Manetualain noke Abram
12
Faik ndia, MANETUALAIN kokolak no Abram so nae, “Abram! O la'o ela o bobonggim, o amam uman ma o nggolom. O muni mamanak esa muu, fo dei fo Au atudun neu o.2 Dei fo Au fee o baba'e-babatik.
Ma o numbu-sadum mala, dei fo lamano'u,
ma dadik hataholi nusak fo ana seli, losa hataholi la lalelak o nadem.
Boe ma o dadik baba'e-babatik neu hataholi fe'ek.
3 Dei fo Au fee baba'e-babatik neu hataholi, fo mana fee o baba'e-babatik.
Tehuu Au sumba-soo hataholi, fo mana sumba-soo o.
Mamanene neulalau!
Huu dei fo basa hataholi nusak lai dae-bafok ia, hambu baba'e-babatik huu o.”
4-5 Faik ndia, Abram teuk 75. Ndia no saon Sarai, fadin anan Lot, basa bua pusakan, ma basa hataholi mana tao ues, fo ana hambu sala nai kota Haran. Boe ma Abram asa la'o ela Haran, de leni mamanak fo MANETUALAIN nafada ndia so. De ala la'ok lakandoo losa mamanak esa, nade Kana'an.
6 Losa ele, boe ma Abram la'ok ndule dae ndia, losa dekak no nggolok esa, nade Sikem. Boe ma ala leo tataak dekak no ai ina-huuk esa, nai More. Faik ndia, hataholi Kana'an asa, bei leo lai ndia. 7 Nai ndia, MANETUALAIN natudu aon neu Abram. Ana nae, “Dei fo Au fee nusak ia neu o numbu-sadum mala.” Basa boe ma Abram nakatotodok batu fo dadik mei esa, fo paken dadik mei tunu-hotuk soa-neu MANETUALAIN, fo natudu aon nai ndia.
8 Basa boe ma Abram lali leni letek manai kona, boe ma leo tataak nai nggolo Betel ma nggolo Ai laladan. Nai ndia, ana nambadedei mei tunu-hotuk esa, ma ana nakaluku-nakatele neu MANETUALAIN. 9 Basa boe ma ana lali-lali mamanak, losa dae Negeb, nai Kana'an boboan kona.
Abram neni nusa Masir neu
10 Faik esa, boe ma ndoes ana seli nai dae Kana'an. Huu ndia de Abram asa la'o dook lena bali, leni kona leu losa nusa Masir. Ala leo tataak leme ele. 11 Neu faik fo ala sangga maso leni nusa Masir leu, ana nafada saon Sarai nae, “Sarai. O ia, mana'a hiak. 12 Tehuu mete ma hataholi Masir lita o mana'an leo iak, na, neu ko ala tao lisa au, huu au ia, o saom. No leo ndiak, ala bisa ha'i lala o. 13 De malolenak, o mafada sala mae, au ia, o naam. No leo ndiak, ala ta tao lisa au, tehuu dei fo ala malole lo au, huu o.”
14 Ledo-eik Abram asa losa Masir so, hataholi la lita inak ndia mana'a hiak. 15 Ledo-eik manek pegawen nala litan, boe ma ala koa inak ndia mana'an, neu manek matan. De ala loo inak ndia neni manek uman neu. 16 De manek malole no Abram, huu Sarai. Boe ma manek palsen banda fee Abram, fo ndia: bi'i-lombo, bi'i-aek, sapi, banda keledei, ma banda onta. Ndia boe oo palsen ata touk ma inak.
17 Tehuu manek ha'i nala hataholi saon neni uman neu so, huu ndia de MANETUALAIN huku mata-matak neu ndia, ma uma isin nala. 18 Boe ma manek noke Abram, de natanen nae, “Abram! O tao au leo beek ia so? Hatina de o ta mafada mae, inak ndia, o saom? 19 Tehuu o mae ndia ia, o fetom! Elaba'ik au ha'i alan, fo dadik au saong! Ia, o saom ia. Hatematak ia, muan ma boke heok neme au matang mai!” 20 Basa boe ma manek palenda pegawen nala, de husi heni Abram, saon, ma basa buan nala leme nusak ndia mai.