Abram neu nala falik Lot neme natatik mai
14
Faik ndia, hambu manek haa lakabubua. Sila: Amrafel, mane nusa Sinear. Ariok, mane nusa Elasar. Kedarlaomer, mane nusa Elam. Ma Tideal, mane nusa Goyim. 2 Faik ndia, hambu mane fe'ek lima lakabubua boe. Sila: Bera, mane nusa Sodom. Birsa, mane nusa Gomora. Sinab, mane nusa Adema. Semeber, mane nusa Seboim. Ma mane nusa Bela (ndia nusa Soar). Boe ma mane kahaak kala latati lo mane fe'ek kalimak kala sila. 3 Manek kalimak kala sila lakabubua lo soldadun nala, lai Sidim bafan (fo hatematak ia lae, Tasi Kamates).4 Natatik ndia natahuhuun leo iak: makahulun, mane Kedarlaomer palenda manek kalimak kala sila losa teuk 12. Tehuu neu teuk ka-13, boe ma ala musu lo ndia.
5 Neu faik fo maso teuk ka-14, boe ma mane Kedarlaomer no nonoon mane kateluk kala sila mai lo soldadun nala. Boe ma latati senggi nusak hida. Sila: hataholi Refaim nai nusa Asterot-Karnaim, hataholi Susim nai nusa Ham, hataholi Emim nai nusa Sawe-Kiryataim, 6 ma hataholi Hori fo manai lete Seir, losa mamana nees El Paran bifin. 7 Basa de ala fali leni En Mispat leu, (fo hatematak ia, nade Kades). Basa boe ma ala tao lakalulutu hataholi Amalek nusan, ma hataholi Amori mana leo nai nusa Haseson-Tamar.
8-9 Boe ma mane kalimak kala sila heti soldadun nala leme Sidim bafan, de latati lo mane kahaak kala sila. 10 Nai bafak ndia, hambu dano ter no'uk. Neu faik fo ala latati ndia, mane Sodom, mane Gomora ma soldadun nala lalai. Luma ala tuda leni dano ter dale leu, ma luma lalai letek leu. 11 De mane kahaak kala fo mana senggik sila, leu lamoa lala basa buas sala, ma nana'ak kala leme Sodom ma Gomora mai. Basa de ala mulai fali.
12 Tehuu Abram anan Lot leo nai Sodom. Boe ma mane kahaak kala sila humu leni Lot asa, ma lamoa lala basa buan nala.
13 Tehuu posi heni hataholi esa. De nalai neu nafada Abram, fo hataholi Ibrani ndia. Faik ndia, Abram leo deka-deka no Mamre ai ina-huun nala. Mamre, fo hataholi Amori, no tolanoon nala, Eskol ma Aner, ala dadik Abram paltein. 14 Neu faik fo Abram namanene nae, hataholi la humu lala fadin anan Lot so, boe ma ana nakabubua nala hataholi mana tao uen fo mana matati malelak. Basa sala hataholi 318. Boe ma ala leu husi tungga mane kahaak kala sila, losa nggolo Dan, fo dook nai kii ele.
15 Nai ndia, Abram ba'e hataholin nala neu bubuak hida. Le'odaen ndia boe oo, leu sambu hataholi la sila. Tehuu hambu luma lalai. De Abram asa husi lakandoo sala, losa nggolo Hoba, nai kota Damsik boboan kii. 16 Boe ma Abram hambu falik Lot, hataholin nala, basa buan nala, ma hataholi fe'ek kala boe.
Melkisedek fo manek, ma malangga anggama neme Manetualain mai, natonggo no Abram
17 Neu faik fo Abram senggi mane kahaak kala sila, de ana fali, boe ma mane Sodom mai soluk Abram neme Sawe bafan (fo hataholi lateme lae, Manek Bafan). 18 Faik ndia, Melkisedek dadik mane kota Salem.a Ma ndia boe oo, malangga anggama neme Manetualain fo Manai Lain Seli. Ana neni fee Abram loti ma anggol. 19-20 Basa boe ma ana kokolak fee baba'e-babatik neu Abram nae, “Manetualain fo Manai Lain Seli, fo mana nakadadadik lalai no dae-bafok, fee baba'e-babatik neu o. Koa-kiok neu Manetualain, fo mana fee o senggi musu la.”
Basa boe ma Abram ba'e fee Melkisedek baba'ek esa, neme baba'ek sanahulu mai, neme basa hata fo namoa falik kala sila so.
21 Basa boe ma mane Sodom nakatele neu Abram ma nae, “Ama Abram. Basa buas fo ama mamoa mala sala leme au musu nggala mai so, ela ama hambu sala. Tehuu kada au oke falik au hataholi nggala.”
22 Tehuu Abram nataa nae, “Au soo neu MANETUALAIN fo Manai Lain Seli, fo mana nakadadadik lalai no dae-bafok 23 ae, au ta nau ha'i buas esa boe, neme o buam mala mai. Mae abas dook esa boe oo, au ta ha'in. No leo ndiak, o ta bisa kokolak mae, ‘Abram namasu'i, huu au.’ 24 Au ta paluu hata esa boe. Kada bee fo au hataholi nggala pake so, taok basan so. Ma elan fo au nonoo katelu nggala ia, Aner, Eskol, ma Mamre, ha'i leni sila baba'en.”