Faa tuak
7
Basa boe ma MANETUALAIN kokolak no Noh nae, “Au suli uni sudi bee uu, tehuu kada o mesa nggo dalem ndoos. Huu ndia de o mua o sao-anam mala maso ofak dalek miu leo. 2-3 Neme basa banda mata-matak kala mai, fo bole ei mi'a, ma bole mini fee Au, na, o muni pasan hitu-hituk neni ofak ndia dalek neu. Neme basa mbuik mata-matak kala mai, muni pasan hitu-hituk boe. Tehuu neme banda fe'ek kala mai, muni kada pasan esa-esak. No leo ndiak, banda ma mbuik kala sila dadik bini, fo hambu sala taa-taa.4 Masanenedak neulalau, baa! Te faik hitu bali, Au akonda uda ta no hahaen, leledo-le'odaek, faik haa hulu. No leo ndiak, Au tao mate basa masodak malai madak lain, fo Au akadadadik kasa so.”
5 Boe ma Noh tao tungga sama leo basa MANETUALAIN palendan. 6 Neu faik fo faa tuak mai ndia, Noh teuk 600. 7 Boe ma Noh no saon, ma anan nala, ma feto-feun nala, maso leni ofak ndia dalek leu, suek lasoda leme faa tuak ndia mai. 8-9 Tungga MANETUALAIN palendan ndia, boe ma Noh neni basa mbuik mata-matak, ma banda fe'ek kala, esa-esak no ndia pasan, bee fo hataholi bole na'an, ma bee fo hataholi ta bole na'an, leni ofak dalek leu. 10 Basa faik hitu, boe ma faa nggangga mai, de mulai mboti nala dae-bafok ia.
11 Nandaa no Noh teuk 600, seli bulak dua, ma faik 17, boe ma faa mai! Faik ndia, nonook leo bali lalai lelesun natahu'ak, de oe nggangga dae mai. Ma basa oe matak malai dae dale, ala kadi, de oe nasambumbulak deak mai. 12 Boe ma uda konda leledo-le'odaek ta no hahaen, losa faik haa hulu.
13 Tehuu faik ndia boe, Noh, saon, ma ana katelun nala, fo Sem, Yafet, ma Ham, ma feto-feun nala, maso leni ofak dale leu. 14 Ala maso sama-sama lo banda la, fo banda nakaboik, banda fui, banda mana lae-lodok, mbuik kala, ma banda fe'ek fo kalidak kala. 15-16 Pasan esa-esak neme basa mana masodak kala mai, maso leni ofak dale leu sama-sama lo Noh, sama leo Manetualain palendan neu ndia.
Ledo-eik basa sala maso so, boe ma MANETUALAIN nggoe ofak ndia lelesun.
17-19 Uda belak konda nakandoo losa faik haa hulu, boe ma faa boe hene namadema losa ofak bonu. Oe hene nakandoo losa mboti nala lete madema la. 20 Oe ndia hene ta no hahaen, losa deman meter hitu nai letek mboin.