Hagar no anan Ismael
16
1-3 Faik ndia, Abram fali neme Masir mai so, de ana leo teuk sanahulu nai Kana'an so. Saon Sarai, bei ta hambu anak. Sarai ata inan hataholi Masir, nade Hagar.La'i esa, Sarai kokolak no Abram nae, “Ama! MANETUALAIN kena au ana manang so. Malolenak, ama muu sunggu mua au atang Hagar, fo suek ana bonggi fee au.”
Boe ma Abram tungga saon kokolan. De Sarai fee Hagar fo dadik neu Abram sao mulin. 4 Boe ma Abram neu sunggu no Hagar, de inak ndia nailu. Tehuu neu faik fo Hagar bubuluk ndia nailu so, ana koao, de ana nakadadaek Sarai.
5 Boe ma Sarai kokolak no Abram nae, “Au fee o ata ndia, fo dadik o sao mulim. Tehuu neu faik fo inak ndia bubuluk nailu, boe ma ana nakadadaek au. Basa sila o salam! Neme naa, fo MANETUALAIN naketu ita dua nggata dede'an. Bei fo o bubuluk!”
6 Basa boe ma Abram nataa nae, “Leo iak! O ia, sao uluk. Tehuu ndia, kada sao mulik. De o maena koasa ndia. O sangga tao hata neu ndia, neme kada o mai!” Basa boe ma Sarai tao Hagar ta no hadak losa nalai.
7 Ana nalai losa mamana nees. Boe ma MANETUALAIN ata nusa sodan esa, hambu ndia dekak no oe matak manai dalak neni Sur neu. 8 Boe ma nae, “Wei! Hagar, fo Sarai atan! Hatina de o nai ia? O muma bee mai, ma o sangga bee muu?”
Boe ma Hagar nataa nae, “Au alai la'o ela au malangga inang.”
9 Boe ma MANETUALAIN atan kokoen nae, “Leo iak! Malolenak o fali muni o malangga inam muu. Ana tao o leo beek, na, kada simbok. 10 O boso bii. Dei fo au tao o numbu-sadum mala dadik makadotok, losa hataholi ta hingga lala sala. 11 Hatematak ia o mailu. Ta dook bali, o bonggi ana tou anak esa. O musi foin, nade Ismael (hihii sama leo dede'a de'ek fe'ek esa ndandaan nae, ‘Manetualain namanene’), huu MANETUALAIN namanene o namatanim so. 12 Tehuu kakanak ndia ina-huu mai, ana nasoda dook neme tolanoon nala mai. Huu ndia sama leo ndala fui, fo ta nau tungga palenda. Ana laban sudi see. Ma basa hataholi laban lasafali ndia.”
13 Hagar namanene basa leo ndiak, boe ma ana kokolak nai dalen nae, “Au ita MANETUALAIN so, fo Ana mete ma nanea au.” Boe ma ana mulai noke Manetualain, pake nadek “Manetualain mana faduli au.” 14 Huu ndia de hataholi foi oe matak ndia nade, Beer Lahai Roi, fo ndandaan nae, “Oe matak neme Ndia fo kasodak mai, fo mana faduli au.” Ndia mamanan nai nggolo Kades ma nggolo Beret laladan. Oe matak ndia, bei nai ia losa hatematak ia.