Neu faik fo dua sala ina-huu, Habel hoo banda, ma Kaen tao osi. 3 La'i esa, Kaen neni ndia osin buna-boan luma, fo fee MANETUALAIN. 4 Habel boe oo, neni ndia bi'i-lombo inan nala ana sososan. Ana hala bi'i-lombo sila, boe ma neni mbaa neulau ndoos fee Manetualain. MANETUALAIN nita leo ndiak, boe ma dalen namahoko neu Habel no ndia tunu-hotun. 5 Tehuu Ana ta hii Kaen no tunu-hotun ndia. Boe ma Kaen luli nalan seli, losa naoda.

6 Boe ma MANETUALAIN kokolak no Kaen nae, “Heeh, Kaen! Hatina de o luli leo ndiak? Talo bee de o maoda leo ndiak? 7 Mete ma o tao malole, na, neu ko Au simbok o no malole boe. Tehuu mata neuk! Mete ma o tao manggalauk, na, neu ko manggalauk ndia na'a nasafali o, sama leo meo kobo lafo. De mete ma o mahiik tao manggalauk, na, malolenak o timba heni memak kana leo!”

8 La'i esa, Kaen fufudi Habel nae, “Fadi! Mai fo ita la'o-la'o teni osi teu.”^a Ledo-eik ala losa ele, kada nggengge neuk, Kaen mbomboko nisa fadin.

9 Boe ma MANETUALAIN natane Kaen nae, “Heeh, Kaen! O fadim nai bee?”

Kaen nataa nae, “Au ta bubuluk ndia nai bee! Mae hetuk au ia, mana to'u ndia ein, do?”

10 Boe ma MANETUALAIN kokolak nae, “Hatina de o tao manggalauk leo ndiak? Boso mae hetuk, o bisa mafuni o fadim daan neu dae, te Au ita basan so! 11 Hatematak ia, sumba-sook la'e o so. Huu ledo-eik o tao misa o fadim, dae musi nala daan so. De hatematak ia, dae ndia ta bisa fee o masoda so bali. 12 Mete ma o tao osi, na, dae ta fee o buna-boak hata-hata so bali. Mulai neme hatematak ia mai, o maleu-laak muu-mai sama leo hataholi mana to'a-taak, fo mana sangga sodak nai dae-bafok ia.”

13 Tehuu Kaen sapa MANETUALAIN nae, “Awii! Manetualain! Talo bee de Manetualain fee sumba-sook belan seli, losa au ta lemba abe'in so bali? 14 Huu Manetualain husi heni au uma mamanak ia mai so, dei fo au dook uma Manetualain mai. Au aleu-laak uni sudi bee uu. Boe ma dei fo sudi see natonggo no au, na, neu ko ala tao lisa au.”

15 Tehuu MANETUALAIN nataa bala nae, “Ta leo ndiak! See tao nisa o, na dei fo Au hukun belan la'i hitu!” Boe ma MANETUALAIN tao tanda neu Kaen, fo suek hataholi la bubuluk, fo ala ta bole tao lisan. 16 Boe ma Kaen la'o ela mamanak ndia, de nakadodook neme MANETUALAIN mai. Ana la'ok losa mamanak esa, nai osi Eden boboan dulu. Mamanak ndia, nade Nod,fo ndandaan nae, ‘Leu-laak’. Basa boe ma ana leo neu ndia.

17 Basa boe ma Kaen sao, de saon nailu. Boe ma ana bonggi ana tou anak esa, ala foin, nade Henok. Ma Kaen nambadedei nggolok esa. De ana foi nggolok ndia, nade Henok, tungga anan naden. 18 Boe ma Henok anan, ndia Irad. Irad anan, Mehuyael. Mehuyael anan, Metusael. Ma Metusael anan, Lamek.

19 Lamek saon dua. Esa nade Ada, ma esa nade Sila. 20 Ada anan, nade Yabal. Ndia numbu-sadun nala, dadik mana hoo. Ala lasoda lali-lali, ma leo nai tenda. 21 Fadin, nade Yubal. Yubal numbu-sadun nala, dadik mana makaminak musiik, pake kinuk ma bua maliik, sama leo sasanu.

22 Lamek saon Sila bonggi Tubal Kaen. Ndia numbu-sadun nala dadik tuka besi, fo ala tao bua mata-matak neme besi, ma liti mai. Tubal Kaen feton, nade Na'ama.

23 La'i esa, Lamek soso'uk aon, neu saon dua sala matan nae, “Ei mamanene, ee! Isinaak tou anak esa tao au, tehuu au tao isan. 24 Hataholi mana tao nisa Kaen, hambu huhukuk la'i hitu. Tehuu mete ma hambu see sangga bala nahinda dalek neu au, na, ala hambu huhukuk la'i 77.”

25 Adam saon Hawa bonggi ana tou anak esa bali. Boe ma ala foi kakanak ndia, nade Set (fo ndandaan nae, ‘loo feen’), huu Hawa nae, “Manetualain loo fee au kakanak ia so, fo nggati Habel, fo Kaen tao nisak ndia so.” 26 Ta dook boe ma Set hambu ana tou anak esa, nade Enos.

Faik ndia, hataholi la mulai lakaluku-lakatele neu MANETUALAIN.