Manetualain mba'a heheluk no Noh
9
Manetualain fee baba'e-babatik neu Noh no anan nala, ma kokolak nae, “Ei bonggi mala makadotok, fo tao mahenu dae-bafok ia bali. 2 Dei fo basa banda fui, mbuik ma i'ak kala bii ei. Ei ndia musi heti sala. 3 Ei bole mi'a basa banda sila mbaan, sama leo ei bole mi'a sesele-ngganggalik kala buna-boan boe. Au fee basa ia leu ei.4 Kada ei ta bole mi'a mbaa fo bei kadaak, huu banda samanen nai daan. 5-6 Au akadadadik hataholi tungga Au mata-aong. Huu ndia de ta bole tao misa hataholi. Mete ma hambu hataholi, do banda, fo tao nisa hataholi, na, musi tao misa sala boe. Huhukuk ia neme Au mai. 7 Ei musi bonggi makadotok, fo tao mahenu seluk dae-bafok ia bali.”
8 Manetualain tuti kokolan bali nae, 9 “Hatematak ia, Au sangga mba'a Au hehelung ua ei, losa ei numbu-sadum mala boe. 10 Heheluk ia boe oo la'e basa masodak, fo ndia banda nakaboik, banda fui, ma mbuik kala. Keke'un, basa mana kalua sama-sama lo ei leme ofak ndia mai. 11 Au hehelung ndia, leo iak: Au ta haitua faa tuak bali, fo tao mate basa masodak, ma tao akalulutu basa dae-bafok ia.
12-13 Au tao elus neu lalai, suek dadik tanda nasanenedak neu Au hehelung fo ta namaketuk neu ei, no basa masodak ma dae-bafok ia. 14-17 Mete ma hambu ko'as nai lalai, boe ma elus sadu, na, dei fo ndia nasanenedak Au hehelung ndia nae: dei fo faa tuak ta tao nakalulutu basa masodak bali. No leo ndiak, Au hehelung fo ta mana basak ndia, nana mba'ak no ei ma basa mana masodak so.”
Noh mafuk
18 Noh anan nala fo mana kalua leme ofak ndia mai, sila: Sem, Yafet ma Ham. (Ham ndia, Kana'an aman). 19 Basa hataholi malai dae-bafok numbu-sadun nala leme Noh ana katelun nala mai.
20 Noh ndia, hataholi mana tao ue daek. Ndia ndia sososan tao osi anggol. 21 La'i esa, ana ninu anggol losa mafuk nalan seli. Boe ma ana odu heni balo'an, de sunggu lololi nakaholak neme ndia tendan dale. 22 Ledo-eik Ham nita aman nakaholan ndia, boe ma nalai deak neu, fo neu nafada ka'an Sem no Yafet. 23 Boe ma dua sala ha'i lala lafa esa, de ala lakambelan neu dua sala alun. Boe ma ala la'o lasadedeak leni tenda ndia dalek leu, fo mboti lala sila aman. No leo ndiak, ala ta lita sila aman nakaholan ndia. Boe ma ala deak leu.
24 Ledo-eik Noh mamafun mulai lea, boe ma ana bubuluk ana mate'a teisusun tataon. 25 De ana kokolak nae, “Heeh! Kana'an aman!a Au sumba-soo o! Dei fo o dadik o ka'am mala atan!
26 Koa-kiok neu MANETUALAIN! Elan fo Ana fee baba'e-babatik neu Sem!
Tehuu elan fo Kana'an dadik Sem atan.
27 Elan fo Manetualain tao namaloa Yafet daen;
Ma ndia numbu-sadun nala lasoda mole-dame lo Sem numbu-sadun nala.
Tehuu elan fo Kana'an dadik Yafet atan.”b