Nanti orang dong dapa idop kambali
12
Itu ana bua dari sorga sambung dia pung omong sang beta bilang, ‘Itu waktu, Tuhan Allah pung ana bua dari sorga dong pung panglima yang jaga lu pung bangsa tu, andia Mikael, nanti dia lia bae-bae sang dong. Te biar ada hari-hari susa, yang orang sonde parná rasa dari dolu-dolu waktu manusia dong baru mulai bekin negrí, sampe deng itu waktu. Biar bagitu ju, ma lu pung bangsa dapa salamat. Andia orang yang pung nama dong ada tatulis dalam Tuhan pung buku yang dapa salamat.a2 Banya orang yang su mati ais orang su kubur ame sang dong, nanti idop kambali. Dong saparu dapa idop yang batúl, yang sonde tau putus-putus. Dong saparu dapa idop kambali deng malu yang sonde tau putus-putus ju. Deng samua orang yang inga sang dong, rasa malu ju.b 3 Orang yang mangarti banya hal iko Tuhan pung pikiran, nanti basinar sama ke langit. Deng orang yang kasi tunju Tuhan pung jalan lurus sang banya orang, nanti dong manyala tarús-tarús sama ke bintang-bintang.
4 Ma lu, Daniel, musti jaga ini kata-kata dong, ko biar orang sonde tau. Lu musti taro segel di ini tulisan sampe hari kiamat. Te banya orang lari pi-datang ko mau cari tau soꞌal ini hal dong.’c
Hari kiamat
5 Ais itu ju, beta, andia Daniel, ada lia-lia. Tarús ada dua orang muncul datang. Satu badiri di kali pung pinggir di sablá sini. Satu badiri di kali pung pinggir di sablá sana. 6 Ju satu dari dong dua kasi tau sang itu ana bua dari sorga yang pake kaen lenan, yang ada di kali pung hulu sadiki, bilang, “Ini tanda heran dong, masi barapa lama, baru jadi?”
7 Ais, itu ana bua angka dia pung tangan dua-dua, ju angka sumpa bilang, “Beta sumpa bawa Tuhan Allah yang idop tarús-tarús pung nama. Bilang, masi tiga taon satenga, kalo Tuhan pung orang barisi dong pung kuasa su abis, na, ini hal dong samua su jadi.”d
8 Beta dengar itu ana bua pung omong, ma beta sonde tangkap dia pung arti. Ais beta tanya sang dia bilang, “Bapa. Nanti dia pung ujung karmana?”
9 Dia manyao bilang, “Daniel, dengar bae-bae sang beta. Itu hal dong bukan lu pung urusan. Lebe bae, lu pi suda, ko taro mata di lu pung urusan sandiri. Te ini hal dong tasambunyi tarús, sampe dunya kiamat.
10 Tuhan mau uji banya orang.
Andia, orang barisi deng orang jahat dong.
Ada orang saparu pung hati tamba barisi,
deng hati tamba lebe bae lai.
Orang yang mangarti hal iko Tuhan pung pikiran,
nanti tamba mangarti lai.
Ma orang jahat dong sonde barenti bekin jahat.
Sonde ada dari dong yang mangarti.e
11 Dari waktu itu orang jahat tu suru kasi barenti samua macam korban deng persembahan dong, deng kasi badiri satu barang yang sonde pantas, yang bekin kamomos tampa barisi sampe bekin noju itu tampa, ada saribu dua ratus sambilan pulu (1.290) hari.f 12 Ma orang yang bisa batahan sampe saribu tiga ratus tiga pulu lima (1.335) hari abis, nanti dong ontong.
13 Kalo lu, Daniel, lu musti batahan kuat ko bekin iko lu pung tugas sampe waktu lu mati. Ais baru lu bisa barenti cape. Ma nanti kalo dunya kiamat, lu idop kambali ko tarima ame lu pung bagian yang Tuhan su simpan memang kasi sang lu.’”