Manara Babel
11
Lele uluk, basa hataholi malai dae-bafok kada kokolak lenik dede'ak esa. 2 Neu faik fo luma mulai lali leni dulu leu, ala losa lai dae matetuk esa nai Sinear,a boe ma ala leo leu ndia. 3-4 Basa sala lala halak lae, “Wei! Tolanoo nggala ei! Mai fo ita tambadedei kota ina-huuk esa. Ita musi tao batu bata, boe ma ita hotun losa natea. Ma ita takatotodok batu bata sila pake ter. Basa boe ma ita tambadedei manara madema esa, fo mbunin losa lalai, fo suek ita hambu nadek. Elan fo ita dadik nusa ina-huuk esa fo ta nababa'ek.”
5 Boe ma MANETUALAIN konda fo mete sudik kota ndia, ma ndia manaran fo lambadedein. 6 Boe ma Ana kokolak nae, “Basa hataholi la ia, nusak esa ma pake dede'ak esa. Hata fo ala taok hatematak ia, bei fo kada mulai ue sososak. Mbila-binesak, mete ma basa sala nana mba'ak dadik esa, sama leo hatematak ia, dei fo ala bisa tao sudi hata. 7 Malolenak Ita konda, fo tao kofe'ek dede'an nala, fo suek sila ta bisa lalelak esa no esa bali.”
8 Boe ma Manetualain konda, fo tao babalik dede'an nala. No leo ndiak, Ana tao hataholi la sila, latanggelak leni basa mamanak lai dae-bafok. Boe ma ala ta lambadedei lakandoo kota ndia so bali. 9 Huu ndia de ala foi kota ndia, nade Babel, (fo hihii sama leo dede'a de'ek esa, ndandaan nae, ‘lasapangga’), huu MANETUALAIN tao babalik sila dede'an, ma fee sala latanggelak leni sudi bee leu, lai dae-bafok ia.
Neme Sem mai losa Abram
10 Ia Sem numbu-sadun nala. Neu faik fo faa tuak nate'e teuk dua so, nandaa no Sem teuk 100, ana hambu ana tou anak esa, nade Arpaksad. 11 Basa boe ma ana bei nasoda teuk 500 bali, ma ana hambu seluk ana tou anak ma ina anak.
12 Neu faik fo Arpaksad teuk 35, ana hambu ana tou anak esa, nade Sela. 13 Basa boe ma Arpaksad bei nasoda seluk teuk 403 bali, ma ana hambu seluk ana tou anak ma ina anak.
14 Neu faik fo Sela teuk 30, ana hambu ana tou anak esa, nade Eber. 15 Basa boe ma Sela bei nasoda teuk 403 bali, ma ana hambu seluk ana tou anak ma ina anak.
16 Neu faik fo Eber teuk 34, ana hambu ana tou anak esa, nade Pelek. 17 Basa boe ma Eber bei nasoda teuk 430 bali, ma ana hambu seluk ana tou anak ma ina anak.
18 Neu faik fo Pelek teuk 30, ana hambu ana tou anak esa, nade Rehu. 19 Basa boe ma Pelek bei nasoda teuk 209 bali, ma ana hambu seluk ana tou anak ma ina anak.
20 Neu faik fo Rehu teuk 32, ana hambu ana tou anak esa, nade Seruk. 21 Basa boe ma Rehu bei nasoda teuk 207 bali, ma ana hambu seluk ana tou anak ma ina anak.
22 Neu faik fo Seruk teuk 30, ana hambu ana tou anak esa, nade Nahor. 23 Basa boe ma Seruk bei nasoda teuk 200 bali, ma ana hambu seluk ana tou anak ma ina anak.
24 Neu faik fo Nahor teuk 29, ana hambu ana tou anak esa, nade Tera. 25 Basa boe ma Nahor bei nasoda teuk 119 bali, ma ana hambu seluk ana tou anak ma ina anak.
26 Neu faik fo Tera teuk 70 lenak, boe ma ana hambu ana tou anak telu, sila Abram, Nahor ma Haran.
Tera numbu-sadun nala
27 Tera numbu-sadun nala, leo iak: Tera anan nala, sila Abram, Nahor, ma Haran. Haran hambu ana tou anak esa, nade Lot. 28 Haran maten nai nggolo hehelin, nade Ur, nai hataholi Kasdim daen. Neu faik fo ana mate, aman Tera bei kasodak. 29 Abram sao nala Sarai. Nahor sao nala Haran ana ina anan, nade Milka. Haran boe oo hambu ana tou anak esa, nade Yiska. 30 Tehuu Sarai kaltedis, ta bisa bonggi.