Noh no Yafet numbu-sadun nala
10
Basa faa tuak, boe ma Noh anan nala hambu numbu-saduk. Fo ndia numbu-saduk neme Sem, Yafet ma Ham mai.2-5 Yafet numbu-sadun nala, sila Gomer, Magok, Madai, Yawan, Tubal, Mesek ma Tiras. Esa-esak no sila dede'an, leon, ma dae hehelin.
Gomer numbu-sadun nala, sila Askenas, Rifat ma Togarma.
Yawan numbu-sadun nala, sila Elisa, Tarsis, hataholi Kitim asa, ma Dodanim, fo mana leo lai tasi bifik kala.a
Ham numbu-sadun nala
6 Ham numbu-sadun nala, sila Kus, Misraim, Put, ma Kana'an.b
7 Kus numbu-sadun nala, sila Seba, Hawila, Sabta, Raema ma Sabteka.
Raema numbu-sadun nala, sila Syeba ma Dedan.
8 Kus ana tou anan Nimrod. Ndia ndia malangga natatik sososak fo ana seli. 9 Ndia ana selin neme MANETUALAIN mai, losa ndia boe oo, dadik mana sombu fo ana seli. Huu ndia de hataholi lateme kokolak lae, “Elan fo o dadik mana sombu fo ana seli sama leo Nimrod, fo ana hambu ndia ana selin neme MANETUALAIN mai.” 10 Sososan ndia dae baba'en mulai neme Babel, Erek Akad, ma Kalne mai. Basa sala lai Sinear.c 11 Neme ndia mai, ana koasa tamba Asyur. Basa boe ma ana nambadedei kota Niniwe, Rehobot-Ir, Kala, 12 ma Resen fo nai Niniwe ma Kala laladan. Basa sila, kota ina-huuk.
13 Misraim numbu-sadun nala, sila hataholi Ludim, Anamim, Lehabim, Naftuhim, 14 Patrusim, Kasluhim, ma Kaftorim. Hataholi Kasluhim ndia, sila hataholi Filistin asa bei-ba'in nala.
15 Kana'an ana ka'an, ndia Sidon. Kana'an boe oo dadik hataholi Het, 16 Yebusi, Amori, Girgasi, 17 Hiwi, Arki, Sini, 18 Arwadi, Semari, ma Hamati sala bei-ba'in nala.
Kana'an numbu-sadun nala latanggelak losa dook, 19 losa sila dae toon nala, mulai neme Sidon mai, nakandoo neni Gerar neu, losa nai Gasa. Neme ndia mai neni Sodom, Gomora, Adma, ma Seboim, losa nai Lasa.
20 Basa sila, Ham numbu-sadun nala. Esa-esak no sila dede'an, leon, ma dae hehelin.
Sem numbu-sadun nala
21 Yafet ka'an Sem, dadik hataholi Eber asa bei-ba'in.d
22 Sem numbu-sadun nala, sila Elam, Asyur, Arpaksad, Lud ma Aran.
23 Aran numbu-sadun nala, sila hataholi Us, Hul, Geter, ma Mas.e
24 Arpaksad anan, Sela. Sela anan, Eber.
25 Eber hambu ana tou anak dua. Ka'ak nade Pelek, (fo ndandaan nae, ‘lababa'ek’), huu faik ndia, hataholi la lababa'ek nai dae-bafok. Fadin, nade Yoktan.
26 Yoktan numbu-sadun nala, sila Almodad, Selef, Hasar-Mawet, Yera, 27 Hadoram, Usal, Dikla, 28 Obal, Abimael, Syeba, 29 Ofir, Hawila, ma Yobab. Basa sala ia, Yoktan numbu-sadun nala.
30 Sila mamana leleon ndia, mulai neme Mesa mai, nakandoo losa Sefar, fo ndia mamana lete mbukuk kala malai dulu.
31 Basa sila, Sem numbu-sadun nala. Esa-esak no sila dede'an, leon, ma dae hehelin.
32 Basa sila, Noh numbu-sadun nala, esa-esak no ndia leo hehelin. Neu faik fo faa tuak nate'e, sila ia latanggelak tao lahenu dae-bafok.