Tuhan yang jaga deng piara ame sang kotong
91
Biar ko bosong yang cari lindung ais tenga tarús,di Tuhan yang Paling Tinggi pung Ruma,
ais dapa tampa yang aman deng tanáng,
di Tuhan yang Paling Kuasa pung sombar.
2 Bosong yang nanti kasi tau sang TUHAN Allah bilang,
“Tuhan sama ke satu benteng yang paling aman.
Tuhan yang jaga sang beta tarús,
ko biar sonde ada satu apa ju yang bisa bekin apa-apa sang beta.
Andia ko beta parcaya tarús sang beta pung Tuhan.”
3 Te Dia yang angka ame sang lu ko jang kaná hiki,
ju Dia yang jaga sang lu ko biar panyaki ganas dong jang makan buang sang lu.
4 Dia mau jaga ko biar sonde ada satu apa ju yang kaná sang lu,
sama ke ayam mai yang tutu ame dia pung ana dong di bawa dia pung sayap.
Dia bekin iko Dia pung omong tarús-tarús.
Andia ko Dia yang tangkis ko pele ame sang lu dari hal jahat dong.
5 Sonde usa taku waktu malam,
kalo ada setan yang bekin bulu badan tabadiri.
Sonde usa taku waktu siang,
kalo ada ana pana yang ser datang pi sang lu.
6 Sonde usa taku waktu malam,
sang panyaki ganas yang mau makan buang sang lu,
sama ke satu binatang buas kodo ame dia pung mangsa.
Sonde usa taku waktu siang,
sang calaka yang mau datang kasi ancor buang.
7 Biar saribu orang jato di lu pung rebis,
ma ini hal jahat dong sonde sonto ame sang lu.
Biar sapulu ribu orang mati di lu pung sablá kanan,
ma ini calaka dong sonde sampe di lu.
8 Lu tenga nonton deng mata kapala sandiri sa,
ko lia Tuhan kasi hukum orang jahat dong.
9 Lu omong bilang, “Awii, TUHAN! Tuhan sama ke satu benteng yang paling aman,
yang jaga sang beta tarús!”
Tuhan yang Paling Tinggi,
sama ke satu ruma yang aman deng tanáng kasi sang lu.
10 Sonde ada hal jahat yang kodo ame sang lu.
Sonde ada calaka yang bisa datang deka di lu pung kelu dong.
11 Tuhan mau suru Dia pung ana bua dari sorga dong,
ko jaga deng piara sang lu di mana-mana.a
12 Andia ko dong koko ame sang lu,
ju dong angka sang lu ko biar lu pung kaki jang taꞌantok di batu.b
13 Lu pasti manáng di samua parkara,
sama ke lu inja-inja singa muda dong,
ko, giling kasi ancor ular babisa dong.c
14 Tuhan kasi tau bilang,
“Beta mau kasi salamat sang orang yang sayang sang Beta.
Beta mau jaga deng piara ame orang yang kanál sang Beta,
deng parcaya sang Beta ju.
15 Kalo dong pange minta tolong sang Beta,
Beta pasti manyao sang dong.
Kalo dong dapa susa deng sangsara,
Beta ada sama-sama deng dong.
Beta kasi salamat sang dong,
deng Beta kasi tunju hormat sang dong ju.
16 Dong pung hati tanáng,
te Beta kasi dong umur panjang,
deng Beta kasi tunju Beta pung kuasa yang kasi salamat sang Beta pung orang dong ju.”