Manetualain mba'a heheluk no Abram pake tanda sunat
17
Ledo-eik Abram teuk 99, MANETUALAIN mai natudu aon neu Abram. Boe ma Ana kokolak nae, “Au ia, Manetualain fo Mana Koasa Nai Lain Seli. O musi tungga makandoo Au hihiing, ma masoda no ndoos. 2 Au sangga mba'a heheluk ua o, ma tao o numbu-sadum mala boe lamano'u.”3 Boe ma Abram sendek de nakatele losa dae. Boe ma Manetualain kokolak nakandoo nae, 4-5 “Au tao heheluk ua o, leo iak: dei fo o dadik hataholi nusak no'uk bei-ba'in. Huu ndia de o nadem ta Abram bali (fo ndandaan nae, ‘amak fo naden nana nalelak’), tehuu Abraham (fo ndandaan nae, ‘hataholi nusak no'uk bei-ba'in’). 6 Dei fo Au tao o numbu-sadum mala boe lamano'u. Ma dei fo Au tao hataholi nusak lamano'u leme sila mai, ma so'u manek no'uk, leme numbu-saduk kala sila mai.
7 Au to'u ahele Au hehelung ua o, ma o numbu-sadum mala. Heheluk ia ta mana ketuk, huu Au ia, o mua o numbu-sadum mala Manetualain. 8 Basa dae Kana'an ia, dei fo Au feen neu o mua o numbu-sadum mala. Hatematak ia, kada o leo tataak nai ia. Tehuu dei fo o numbu-sadum mala hambu dae Kana'an ia losa dodoon neu. Ma dei fo Au boe oo, dadik sila Manetualain. 9-10 Tehuu o mua o numbu-sadum mala boe oo, musi to'u mahele heheluk ia no dale katemak. Basa touk kala musi sunat. 11-13 Mulai hatematak ia, basa touk kala mulai neme faik falu mai, musi sunat. O bobonggim mala, basa o hataholi mana tao uem mala, ma ata fo o hasa mala sala leme nusa fe'ek mai so, basa sala musi sunat. Sunat ndia, dadik ita dua nggata tanda hehelun, fo nakadita nai ei aom mala. 14 Touk bee ndia ta sunat, na ta hambu baba'ek nai Au hehelung, ma ta maso dadik Au hataholing.”
15 Basa boe ma Manetualain kokolak nakandoo bali nae, “Mulai hatematak ia, o boso moke o saom mae Sarai bali, tehuu kada moke mae Sara. 16 Dei fo Au fee baba'e-babatik makadotok neu Sara, fo ana bonggi fee o, ana tou anak esa. Tetebes! Dei fo Sara dadik hataholi nusak no'uk bei-ba'in nala. Ma dei fo Au so'u manek no'uk neme ndia numbu-sadun nala mai.”
17 Boe ma Abraham sendek de nakatele losa dae. Tehuu ana hika nai dalen. Ana dudu'a nae, “Tou lasi nggonggook teuk 100 leo au ia, na, bei hambu anak bali? Ma Sara namalasi duduu dae teuk 90 so, na, neme bee mai, ana bei bisa bonggi bali?” 18 Boe ma nafada Manetualain nae, “Manetualain. Ela Ismael mesak kana hambu au pusakang boe oo, ta hata-hata.”
19 Tehuu Manetualain nataa nae, “Taa! Dei fo o saom Sara, bonggi ana tou anak esa. O foin, nade Isak. Au hehelung, dei fo konda neu ndia, ma numbu-sadun nala losa dodoon neu. 20 Au boe oo amanene hata fo o moke fee Ismael so. Huu ndia de Au boe oo feen baba'e-babatik, ma Au tao amano'u ndia numbu-sadun nala. Dei fo hambu mane leo 12 leme ndia numbu-sadun nala mai. Ma dei fo ndia numbu-sadun nala dadik nusak esa fo ana seli. 21 Mae leo ndiak, tehuu Au hehelung ia, nana mba'ak no kada o anam Isak. Dei fo teu mana maik, meda fain leo iak, Sara bonggi ndia.” 22 Manetualain kokolak basa leo ndiak, boe ma Ana la'o ela Abraham mesak kana nai ndia.
23-27 Faik ndia boe oo, Abraham tungga tutik Manetualain palendan. Boe ma ana sunat. Basa de ana sunat Ismael, ma basa touk malai ndia uman. Ana sunat basa ata touk kala boe. Faik ndia, Abraham teuk 99 so, ma Ismael teuk 13.