Abraham pepeko nala mane Abimelek
20
Basa boe ma Abraham hu'a neme Mamre mai, neni dae Negeb neu fo manai kona, ma ana leo nai nggolo Kades no nggolo Syur laladan. Tehuu ta dook, boe ma ana hu'a neni nggolo Gerar neu bali. 2 Boe ma nafada hataholi la lai ele nae, Sara ndia, na, ndia feton. Huu ndia de Abimelek, mane Gerar nadenu hataholin nala leu ha'i lala Sara, de loon neni manek uma manen neu. 3 Le'odaek esa, Manetualain natudu aon neu manek nai me'is dale. Ana kokolak nae, “O sangga mate ia so! Huu o ha'i mala hataholi saon na.”4-5 Tehuu Abimelek nataa nae, “Manetualain! Au bei ta koi la'e inak ndia. Ma au boe oo ta sala. Abraham mesak kana nae, inak ndia, ndia feton! Ma inak ndia boe oo, manaku leo ndiak. Huu ndia de au adenu leu ha'i lalan no dale malalaok. De Manetualain boso fee salak neu au!”
6 Boe ma Manetualain nataa nae, “Memak Au bubuluk o dalem malalaok. Ma Au ndia akalelee, fo o boso koi la'e inak ndia. No leo ndiak, na o boe oo, ta tao salak neu Au. 7 Hatematak ia, o fee falik inak ndia neni saon neu. Ndia ndia, Au mana kokolang. De moken fo ana hule-haladoi fee o, fo suek o boso mate. Tehuu mete ma o ta fee falik inak ndia, na, masanenedak neulalau! Te o mua basa o hataholim mala, dei fo ei mate.”
8 Fo'a fafain, boe ma manek noke basa ndia pegawen nala, de ana tui ndia me'in. Boe ma basa sala bii. 9 Basa de manek noke Abraham, de natanen nae, “Au tao asala o hata, losa o tao soe neu au, ma au lau-inggu nggala leo iak? O ta bole tao dede'a ta malole leo iak. 10 O dudu'a hata, losa o tao leo iak?”
11 Boe ma Abraham nataa nae, “Ama manek! Au dudu'a ae ei basa nggei hataholi fo ta malelak Manetualain. De neu ko hambu hataholi fo sangga tao nisa au, fo suek ha'i nala au saong. 12 Memak au kokolak tetebes ae, au fetong ndia. Huu ai dua nggai ama esa, tehuu ai inan kofe'ek. Huu ndia de ai masaok. 13 De neu faik fo Manetualain nadenu ai miu tai nai tou nusan, au afada au saong ae, ‘Mete ma ita teni sudi bee teu, boe ma hambu hataholi natane ita dua nggata natututin, ma mete ma o sue au, na, mataa mae, ita dua nggata feto-naak.”’
14-16 Basa boe ma mane Abimelek fee falik Sara. Boe ma ana kokolak no Sara nae, “Hatematak ia, au bae o ka'am doi lilo fulak lifun esa, fo dadik buti nae, au ta tao salak hata-hata neu o. Ela basa hataholi bubuluk leo ndiak!”
Boe ma manek kokolak no Abraham nae, “Abraham! Au nusang ia, nana soik soa-neu o. O sangga muu leo nai sudi bee boe oo, bole.” Basa de ana fee Abraham sapi, ma bi'iaek-bi'ilombo. Ndia boe oo fee ata touk ma inak.
17-18 Makahulun MANETUALAIN kena basa inak kala ana manan nala, fo mana leo nai Abimelek dae baba'en, huu ana namoa nala Abraham saon. Tehuu neu faik fo manek fee falik Sara neu saon, boe ma Abraham hule-haladoi, fo Manetualain soi falik inak kala ana manan nala. De ala bisa bonggi bali.