2
No leo ndiak, Manetualain nakadadadik lalai, ma dae-bafok no basa isin nala.2 Ana tao basa sala, boe ma fo'a mai, nandaa no fai kahitun, Ana hahae. 3 No leo ndiak, Ana tao fai kahitun dadik fai ina-huuk, neme fai fe'ek kala mai. Ana heti leo ndiak, huu Ana tao nate'e uen so, boe ma nai fai kahitun Ana hahae aon. 4a Manetualain nakadadadik lalai ma dae-bafok, tutuin leo ndiak.
Manetualain nakadadadik touk ma inak
4b Neu faik fo MANETUALAIN bei fo mulai nakadadadik lalai no dae-bafok ndia, 5-6 bei ta hambu sesele-ngganggalik esa boe, huu Ana bei ta nakonda uda. Faik ndia, kada hambu makamamasuk neme dae dale mai, fo nakataba dae-bafok. Ma bei ta hambu hataholi fo tao osi. 7 Basa boe ma MANETUALAIN ha'i nala dae faa, de taon dadik hataholi. Boe ma Ana fuu ani hahaek neni hataholi ndia idu bolon neu, de hataholi ndia nasoda tutik.
8 Basa boe ma MANETUALAIN tao nala osi esa, nai dae Eden boboan dulu. De Ana fee hataholi ndia, leo nai osi ndia. 9 Nai osi ndia dalek, Ana nakamomolik ai malole mata-matak so, ma ai fo hataholi bisa la'a no malada. Ana nakamomolik ai matak dua, nai osi ndia laladan boe. Ai esa, mete ma hataholi na'a boan, na, ana nasoda nakandoo. Tehuu ai esa bali, mete ma hataholi na'a boan, na, ana bisa bubuluk bee ndia malole, ma bee ndia manggalauk.
10 Hambu lee esa nai ndia, faa neme osi ndia mai. Lee ndia ba'en neu haa. 11 Ndia ba'e kaesan, nade Pison. Ba'ek ndia, e'o ndule dae Hawila, fo hambu lilo-mbilas no'uk. 12 Nai ndia hambu lilo-mbilas isi-isik, hambu ai daa kaboo menik, ma hambu batu manggadilak. 13 Lee ndia ba'e kaduan, nade Gihon. Ba'ek ndia, e'o ndule dae Kus.a 14 Ndia ba'e katelun, nade Tigris. Ba'ek ndia, dadik too, nai dae Asyurb boboan dulu. Ba'e kahaan, nade Efrat.
15 MANETUALAIN fee hataholi ndia, leo nai Eden, fo ana nakaneni neulalau osi ndia. 16 Boe ma Ana palenda hataholi ndia nae, “O bole mu'a ai boak sudi bee, neme basa ai malai osi ia dalek. 17 Tehuu hambu esa, fo o ta bole mu'an. Fo ndia, ai fo nafada bee ndia malole, ma bee ndia manggalauk. Mete ma o mu'an, na, neu ko o mate.”
18 Boe ma MANETUALAIN kokolak bali nae, “Ta malole, mete ma hataholi ia, mesak kana nasoda. De Au sangga tao feen nonook esa, fo nandaa noon.”
19-20 Faik ndia, MANETUALAIN la'u nala dae faa, de tao nala banda, ma mbuik mata-matak kala. Basa de Ana neni banda ma mbuik kala sila leu hataholi ndia, fo suek ana foi naden nala. Boe ma hataholi ndia, foi banda ma mbuik kala, esa-esak no naden. Tehuu ndia mesak kana bei ta hambu nonook esa, fo nandaa no ndia.
21 Basa boe ma MANETUALAIN tao hataholi ndia sunggu namanee. Ledo-eik ana sunggu, Manetualain ha'i nala kaihusu duin esa, de tatana falik hinak ndia. 22 Neme duik ndia mai, Ana taon dadik inak. Boe ma Ana fee inak ndia neu hataholi ndia. 23 Hataholi ndia nita inak, boe ma nae,
“Awii! Ia dei! Ia bei fo nandaa no au!
Ndia duin sama leo au duing.
Ma ndia ao-mbaan, sama leo au ao-mbaang boe.
Huu ndia dadi neme touk mai, de au foin, nade ‘inak’.”c
24 Huu ndia de touk musi la'o ela ndia ina-aman,
fo neu nasoda dalek esa no saon,
huu dua sala nana mba'ak dadik esa so.
25 Faik ndia, dua sala makaholak, tehuu ala ta lameda mae faa boe.