Manetualain nadenu Abraham tao Isak dadik tunu-hotuk
22
Ta dook bali, boe ma Manetualain uku-sudi Abraham, fo sangga nita ndia namanene neu Manetualain, do taa. Boe ma Manetualain noken nae, “Abraham!”Boe ma Ana nataa nae, “Ia, Manetualain.”
2 Basa de Manetualain nadenun nae, “Mamanene neulalau! Ha'i mala o ana kisam, fo o sue malan seli. Muan neni dae Moria neu, fo o taon dadik tunu-hotuk fee Au. Losa ele, bei fo Au atudu o mamanak nai letek esa.”
3 Neu fo'a fafain, boe ma Abraham tati ai nana'a ha'i. De ana hehengge ai sila, boe ma ana fuan neu banda keledei lain. Basa boe ma ndia no Isak, ma atan dua, la'o leni mamanak fo Manetualain nafada ndia so. 4 Ala la'o-la'o, boe ma neu binesan, Abraham nita mamanak ndia neme dook mai. 5 Ana nafada ata kaduak kala sila nae, “Ei dua nggei mahani tataak nai ia, mia banda keledei ia, baa! Au ua au anang sangga mini lain ele miu, fo sangga makaluku-makatele neu Manetualain. Basa, bei fo ai fali ia mai bali.”
6 Boe ma Abraham ha'i nala ai nana'a ha'i soa-neu tunu-hotuk sila, fo fuan neu Isak alun. Ma ndia mesak kana neni dopek, ma ha'i su'uk mana mbilak. Ledo-eik dua sala la'o sama-sama, 7 boe ma Isak noke aman nae, “Ama!”
Aman nataa nae, “Hata, Isak?”
Isak natane nae, “Ama. Ita sangga tao tunu-hotuk. Nai ia hambu ai, ma ha'i so. Tehuu bi'i-lombo ana fo ita paken dadik tunu-hotuk, nai bee?”
8 Abraham nataa nae, “Ana, ei! Dei fo Manetualain mesak kana fee Ndia bi'i-lombo anan fo paken dadik tunu-hotuk.”
Boe ma dua sala nda'e lakandoo. 9 Ledo-eik ala losa mamanak fo Manetualain nafadak ndia so, boe ma Abraham nakatotodok batu, fo tao mei mamana tunu-hotuk. Basa de ana heti ai nana'a ha'i leu mei batu ndia lain. Boe ma ana mba'a anan, de nakalelenggak kana neu ai nana'a ha'i lain. 10 Boe ma ana lesu nala dopek, fo sangga hala anan. 11 Tehuu kada nggengge neuk, MANETUALAIN atan nanggou neme lalai mai nae, “Wei! Abraham! Mahani dei!”
Boe ma ana nataa nae, “Hatina, Manetualain?”
12 Boe ma halak ndia nae, “Boso tao misa kakanak ndia! Boso tao hata-hata neun! Hatematak ia Au bubuluk so ae, o tebe-tebe tungga Manetualain hihiin, huu o mahehele fee o ana kisam fo dadik tunu-hotuk neu Manetualain.”
13 Basa boe ma Abraham nita bi'i-lombo mane esa, susulan kai nai ai anak esa ba'en nala. Boe ma neu ha'i tutik bi'i-lombo ndia, de ana tunun dadik tunu-hotuk fee Manetualain, nggati ndia anan. 14 De Abraham foi mamanak ndia nade, ‘Dei fo Manetualain sadia hata fo paluu.’a Huu ndia de losa hatematak ia, hataholi kokolak lae, “Nai MANETUALAIN leten ndia lain, dei fo Ana sadia fee hata fo paluu.”
15 Basa boe ma Manetualain atan nanggou seluk bali neme lalai mai nae, 16 “MANETUALAIN mesak kana nae, ‘Au soo pake Au nade heheling, leo iak: o mahehele o ana kisam, fo dadik tunu-hotuk fee Au. Huu ndia de 17 dei fo Au fee baba'e-babatik makadotok neu o mua o numbu-sadum mala. Dei fo ala tamba lamano'u losa ta hambu hataholi bisa hingga nala sala, sama leo nduuk malai lalai, ma salaek malai tasi bifi. O umbu-anam mala, dei fo ala senggi musun nala. 18 Neme o numbu-sadum mala mai, dei fo basa hataholi nusak kala malai dae-bafok hambu baba'e-babatik, huu o tungga Au palendang so.”’
19 Basa boe ma Abraham no Isak konda fali leni ata kaduan nala sila leu, de ala fali sama-sama leni Beer Syeba leu. Abraham asa leo nai ele.
Nahor numbu-sadun nala
20 La'i esa, Abraham namanene nae, ndia fadin Nahor saon Milka bonggi nala anak kala so. 21 Ana ka'ak, nade Us. Fadin nala, nade Bus. Basa de Kemuel (fo dadik Aram aman). 22 Boe ma hambu Kesed, Haso, Pildas, Yidlas, ma Betuel. 23 Betuel ndia, na Ribka aman. 24 Tehuu Nahor hambu tamba anak kala, neme sao nakaboin mai, nade Reuma. Ana bonggi nala Teba, Gaham, Tahas, ma Maaka.