Manetualain naheluk no Abram
15
Basa boe ma MANETUALAIN natudu aon neu Abram. Boe ma Ana nae, “Abram! O ta paluu bii. Huu Au ndia sili o muma o musum mala mai. Ma Au fee o nanala ina-huuk.”2-3 Tehuu Abram nae, “Eeh, Manetualain. Mae Manetualain fee au no'uk boe oo, sosoan taa. Huu au anang taa, fo ana fee au numbu-saduk. De hambu pusaka no'uk fo tao hata? Mae leo bee boe oo, au atang Eliasar neme Damsik mai, hambu basa sala.”
4 Tehuu MANETUALAIN nataa nae, “Ta leo ndiak! Huu o ana hehelim dei fo hambu pusaka ndia, tehuu ta ata ndia.”
5 Boe ma Ana noo Abram deak neu, de nae, “Hatematak ia o suli lalai muu. Hena o mete nduuk kala sila. O bisa hingga sala, do? Dei fo o numbu-sadum mala no'un sama leo nduuk kala sila!”
6 Boe ma Abram simbok MANETUALAIN kokolan ndia. De MANETUALAIN kee-dede nalan hataholi dale ndoos, huu Abram namahele neu Ndia.
7 Basa boe ma MANETUALAIN tuti bali nae, “Au ia, Manetualain. Au ndia ua o kalua muma nggolo Ur mai so, nai hataholi Kasdim asa daen. Ma Au ndia fee dae ia dadik neu o pusakam.”
8 Tehuu Abram natane nae, “Leo bee MANETUALAIN? Neme bee mai au bisa bubuluk ae, dae ia dei fo dadik au pusakang?”
9 Boe ma Ana nataa nae, “Leo iak! Mai ita tao tataok esa, fo mba'a hata fo Au kokolak isinaak. Hatematak ia, o muu ha'i banda fee Au: sapi ina esa, bi'i-ae ina esa, ma bi'i-lombo mane esa. Basa sala musi teuk beketeluk. Basa, na muu ha'i kateu esa, ma lunda esa bali.”
10 Boe ma Abram neu ha'i nala basa banda la sila. Ana seseli ba'e duak sapi, bi'i-aek, ma bi'i-lombo ndia. Boe ma ana heti ba'e duak mbaa la sila leu dae, esa nasale esa, dadik bubuak dua. Tehuu ta seseli mbuik kala sila. 11 Boe ma mbui mana'a mbombolak kala mai, fo nau la'a heni mbaa la sila. Tehuu Abram husi heni sala.
12 Ledo-eik ledo tesa, boe ma Abram sunggu namanee. Ana nalame'i nae, makiu-mumuuk mboti nalan, losa ana bii nalan seli.
13-15 Boe ma Manetualain nafadan nae,
“Abram! Dei fo o masoda losa mamalasi malan seli, ma mate mua mole, bei fo latoi neulalau o.
Tehuu o numbu-sadum mala, dei fo dadik mana tai nai hataholi fe'ek nusan.
Dei fo hataholi nusak leme nusak ndia mai, tao sala dadik ata, boe ma tuni-ndeni sala doidoso lalan seli, losa teuk 400.
Tehuu dei fo Au huku hataholi nusak ndia.
Boe ma Au ua o numbu-sadum mala kalua leme ndia mai, ma ala leni hata pusaka makadotok.a
16 Dei fo Au heti fo neu o numbu-sadu kaliman, ala fali leni ia mai bali.
Hatematak ia, hataholi Amori la leo lai dae ia. Hataholi la ia manggalauk, tehuu bei ta manggalauk nalan seli.
Mete ma o umbu-anam mala fali ia mai so, Au pake sala, fo huku tao lakalulutu hataholi Amori la. Huu faik ndia, sila manggalaun lena lalan seli so.”
17 Ledo-eik le'odae so, nggengge neuk te hambu la'o dae manu teik esa namasu, ma mbele esa mbila nakababalek nesik mbaa bubua kaduak kala laladan. 18 Faik ndia, MANETUALAIN mba'a heheluk no Abram boe. Ana nafada nae, “Au helu, dei fo Au fee nusak ia neu o numbu-sadum mala, mulai neme lee Masir mai,b losa lee Efrat, 19 ma dae hataholi Keni, Kenas, Kadmon, 20 Het, Feris, Refaim, 21 Amori, Kana'an, Girgasi, ma Yebus.”