Tuhan idop tarús, ma manusia ada dia pung batas
90
Lagu Puji ni, baꞌi Musa pake ko sambayang. Dia tu, orang yang sarakan dia pung diri anteru-anteru sang Tuhan.1 Tuhan, dolu-dolu dari nene-moyang dong sampe sakarang,
Tuhan sama ke botong pung tampa tenga yang aman.
2 Waktu Tuhan balóm bekin ame bumi,
balóm ada pulo-pulo,
balóm ada gunung dong,
Tuhan Allah su ada memang.
Dia sonde ada pung awal,
sonde ada pung ahir,
deng sonde ada pung batas.
3 Tuhan ator ko biar manusia musti mati,
ais kambali jadi abu.
Te Tuhan parenta bilang, “Dolu bosong su jadi dari abu.
Sakarang bosong musti kambali jadi abu lai.”
4 Tuhan sonde itong waktu, sama ke kotong.
Te iko Tuhan, saribu taon sama ke kamaren sa.
Ko, sama ke malam saparu sa.a
5 Sama ke satu mimpi ilang buang,
manusia pung idop bagitu ju,
te takuju sa, manusia bisa kaná sapu rata.
Manusia pung idop ju sama ke rumput yang mulai batunas papagi buta.
6 Ais waktu matahari nae, dia babunga bagus.
Ma waktu matahari mau tanggalám, dia su layu buang.
7 Kalo botong manusia rasa Tuhan pung mara,
botong ju layu buang.
Kalo Tuhan su masparak sang botong,
na, botong sonde bisa tahan ju.
8 Tuhan su buka botong pung sala-sala dong di Tuhan pung muka.
Ju sala-sala yang botong coba sambunyi dong,
kantara sama ke kalo Tuhan pung cahaya basinar pi dong.
9 Tuhan pung mara tu, barát,
yang botong pikol dari lahir sampe mati,
sampe botong putus napas deng babunyi masanggorok.
10 Biasa, botong manusia pung idop cuma tuju pulu taon sa,
deng kalo kuat, na, bisa dalapan pulu taon ju.
Biar bagitu, ma taon-taon bae dong,
ponu deng susa deng sangsara ju.
Sonde lama, te dong su ilang buang,
sama ke burung tarbáng ilang pi.
11 Sonde ada satu orang ju,
yang bisa pikir ame Tuhan pung mara,
sampe mangarti itu mara pung kuasa.
Yang batúl, orang musti hormat deng taku sang Tuhan,
te itu pantas kalo dong taku sang Tuhan pung mara ju.
12 Ajar sang botong ko jang buang-buang waktu parcuma.
Tolong ko botong itong hari yang ada pung batas dong,
ko biar botong tamba mangarti hal iko Tuhan pung pikiran.
13 Tuhan! Datang kambali su!
Jang tunggu-tunggu lai!
Botong musti tunggu sampe kapan?
Kasi tunju rasa kasian sang botong,
yang jadi Tuhan pung orang suru-suru dong.
14 Tiap pagi, botong mau rasa Tuhan pung kasi sayang,
yang sonde tau putus-putus.
Deng bagitu, salama botong masi idop,
botong bisa hati babunga tarús.
15 Bekin botong pung hari-hari yang sanáng dong,
sama deng jumla hari yang botong su parná rasa susa dong.
Ais ganti ame taon-taon yang botong su lia jahat dong,
deng taon-taon yang bae dong.
16 Kasi tunju Tuhan pung hebat sang botong
yang jadi Tuhan pung orang suru-suru dong.
Deng bekin kantara Tuhan pung kuasa,
ko biar botong pung ana-cucu dong bisa lia deng mata kapala sandiri ju.
17 Kasi tunju Tuhan pung hati bae sang botong,
te Tuhan yang ada pung hak parenta sang botong.
Jadi botong minta ko Tuhan bekin botong pung karjá dapa hasil bae.
Biar ko botong pung karjá kasi sang Tuhan sonde pulang kosong.