Hataholi Sodom asa manggalaun
19
Ledo-eik Manetualain bei nakokola no Abraham, Ndia ata kaduan nala lakandoo leni kota Sodom leu. Ala losa ele, ledo sangga tesa so. Faik ndia, Lot bei nanggatuuk nai kota lelesu mason.a Nita hataholi kaduak kala sila, boe ma neu soluk kasa. De ana sendek, ma nakatele neu matan nala. 2 Boe ma ana kokolak nae, “Ama nggala ei! Mai fo tuli tataak nai au umang dei. Ela ama sala safe eim mala, ma sunggu nai ele. Fo'a fafain, bei fo ama sala la'o makandoo.”Tehuu ala lataa lae, “Makasi. Boso masambute! Ela ai sunggu nai kada kota dae moon.”
3 Tehuu Lot kokoe nakandoo sala, losa ala nau leo tataak nai ndia uman. Boe ma Lot asa tunu loti, ma sadia mei, de la'a sama-sama. 4 Hataholi mana maik sila bei ta leu sunggu, te tou Sodom asa, inahuu-kadi'ik, basa sala mai e'o lala Lot uman. 5 Ala eki ta no hadak neu Lot lae, “Heeh, Lot! Tou kaduak isinaak lai bee? Tao sala deak mai, te ai sangga sa'e sala!”
6 Boe ma Lot deak neu, de kena lelesu. 7 Ana kokolak nae, “Tolanoo nggala ei! Ei boso tao manggalauk leo ndiak, neu au hataholi mana mai nggala. 8 Hena ei mamanene, baa! Au ana fe'ong dua bei ao tema. Au fee dua sala leu ei. Ei sangga mae tao hata neu sala, neme kada ei mai. Sadi ei boso tao hata-hata neu au hataholi mana mai nggala. Te tungga ita hadan, au musi anea neulalau sala.”
9 Tehuu hataholi Sodom sila eki lae, “O boso seseok tungga! Te o ia, kada hataholi mana taik nai ia! O hataholi deak, de o ta maena haak heti ai. Malolenak o boke heok muma ia mai. Mete ma taa, na, ai tao o belan lena heni neme hataholi kaduak sila mai!” Basa de ala timba heni Lot, boe ma ala tumbu landaa, fo tao lakalulutu lelesu ndia.
10 Tehuu hataholi mana mai kaduak kala sila, look liman nala fo hela Lot neni uma dale neu, boe ma ala nggoe lelesu. 11 Dua sala tao lamboke hataholi Sodom asa matan nala, losa ala lafadadaba sangga lelesu, tehuu ta hambu.
Manetualain kalua heni Lot asa leme Sodom mai
12-13 Basa boe ma hataholi mana mai kaduak kala sila kokolak lo Lot lae, “Lot! MANETUALAIN bubuluk kota ia manggalaun so. De Ana nadenu ai mai, fo sangga tao makalulutu basa kota ia. De o bei maena bobonggi fe'ek nai kota ia, do taa? Mete ma hambu ana tou anak do ina anak, do mane feuk, do sudi see, na, muu mala sala kalua leme kota ia mai leo!”
14 Boe ma Lot neu natonggo no touk dua, fo sangga dadik ndia mane-feun, de nafada sala nae, “Mamanene neulalau! Hatematak ia ei kalua lai-lai mima kota ia mai leo, te MANETUALAIN sangga tao nakalulutun so!” Tehuu lae hetuk Lot kada kokolak nakalalamba.
15 Fo'a fafain, boe ma Manetualain ata kaduan nala sila, lakaseti Lot fo ala kalua lai-lai leo. Ala lae, “Lot! Fo'a leo! Hela mua o saom, ma ana fe'o kaduak kala sila, fo malai leo. La'o ela kota ia. Boso losak ei mate nggoa-nggoa, ma makalulutuk sama-sama mia kota ia.”
16 Tehuu Lot bei nakae'esok. Naa te MANETUALAIN nau nasala'en. Huu ndia de hataholi mana mai kaduak kala sila, to'u lala Lot, saon, ma ana fe'o kaduan nala liman nala, de loo sala kalua leme kota ndia mai. 17 Boe ma esa neme hataholi mana mai kaduak kala sila palenda nae, “Malai lai-lai, fo miu sangga sodak leo! Boso suli dea! Boso hahae nai bafak! Malai nda'e makandoo mini letek ele miu, fo suek ei boso mate!”
18 Tehuu Lot bala nae, “Awii, ama! Boso leo ndiak! 19 Memak ama tulun masala'e mala ai so. Tehuu letek ndia doon seli! Boso losak ai bei ta losa ele, te soe husi hambu ai nai dala laladak so. 20 Ama suli dei. Hambu nggolo kadi'ik esa, ta dook neme ia mai. Nggolok ndia, sosoan ta faa boe. De mete ma ama nau, na, ela ai miu sangga sodak nai ndia leo.”
21 Boe ma ana nataa nae, “Neu! Miu leo! Dei fo au ta tao akalulutu nggolok ndia. 22 De hatematak ia, ei malai lai-lai mini ele miu leo! Te au ta bisa tao hata-hata, mete ma ei bei ta losa nai ele.” Mulai neme faik ndia mai, hataholi foi nggolok ndia, nade Soar, fo ndandaan nae, ‘kadi'ik’.
Kota Sodom ma Gomora nana hotuk losa sombuk
23 Ledo-eik ledo mulai sadu, Lot asa losa Soar. 24 Kada nggengge neuk, MANETUALAIN nggangga ha'i, ma balerang mana mbilak neme lalai mai konda neni Sodom ma Gomora neu. 25 MANETUALAIN tao nakalulutu basa kota, ma nggolok malai dae baba'ek ndia, ma basa kasodak malai ndia, fo ndia: hataholi, banda, ma sesele-nggalik kala.
26 Ledo-eik ala lalai, Lot saon suli dea neu. Kada nggengge neuk, ana dadik dii masik tutik.
27 Fo'a fafain, Abraham fali seluk neni mamanak fo afik nambadeik neme ndia, fo kokoe MANETUALAIN. 28 Boe ma ana suli neni Sodom ma Gomora neu, ma basa bafak ndia. Ana suli, te sudi nai bee, ha'i masuk bubua-bubuak hene leni lalai leu. Ma ha'i na'a heni basa-basan.
29 Manetualain tulun Lot kalua neme mamanak fo nana hukuk ndia mai, neu faik fo tao nakalulutu kota la sila, huu Ndia nasaneda hehelun neu Abraham.
Lot no ana fe'on nala
30 Faik ndia, Lot bii leo nakandoo nai nggolo Soar. Huu ndia de ana no ana fe'o kaduan nala, hu'a leni letek leu. Boe ma ala leo lai luak esa.
31 La'i esa, ana fe'o ka'ak kokolak no fadin nae, “Ndule basa ia, ta hambu touk esa, fo bisa mai sao nala ita. Ma ta dook bali, te ama boe namalasi, ma ta bisa hambu anak so bali. 32 De malolenak, ita fee ama ninu mafuk. Boe ma ita sunggu to ndia, fo suek ita bisa tuti ama numbu-sadun.”
33 Boe ma le'odaen ndia, ala fee aman ninu mafuk anggol oek. Basa boe ma ana fe'o ka'ak neu sunggu no aman. Tehuu tou lasik mafuk nalan seli, losa ta bubuluk ana tao hata no ndia ana fe'on so.
34 Fo'a, boe ma ka'ak nafada fadin nae, “Fadi! Le'odaek au sunggu ua ama so. Le'odaen ia, o baba'em bali. Dei fo ita tao mafuk ama bali, boe ma fadi muu sunggu muan leo. No leo ndiak, ita dua nggata bisa hambu anak, fo tuti ama numbu-sadun.”
35 Le'odaen ndia boe oo, ala tao mafuk sila aman seluk bali. Boe ma ana mulianak maso neu sunggu no aman. Tehuu tou lasik mafuk nalan seli so, losa ta bubuluk ana tao hata no ndia ana fe'on so.
36 No leo ndiak, dua sala lailu leme sila ama bonggi hehelin mai. 37 Basa de ka'ak bonggi nala ana tou anak esa. Boe ma ana foin, nade Moab (fo liin hihii sama leo dede'a de'ek fe'ek esa, ndandaan nae, ‘neme aman mai’). Hatematak ia ndia ndia dadik hataholi Moab asa bei-ba'in. 38 Boe ma fadik bonggi nala ana tou anak esa. Ana foin, nade Ben Ami (ndandaan nae, ‘kakanak neme au hataholing mai’). Hatematak ia ndia ndia dadik hataholi Amon bei-ba'in.b