Hataholi ta nau namanene Manetualain
3
Neme basa banda fo MANETUALAIN nakadadadik lai dae-bafok ia so, mengge ndia malela masapepekon ana seli. La'i esa, mengge natane inak ndia nae, “Tetebes, do? Manetualain ka'i nae, ‘Ei ta bole mi'a ai boak, neme ai malai osi ia mai, hetu?”’ 2-3 Inak ndia bala nae, “Taa! Ai bole mi'a! Tehuu kada ai esa nai osi laladan, ndia Manetualain ka'i ai mi'an. Ana nae, ai ta bole mi'an, ma ta bole koi la'e boan, te dei fo ai mate.”
4 Tehuu mengge ndia nataa nae, “Wei, ndia ta tetebes! Ei ta mate! 5 Memak Manetualain ka'i leo ndiak, huu Ana bubuluk so, mete ma ei mi'a ai boak ndia, na, ei dadik malelak sama leo Ndia. Fo ei bubuluk bee ndia malole, ma bee ndia manggalauk.”
6 Boe ma inak ndia suli, te ai ndia lolen seli, ma boan nonook leo ladan seli. De ana dudu'a nae, “Mete ma au u'a ai boak ia, neu ko au dadik malelak.” Boe ma ana seu nala ai boak ndia, de na'a. Basa de neni fee saon, de na'a boe. 7 Dua sala la'a basa, bei fo ala bubuluk lae, dua sala makaholak. Huu ndia de ala nato akidook, fo babaa neu sila makaholan.
8 Ledo bobon ndia, lamanene MANETUALAIN la'o-la'o nai osi ndia. Boe ma dua sala leu kekek nai ai dean, fo suek MANETUALAIN ta nita sala. 9 Tehuu MANETUALAIN nanggou touk ndia nae, “Wei! Adam! O nai bee?”
10 Touk ndia nataa nae, “Au amanene Manetualain halan nai ia. Tehuu au mae, huu au makaholak. Huu ndia de au alai uu kekek.”
11 Boe ma MANETUALAIN nae, “See nafada nae o makaholak? Talo bee? Neu ko o mu'a ai boak fo Au ka'ik ndia so, hetu?”
12 Ana nataa nae, “Inak ia, fo Manetualain feen nanonoo no au, ndia fee ai boak ndia fo au u'a!”
13 Basa boe ma MANETUALAIN kokolak no inak ndia nae, “Hatina de o tao leo ndiak?”
Boe ma inak ndia nataa nae, “Te mengge kedi nala au! Huu ndia de au u'a ai boak ndia leo.”
Manetualain sumba-soo sala
14 Basa boe ma MANETUALAIN sumba-soo mengge ndia nae,
“Huu o tataom ia, Au huku o. Neme basa banda fe'ek kala mai, kada o mesa nggo hambu sumba-sook leo iak. Mulai neme hatematak ia mai losa o mate, kada o malae-lodok munik o kalam, ma kada o mu'a nai dae. 15 Au tao o mua inak ia, mamusuk makandoo. Ma ei dua nggei numbu-sadum mala leo ndiak boe. O numbu-sadum dei fo kiki nala hataholi ei tingga dean. Tehuu ndia numbu-sadun esa, dei fo tutu nakalulutu o langgam.”
16 Basa boe ma Manetualain nafada inak ndia nae,
“Dei fo Au tamba o doidosom neu faik fo o mailu, ma tamba hedis neu faik fo o bonggi. Mae leo ndiak, tehuu o boe oo, bei dokodoe makandoo o saom. Ma ndia ndia heti o.”
17 Boe ma Manetualain nafada touk ndia nae,
“O ta tungga Au palendang, tehuu tungga kada o saom hihiin, losa o mu'a ai boak fo Au ka'ik ndia so. Huu ndia de o boe oo hambu huhukuk. Ma dae boe oo hambu huhukuk. Mulai neme hatematak ia mai losa o mate, o musi tao ues mbilu-mbuse foi dae, fo o bisa hambu nana'ak. No tao ues leo ndiak, bei fo o masoda. 18 Mae o sele-nggali mata-matak, tehuu dae kada kalua dila-nggauk. 19 Boe ma o musi tao ues mbilu-mbuse, bei fo dae fee o nana'ak. O musi tao ues mbilu-mbuse leo ndiak losa mate. Au akadadadik o muma dae mai. De mete ma o mate, na, o fali dadik dae bali.”
20 Basa boe ma Adama foi saon, nade ‘Hawa’ (fo ndandaan nae, ‘kasodak’), huu ndia ndia, basa hataholi kasodak inan.
21 Boe ma MANETUALAIN tao balo'as neme banda loun mai, fo fee dua sala pake.
Manetualain husi heni Adam no Hawa
22 Boe ma MANETUALAIN kokolak nae, “Hatematak ia, hataholi la bubuluk so bee ndia malole, ma bee dia manggalauk, sama leo Ita. Boso losak sila boe oo, la'a ai boak ndia, neme ai fo mana fee sala lasoda lakandoo.” 23 Basa boe ma Ana husi kalua heni sala, leme osi Eden ndia mai, fo leni mamana fe'ek leu, lasoda no foi dae, fo lasoda leme dae buna-boan mai. 24 Manetualain husi heni sala, boe ma Ana nadenu ata kalidan nala leme nusa sodak mai,b fo leu lanea nai osi ndia boboan dulu. Ala to'u tafa nana leleuk neu-mai, fo mana mbilak leo ha'i. Manetualain nadenu sala kena dalak mana maso dalek neu, huu Ana ta nau hataholi la seu lala ai boak, fo fee sala lasoda lakandoo.