Hataholi manggalaun
6
Faik ndia, hataholi boe lamano'u so. Boe ma ala lasoda latanggelak sudi nai bee nai dae-bafok ia so. Sila boe oo, bonggi lala ana ina anak kala. 2 Manetualain ana tou anan nala lita hataholi ana ina anan nala mana'a hiak. Boe ma ala hii sala,a de sao lala sala. 3 Boe ma MANETUALAIN nae, “Au manggu ua hataholi soda manggalaun so. Au Dulang fo fee sala lasoda ndia, ta nau ela sala lasoda lakandoo so bali.b Ala musi mate. De dei fo ala lasoda kada losa teuk 120.”4 Lelek ndia, ma lelek mana tunggak kala, hambu hataholi ao inahuu-madema nai dae-bafok so.c Neu faik fo Manetualain ana tou anan nala, sao lala hataholi ana ina anan nala, boe ma ala bonggi lala hataholi fo ana seli, fo ndia, malangga natatik kala fo nana nitak nai tutui lele uluk.
5 Faik ndia, MANETUALAIN nita hataholi malai dae-bafok, manggalaun nala ana seli so. Dalen nala dudu'a kada manggalauk lakandoo. 6 Boe ma MANETUALAIN fale dalen, huu Ana nakadadadik nala sala so, fo leo lai dae-bafok ia. Dede'ak ndia tao nala dalen hedis nalan seli. 7 Huu ndia de Ana kokolak nae, “No leo ndiak, dei fo Au tao akalulutu hataholi, fo Au akadadadik kasa nai dae-bafok ia so. Mbuik kala ma banda fe'ek kala boe oo Au tao akalulutu basa sala. Au fale dalek, Au akadadadik ala sala so.” 8 Tehuu kada Noh mesak kana, tao namahoko MANETUALAIN dalen.
Noh tutuin
9-10 Noh tutuin leo iak: ndia ana tou anan telu, fo ndia Sem, Yafet, ma Ham. Noh nasoda no ndoos, ma ta tao manggalauk. Lelek ndia, kada ndia mesak kana neulauk. Ana nasoda dekak no Manetualain.
11-12 Tehuu Manetualain nita basa hataholi fe'ek kala manggalauk. Kada sudi nai bee, hataholi dala sodan nala lakalulutuk lalan seli so. Manetualain nita hataholi nai dae-bafok kada manggalauk. 13 Boe ma Manetualain nafada Noh nae, “Sudi nai bee, Au ita kada hataholi manggalaun. De Au aketun so ae, Au sangga tao akalulutu dae-bafok ia no basa isin. 14 De leo iak, Noh! Hatematak ia, o tao mala ofa ina-huuk esa neme ai matea mai. Nai ofak ndia dalen, o tao kama la. Boe ma tao ter neu ofak ndia. 15 Ofak ndia, o taon nalun meter 133, ma loan meter 22, ma deman meter 13. 16 Tao mbunik neu ofak ndia no lindin deman meter seselik esa. O ba'e ofak ndia dadik tadak telu. Boe ma tao lelesu esa nai ofak ndia boboan.
17 Masanenedak neulalau! Dei fo Au akonda faa tuak, fo tao mate basa masodak malai dae-bafok ia, losa ta ela hata esa boe. 18 Tehuu Au nau mba'a heheluk ua o. Dei fo o maso muni ofak ndia muu sama-sama mua o saom, anam mala, ma feto-feum mala.
19-20 Neme basa banda la mai, o musi hele mala pasan esa-esak, fo muni sala leni ofak ndia dalek leu, suek ala lasoda sama-sama lo o. Sama leo banda nakaboik, mbuik kala, ma banda mana lae-lodok kala, fo suek basa sala lasoda. 21 O musi muni nana'ak mata-matak, neni ofak ndia dalek neu, soa-neu ei ma soa-neu banda la.”
22 Basa boe ma Noh tao tungga, sama leo basa Manetualain palendan.