Hataholi telu mai latonggo lo Abraham
18
Faik esa, Abraham leo dekak no ai ina-huuk kala nai Mamre. MANETUALAIN mai natudu aon neu ndia neme ndia. Tutuin leo iak: faik ndia ledo natobi nalan seli, de Abraham nanggatuuk sangga ani neme tenda matan. 2 Ledo-eik Abraham botik matan, boe ma nita hataholi telu lambadeik lai ele. De ana nalai lai-lai neu soluk kasa. Ana sendek, 3 boe ma nae, “Ama nggala ei! Mete ma bisa, na, ama sala tuli tataak nai au tendang dei. Mae kada minu oe hiak boe oo, malole. 4 Ama sala hahae aom miu sa'ok. Dei fo kakanak kala ha'i oe, fo mai safe ama sala ein. 5 Dei fo au uu sadia nana'ak fee ama sala, fo hambu balakaik faa, bei fo ama sala la'ok makandoo. Huu au amahoko, bisa ono-lau ama sala.”Boe ma lataa lae, “Hei. Makasi no'uk. Ai tuli.”
6 Boe ma Abraham nalai neni tenda neu, ma nafada Sara nae, “Lai-lai! Ha'i mala hade uu neulauk saku esa, fo tao loti.”a
7 Boe ma ana nalai neni sapin nala neu, de ana hele nala sapi ana ma'ao esa. Boe ma nadenu atan hala sapi ndia, ma nasu mbaan. 8 Basa boe ma Abraham ha'i kamba oe, keju, ma mbaa fo bei fo nana nasuk ndia, de nenin neu hataholi mana maik kala sila. Neu faik fo ala la'a, ana nambadeik neu ai huun fo ono-lau sala.
9 Boe ma ala latanen lae, “Abraham! O saom Sara, nai bee?”
Ana nataa nae, “Nai tenda dale.”
10 Boe ma esa neme kateluk kala sila mai kokolak nae, “Meda teu mana maik, Au fali mai. Faik ndia, o saom Sara bonggi nala ana tou anak esa so.”
Ledo-eik ala kokolak leo ndiak, Sara namanene neme lelesu dean mai. 11 Faik ndia, Abraham no Sara lamalasi lalan seli so, ma Sara boe oo ta hambu bulak so. 12 Sara namanene ala kokolak leo ndiak, boe ma ana hika nai dalen. Ana dudu'a nae, “Awe'ek! Au amalasi nggonggook leo iak, ma au saong nabebok so. Neme bee mai, ai bei mahiik dadik masao beuk, fo sangga anak bali?”
13 Boe ma MANETUALAIN natane Abraham nae, “Hatina de Sara hika? Ana dudu'a nae, hata fo Au kokolak ia, ta bisa dadi, huu ndia lasik so, do? 14 Au ia, MANETUALAIN! Ta hambu hata esa boe, fo Au ta bisa taon! Masanenedak neulalau, baa! Mete ma teu mana maik Au fali mai, na, dei fo Sara bonggi nala ana tou anak esa so.”
15 Sara namanene leo ndiak, boe ma ana bii. De nalelesi nae, “Au ta hika, maa!”
Tehuu MANETUALAIN nataa nae, “Isinaak memak o hika, maa.”
Abraham kokoe Manetualain, fo boso huku hataholi Sodom
16 Boe ma hataholi kateluk mana maik sila, sangga la'o leni kota Sodom leu. De Abraham noo sala losa dala laladak. Neme ndia mai, ala bisa lita kota Sodom. 17 Boe ma MANETUALAIN kokolak nai dalen nae, “Malolenak, Au tui Abraham, Au sangga tao akalulutu kota Sodom. 18 Huu ndia numbu-sadun nala, dei fo boe lamano'u, ma dadik hataholi nusak fo ana seli. Ndia boe oo, dei fo dadik baba'e-babatik neu basa hataholi nusak malai dae-bafok ia. 19 Au hele alan so, fo nanoli anan nala, ma hataholi fe'ek kala, fo tungga lakandoo MANETUALAIN dalan, suek lasoda ndoos, ma ta lasapepeko. Mete ma ala tao leo ndiak, na, Au tao atetu Au hehelung ua Abraham.”
20 Boe ma MANETUALAIN nafada Abraham nae, “Leo iak! Au amanene hataholi no'uk manggalau la'e-neu hataholi malai kota Sodom ma Gomora. Sila manggalaun sudi selik so. 21 Huu ndia de Au konda mai, fo sangga palisak aong, basa hata fo Au amanenek ndia so, tetebes do taa. Mete ma taa, na, dei fo Au bubuluk.”
22 Ledo-eik MANETUALAIN bei kokolak no Abraham, hataholi mana mai kaduak kala sila, la'ok lakandoo leni kota Sodom leu. 23 Abraham neu deka-deka no Manetualain, de kokoe nae, “Leo bee? Ama sangga tao makalulutu hataholi malole ma hataholi manggalauk sama-sama, do? 24 Mete ma hambu hataholi malole 50 lai kota ndia, na, Ama bei nau tao makalulutu basa sala boe, do? Do, Ama ta tao makalulutu kota ndia, huu sila. 25 Ama boso tao makalulutu sala leo ndiak! Boso losak hataholi malole sila, mate tungga boe, huu Ama nau tao makalulutu hataholi manggalauk kala. Ama ndia dadik Mana Maketu Dede'ak, nai lalai ma dae-bafok. Ma Ama mesak kana bubuluk so, ndia ta benu seselik.”
26 MANETUALAIN nataa nae, “Mete ma Au hambu hataholi malole 50 nai kota Sodom, na, Au ta huku kota ndia, huu sila.”
27 Boe ma Abraham kokolak bali nae, “Ama, au oke ambon, au bisa kokolak faa bali. Au ia, kada hataholi nggoak, fo ta bubuluk hata-hata. 28 Leo ta hambu hataholi malole losa 50, tehuu kada hambu 45, na, leo bee? Leo kulan kada hataholi 5, na, Ama bei nau tao makalulutu kota ndia, do?”
Manetualain nataa nae, “Leo Au hambu hataholi malole 45 nai ndia, na, Au ta tao akalulutu kota ndia.”
29 Basa de Abraham kokoe bali nae, “Leo hambu kada hataholi 40, na, leo bee Ama?”
Boe ma Ana nataa nae, “Leo Au hambu hataholi 40, na, Au ta huku sala.”
30 Abraham kokoe nakandoo bali nae, “Ama boso mamanasa, tehuu mete ma hambu kada hataholi malole 30, na, leo bee?”
Ana nataa nae, “Leo Au hambu hataholi 30, na, Au ta dadi huku sala.”
31 Abraham kokoe bali nae, “Ama boso mamanasa, au atane faa bali. Leo hambu kada hataholi 20, na, leo bee?”
Boe ma Ana nataa bali nae, “Leo hambu hataholi 20, na, Au ta tao akalulutu kota ndia.”
32 Boe ma Abraham nggoe kokolan nae, “Ama! Au kokolak la'i esa bali, tehuu boso mamanasa au, bou! Leo bee mete ma hambu kada hataholi malole 10?”
Boe ma Ana nataa nae, “Leo Au hambu hataholi malole 10 nai ndia, na, Au ta tao akalulutu kota ndia.”
33 MANETUALAIN kokolak basa leo ndiak, boe ma Ana la'ok nakandoo, de Abraham fali.