, 6 “Leo iak, Ama! Doo basa ia, ai tao ama, sama leo ai aman fo ai fee hadak tebe-tebe. De ama hele leo, dae bee ndia neulaun seli, fo nandaa no ama hihiin. Kada ai simbo no malole.”
7 Boe ma Abraham nambadeik, de nakatele fo fee hadak neu madaek, fo hataholi Het asa. 8 Boe ma nae, “Mete ma ei simbok au kokolang isinaak, na, au oke tulun ei fo kokolak mia tou lasi Sohar ana tou anan, Efron. 9 Moken, mete ma bisa, na, ana se'o ndia luan, nade Makpela, fo manai ndia osin bifin. Ana noke belin sudi hida boe oo, au bae. Au nau bae ketu belin nai ei basa nggei matan, fo suek dae ndia dadik au ena heheling. Au sangga taon dadik ai mamana laten.”
10 Faik ndia, Efron nanggatuuk tungga no hataholi Het asa. De namanene Abraham kokolan ndia. Boe ma nambadeik, de nataa Abraham neu basa lasik kala matan nae, 11 “Boso leo ndiak, ama! Kada leo iak. Au fee osi ndia, ma lua Makpela neu ama. Ama muu matoi ama saom neu ndia leo. Au fee dae ndia neu ama nai au hataholi nggala matan. Fo suek basa sala dadik sakasii!”
12 Boe ma Abraham nakatele bali neu hataholi Het asa matan nala. 13 De ana kokolak no Efron nae, “Leo ndiak boe oo neulauk, tehuu ei basa nggei mamanene au kokolang dei. Au nau tifa ketu dae ndia, fo suek au atoi au hataholi nggala leu ndia.”
14-15 Efron nataa nae, “Dae ndia belin kada doi lilo fulak 400. Soa hata ita dua nggata, esa kokoe esa neu-mai, no doik faa ndia? Ama muu matoi saom neu ndia leo.”
16 Abraham nakaheik no dae ndia belin, tungga Efron kokolan. De nai basa hataholi Het matan fo mana dadik sakasii nai ndia, ana hingga doi lilo fulak 400, de baen neu Efron.
17-19 De no leo ndiak, Abraham hambu Efron daen, dadik ndia ena hehelin. Fo ndia dae manai Makpela, dekak no Mamre (ndia Hebron). Ana tifa ketu dae ndia no osin, ma luan no basa ai la. Basa lasi-lasi hataholi Het dadik sakasii lae, dae ndia no basa isin nala, Abraham ena hehelin.