Sara boe oo kokolak nae, “Manetualain tao nala au hika, huu hatematak ia au amahoko. Hataholi la dudu'a lae, au ta bisa bonggi nai au fai lasing dale leo iak. Naa te, mae au saong namalasi nggonggoo, tehuu au bei bisa bonggi feen. De hatematak ia, sudi see namanene dede'ak ia, na, ala hika sama-sama lo au boe.”

Ledo-eik Isak faik falu, Abraham sunat ndia, tungga Manetualain palendan.

8 Basa boe ma Isak boe ina-huu. Ledo-eik sangga finan, boe ma Abraham tao feta ina-huuk.

9-10 La'i esa, Sara nita Abraham sao mulin Hagar anan Ismael, nambue nakasesebok Isak. Boe ma Sara kokolak no saon nae, “Husi heni ata Masir ndia no anan leo! Huu au ta nau ata ndia anan, simbo pusaka hata esa boe. Kada au anang Isak, musi hambu basa sala.”

11 Abraham namanene Sara kokolak leo ndiak, boe ma ana nameda ta malole, huu Ismael ndia, ndia anan boe. 12 Tehuu Manetualain kokolak no Abraham nae, “Abraham! O boso dudu'a o sao mulin no anan ndia. Tungga kada Sara hihiin, huu dei fo o hambu numbu-saduk fo Au heluk ndia so, nesik Isak. 13 Au boe oo, fee baba'e-babatik neu o sao mulim anan, huu ndia boe oo, o ana hehelim. Dei fo ndia numbu-sadun nala dadik hataholi nusak esa boe.”

14 Neu fo'a fafain, boe ma Abraham tao lepa-nggee fee Hagar, ma ana londa oe boto esa neu alun. Boe ma ana mbo'i inak ndia no Ismael, fo ala la'o leo. Basa boe ma ala la'o ndule dae nees, dekak no Beer Syeba.^a

15 Ledo-eik sila oe nininun basan so, boe ma Hagar la'o ela anan neu ai kadi'ik esa sa'on. 16 Boe ma ana dudu'a nai dalen dale nae, “Au ta bisa akatataka bali, ita kakanak ia maten.” Basa de ana heok neu nanggatuuk meda meter 50 neme kakanak ndia mai. Boe ma namatani nakaleleu.

17 Manetualain boe oo namanene Ismael namatanin, boe ma Ndia ata nusa sodan noke Hagar nae, “Hagar! Hatina de o dale hedi leo iak? Boso bii, te Manetualain namanene kakanak ndia namatanin so. 18 Hatematak ia, o fo'a fo muu mete kakanak ndia. Matetea ndia dalen, te dei fo Au sangga tao ndia numbu-sadun nala, dadik hataholi nusak esa fo ana seli.”

19 Basa boe ma Manetualain tao namaneu ndia matan, losa ana nita oe dolu esa nai ndia. De neu isi oe neu boto ndia, boe ma ana fee kakanak ndia ninu.

20-21 Boe ma Ismael no inan leo lai moo salaek Paran. Ana ina-huu mai, de ana dadik mana kou malelak nalan seli. Basa boe ma inan nakasasaok kana no ina ana Masir esa. Basa ia dadi, huu Manetualain sama-sama no Ismael.

22 Faik ndia, mane Abimelek no malangga musun, nade Fikol, mai latonggo lo Abraham. Manek kokolak nae, “Abraham! Ai bubuluk so mae, Manetualain sama-sama no o. Huu ndia de o tao sudi hata, na basan dadi. 23 De hatematak ia, au oke o soo nai Manetualain matan mae, o ta masapepeko au ua au umbu-ana nggala. Sama leo au tao malole neu o so, na, o boe oo musi tao malole neu au ua nusak ia.”

24 Boe ma Abraham nataa nae, “Hei! Au soo.”

25 Tehuu basa boe ma, Abraham nafada manek nae, “Ama manek hataholin nala, lamoa lala au oe dolung esa.”

26 Manek namanene leo ndiak, boe ma nataa nae, “Aah! Bei fo au amanene dede'ak ia. Hatina de ama ta mafada neme makahulun mai? Au ta bubuluk see ndia taon.”

27-28 Basa de Abraham no Abimelek mba'a heheluk. Boe ma Abraham ha'i nala sapi ma bi'i-lombo fo feen neu manek. Basa de ana hele nakadaik nala bi'i-lombo tenak hitu bali. 29 Boe ma manek natanen nae, “Hatina de o tao leo ndiak?”

30 Abraham nafada nae, “Ama manek simbo mala bi'i-lombo tena kahituk kala ia, fo dadik tanda nae, ama manek manaku, au ndia kali oe dolu ia.”

31 Huu dua sala soo leme ndia so, de ala foi mamanak ndia, nade Beer Syeba. Ndia ndandaan nae, ‘Oe Dolu Soo’.^b

32 Ala soo late'e, boe ma mane Abimelek no malangga musun, fali leni sila nusa Filistin leu. 33 Basa boe ma Abraham sele ai tamariska^c nai Beer Syeba. Mulai neme faik ndia mai, ai ndia dadik nasanenedak neu Abraham, fo ana nakaluku-nakatele neu MANETUALAIN fo Kasodak Losa Dodoon Neu. 34 Basa boe ma Abraham leo tataak losa dook, nai hataholi Filistin nala nusan.