Dae mulai mada
8
Tehuu Manetualain ta nafalende heni Noh sala, ma basa banda malai ofak ndia. Boe ma Ana fee ani fo fumbu tao nale'e faa ndia. 2 Boe ma Ana tatana basa oe matak malai dae-bafok, ma fee uda hahae neme lalai mai. 3 De oe le'e nakandoo. Basa faik 150, boe ma oe ta madema so. 4 Nandaa no bulak kahitun seli faik 17, boe ma ofak ndia hala neu lete madema esa lain, naden Ararat. 5 Oe le'e nakandoo losa bulak kasanahulun fai kaesan, boe ma letek kala mboin nala mulai nana nitak. 6 Seli faik haa hulu, boe ma Noh soi ofak jendelan esa. 7 De ana mbo'i mbui kaa esa. Mbuik ndia laa nakandoo neu-mai, losa oe le'e tetebes so. Ana ta fali neni ofak neu so. 8 Boe ma Noh mbo'i seluk lunda esa bali, fo sangga bubuluk oe ndia le'e tetebes so, do beik. 9 Tehuu oe bei mboti nala basa dae-bafok, huu ndia de mbuik ndia ta hambu mamana sasa'ek. Boe ma ana fali neni ofak neu. Noh look liman fo simbo falik mbuik ndia, neni ofak dale neu.
10 Noh nahani faik hitu bali, de ana mbo'i seluk mbuik ndia. 11 Ledo bobon ndia, mbuik ndia fali neni Noh neu, ma neni ai setun dook esa, fo bei fo ana tutu nalan. Boe ma Noh bubuluk oe le'e tetebes so. 12 Ana nahani faik hitu bali, boe ma ana mbo'i seluk mbui lunda ndia. Tehuu oek ia, mbuik ndia ta fali so bali.
13 Neu faik fo Noh teuk 601, la'e bula kaesan fai kaesan, oe le'e tetebes so. Boe ma Noh soi ofak jendelan, de ana suli nafeok, te dae madak kala so. 14 Losa bulak kaduan, fai ka-27, dae mada tetebes so.
15 Basa boe ma Manetualain kokolak no Noh nae, 16 “Noh! Hatematak ia, ei basa nggei konda mima ofak ia mai leo. 17 Kalua heni basa banda sila! Fo ndia: banda nakaboik, banda fui, banda mana lae-lodok, ma mbuik kala. Ela basa sala boe lamano'u, ma tao lahenu dae-bafok ia.”
18-19 Basa boe ma Noh no saon, anan nala, ma feto-feun nala, basa sala kalua leme ofak ndia mai. Basa banda sila kalua boe, esa-esak no ndia numban.
Noh tao tunu-hotuk tanda makasi soa-neu Manetualain
20 Boe ma Noh nakatotodok batu, fo tao mei tunu-hotuk fee MANETUALAIN. Noh ha'i nala esa-esak neme banda la, fo bole paken neu tunu-hotuk. De ana hala ma tunu sala neu mei tunu-hotuk ndia lain, fo dadik tanda makasi neu MANETUALAIN. 21 Neu faik fo MANETUALAIN hae nala tunu-hotuk ndia naboo meni, boe ma dalen namahoko. De Ana dudu'a nae,
“Mulai neme hatematak ia mai, Au ta sumba-soo dae-bafok ia bali, huu hataholi manggalaun. Mae kada ala dudu'a manggalauk neme kadi'i anan mai, tehuu Au ta tao akalulutu basa masodak so bali, sama leo Au taok ndia so. 22 Mete ma dae-bafok ia bei nai ia, na, fai hanas ma fai oe faak la'ok lakandoo, tungga ndia heti-heun. Fo ndia: fai sele-nggalik ma fai ketu-koluk, fai makasufuk ma fai hanas, fai fanduk ma fai oe faak, leledok ma le'odaek.”