1-2 Neu faik fo Manetualain nakadadadik hataholi, Ana tao mata-aon nala, sama leo Ndia mata-ao hehelin. Ana nakadadadik kasa touk ma inak. De Ana noke sala nae, “hataholi”, ma Ana fee sala baba'e-babatik.

3 Neu faik fo Adam teuk 130 so, ana hambu ana tou anak esa, mata-aon sama leo aman. Boe ma ana foi kakanak ndia, nade Set. 4 Basa boe ma Adam bei nasoda teuk 800 bali, ma ana hambu seluk ana tou anak, ma ina anak. 5 Ana mate neu faik fo teun 930 so.

6 Neu faik fo Set teuk 105, boe ma ana hambu ana tou anak esa, nade Enos. 7 Basa boe ma Set bei nasoda teuk 807 bali, ma ana hambu seluk ana tou anak, ma ina anak. 8 Ana mate neu faik fo teun 912 so.

9 Neu faik fo Enos teuk 90, ana hambu ana tou anak esa, nade Kenan. 10 Basa boe ma Enos bei nasoda teuk 815 bali, ma ana hambu seluk ana tou anak, ma ina anak. 11 Ana mate neu faik fo teun 905 so.

12 Neu faik fo Kenan teuk 70, ana hambu ana tou anak esa, nade Mahalalel. 13 Basa boe ma Kenan bei nasoda teuk 840 bali, ma ana hambu seluk ana tou anak, ma ina anak. 14 Ana mate neu faik fo teun 910 so.

15 Neu faik fo Mahalalel teuk 65, ana hambu ana tou anak esa, nade Yared. 16 Basa boe ma Mahalalel bei nasoda teuk 830 bali, ma ana hambu seluk ana tou anak, ma ina anak. 17 Ana mate neu faik fo teun 895 so.

18 Neu faik fo Yared teuk 162, ana hambu ana tou anak esa, nade Henok. 19 Basa boe ma Yared bei nasoda teuk 800 bali, ma ana hambu seluk ana tou anak, ma ina anak. 20 Ana mate neu faik fo teun 962 so.

21 Neu faik fo Henok teuk 65, ana hambu ana tou anak esa, nade Metusalak. 22 Basa de Henok nasoda dalek esa no Manetualain losa teuk 300 bali. Basa boe ma ana hambu seluk ana tou anak, ma ina anak. 23-24 Ana nasoda dalek esa nakandoo no Manetualain. Neu faik fo teun 365, boe ma mopon, huu Manetualain so'u nala ndia so.

25 Neu faik fo Metusalak teuk 187, ana hambu ana tou anak esa, nade Lamek. 26 Basa boe ma Metusalak bei nasoda teuk 782 bali, ma ana hambu seluk ana tou anak, ma ina anak. 27 Ana mate neu faik fo teun 969 so.

28 Neu faik fo Lamek teuk 182, ana hambu ana tou anak esa. 29 Lamek foi kakanak ndia, nade Noh, (hihii sama no dede'a de'ek esa ndandaan nae, ‘fee kokoe-nanasik’), huu ana nae, “Dei fo kakanak ia kokoe-nanasi tao namahoko ita dalen, neme ita tao ues mbilu-mbuse nai dae ia, fo Manetualain sumba-soon so.” 30 Basa boe ma Lamek bei nasoda teuk 595 bali, ma ana hambu seluk ana tou anak, ma ina anak. 31 Ana mate neu faik fo teun 777 so.