Abram no Lot kofe'e
13
Basa boe ma Abram la'o ela Masir, de fali neni dae Negeb neu. Ana noo saon, ma basa hata pusakan nala. Fadin anan Lot, tungga sala boe. 2 Abram ndia, namasu'i nalan seli. Ndia banda nakaboin, ma lilo mbila-lilo fulan nala, no'un seli.3 Neme Negeb mai ana leo lali-lali, fo fali neni nggolo Betel ma nggolo Ai laladan neu. Makahulun ana leo nitak neme ndia so. 4 Ma ndia boe oo, nambadedei mei tunu-hotuk so. Boe ma ana nakaluku-nakatele neu MANETUALAIN neme ndia.
5 Lot, fo mana tungga sama-sama no Abram ndia, naena banda nakaboik no'uk, ma hataholi mana tao uen nala, no'uk boe. 6-7 Tehuu mamanak ndia, ta maloa soa-neu Abram no Lot, ma basa hata-heton nala, fo lasoda sama-sama lai ndia. Boe ma Abram no Lot mana hoon nala mulai lasisimbo bafak, huu na'u nai mamanak ndia, ta dai soa-neu bandan nala. (Faik ndia, hataholi Kana'an ma hataholi Feris, bei leo lai ndia boe.)
8 Boe ma Abram nafada anan nae, “Lot! Ita ia bobonggik. Boso losak ita ta malole esa no esa, boe ma ita hataholi mana tao uen nala lahuu lakandoo. 9 Malolenak ita kofe'e leo. Mamanak ia maloa. De mete ma o hele mala dae baba'ek kii, na, au hele ala baba'ek kona. Tehuu mete ma o hele mala dae baba'ek kona, na, au hele ala baba'ek kii.”
10 Boe ma Lot suli nafeok. De nita lee Yarden bafan henuk no oe, losa nggolo Soar. Mamanak ndia, daen mamina sama leo MANETUALAIN osin, ma sama leo dae Masir. (Faik ndia, MANETUALAIN bei ta tao nakalulutu kota Sodom no Gomora. De dae ndia bei neulauk.) 11 De Lot hele nala basa dae manai lee Yarden bafan. Boe ma dua sala kofe'e. Basa de Lot neni dulu neu. 12 Tehuu Abram leo nakandoo nai dae Kana'an. Boe ma Lot neu leo nai nggolok kala mana dekak kota Sodom nai lee Yarden bafan. 13 Tehuu hataholi Sodom asa manggalaun seli. Ma ala ta nau lamanene MANETUALAIN.
14 Neu faik fo Lot no Abram kofe'e so, boe ma MANETUALAIN nafada Abram nae, “Abram! Hena o suli ndule fo mete basa mamanak, neme mamanak fo o mambadeik ndia mai. Mete neulalau dea-matak, kii-konak. 15 Basa dae fo o mitak ndia, dei fo Au feen neu o, ma o numbu-sadum mala, fo dadik ei pusakam losa dodoon neu. 16 Neu ko Au tao o numbu-sadum mala, no'un sama leo salaek malai tasi bifi. Losa hataholi la, ta bisa hingga lala o numbu-sadum mala dedesin. 17 Hatematak ia, o la'o mafeok tungga dae ia nalun ma loan. Huu basa sila, dei fo Au feen neu o!”
18 Basa boe ma Abram asa lali, ma leu leo seluk leme mamanak, deka ai ina-huuk kala malai Mamre, deka nggolo Hebron. Boe ma ana nakatotodo mei tunu-hotuk, fo nakaluku-nakatele neu MANETUALAIN nai ndia.