Esra dong mau pi Yerusalem
7
1-5 Lama-lama, waktu dong su bekin abis itu Ruma Sambayang Pusat, deng Artasasta ada pegang parenta di Persia, ada satu orang Yahudi, nama Esra. Dia turunan dari kapala agama dong. dia pung nene-moyang partama, andia ba'i Harun yang jadi agama Yahudi pung bos bésar yang partama. Harun barana ame sang Eliasar. Eliasar barana ame sang Pinehas. Pinehas barana ame sang Abisua. Abisua barana ame sang Buki. Buki barana ame sang Usi. Usi barana ame sang Serahya. Serahya barana ame sang Merayot. Merayot barana ame sang Asarya. Asarya barana ame sang Amarya. Amarya barana ame sang Ahitub. Ahitub barana ame sang Sadok. Sadok barana ame sang Salum. Salum barana ame sang Hilkia. Hilkia barana ame sang Asarya. Asarya barana ame sang Seraya. Seraya barana ame sang Esra.6 Ini Esra ni, juru tulis yang pintar, yang tau banya, so'al hukum deng atoran yang TUHAN Allah su kasi sang orang Isra'el dong lewat ba'i Musa. Tagal TUHAN suka buka jalan kasi sang Esra, andia ko raja Babel kasi sang Esra apa sa yang dia minta. Jadi sakarang Esra dapa isin ko barangkat dari Babel deng pulang pi kota Yerusalem. 7 Ma dia sonde pi sandiri. Te waktu raja Artasasta su pegang parenta tuju taon, ada orang Isra'el saparu dong yang iko pi deng Esra. Deng ada kapala agama dong, ada orang suku Lewi yang bantu-bantu kapala agama dong, ada tukang maen musik dong, ada tukang jaga pintu ruma sambayang dong, deng orang laen dong yang layani di Ruma Sambayang Pusat. Dong samua iko sama-sama pi kota Yerusalem.
8-9 Esra dong jalan kasi tenga Babel tanggal 8 April di itu taon. Ais dong sampe di Yerusalem tanggal 4 Agustus,a te Tuhan Allah yang Esra sémba tu, yang buka jalan deng tolong sang dia. 10 Tuhan tolong sang Esra bagitu, tagal Esra su putus ko rajin balajar TUHAN pung Atoran dong, dia rajin bekin iko Tuhan pung Kata-kata dong, deng dia ju rajin ajar Tuhan pung atoran deng Tuhan pung parenta sang orang Isra'el dong.
Surat yang raja Artasasta kasi sang Esra
11 Esra tu, kapala agama deng juru tulis yang rajin balajar deng rajin ajar TUHAN pung atoran deng parenta sang orang Isra'el dong. Jadi satu kali, waktu Esra balóm barangkat dari Babel, raja Artasasta kasi dia satu surat yang dia pung bunyi bagini:
12 “Salam dari beta, Artasasta, andia raja di atas raja dong. Beta tulis ini surat ni kasi Esra, andia kapala agama deng juru tulis yang ajar orang so'al Tuhan Allah di sorga pung Atoran dong.b
13 Beta su putus bagini:
Satu: dari samua orang yang tenga di mana-mana di beta pung da'era parenta dong, sapa sa dari bangsa Isra'el, ko, dari orang Isra'el dong pung kapala agama, ko, dari suku Lewi, yang rela mau iko pi kota Yerusalem sama-sama deng lu, su dapa isin bagitu dari beta.
14 Dua: beta deng beta pung tuju tukang kasi nasiat dong, suru ko bosong pi cari tau orang di propinsi Yahuda deng kota Yerusalem pung dudu-badiri. Cari tau kalo dong ada idop iko Tuhan pung Atoran yang ada di lu pung tangan, ko sonde?
15 Tiga: botong mau ko bosong ju antar bawa barang mas deng perak dari sini yang beta deng beta pung tukang kasi nasiat dong su kasi deng sanáng hati. Antar bawa pi kota Yerusalem, ko jadi persembahan dari botong, kasi pi orang Isra'el pung Tuhan Allah, te itu Dia pung tampa tenga. 16 Lebe dari itu, bosong ju bole bawa samua barang mas deng perak yang bosong kumpul ame dari anteru propinsi Babel, ko jadi persembahan kasi orang Isra'el pung Tuhan Allah pung Ruma Sambayang Pusat di Yerusalem. Ma rakyat deng kapala agama dong musti kasi dong pung persembahan deng rela hati. Itu sa. 17 Naa, bosong musti ati-ati ko pake ini persembahan dong ko beli sapi laki, domba laki, domba ana, hasil kabón makanan, deng hasil kabón anggor yang pantas. Te nanti itu samua musti jadi persembahan di meja korban di bosong orang Isra'el pung Tuhan Allah pung Ruma Sambayang Pusat di Yerusalem. 18 Waktu su bawa abis persembahan dong tu, kalo masi ada barang mas deng perak sisa dong, na, botong usul bagini: lu deng lu pung kawan dong sambayang ko cari tau bosong pung Tuhan pung mau, ais, na, bekin iko.
19 Ada ju alat dong yang botong deng orang laen dong su kasi sang bosong ko pake bekin ibadat di orang Isra'el pung Tuhan Allah pung Ruma Sambayang Pusat di Yerusalem. Bosong musti sarakan itu alat dong di muka umum di itu Ruma Sambayang. 20 Kalo lu ada kurang apa-apa kasi Tuhan pung Ruma Sambayang Pusat tu, na, lu bole pake pamarenta pung doi pajak. Te beta, andia raja, mau tanggong itu ongkos.
21 Beta, andia raja Artasasta, kasi kaluar ini parenta sang samua bendahara dong di propinsi di kali Efrat pung sablá matahari turun, bagini: Esra parlú apa sa dari bosong, na, bosong musti rajin cari jalan ko kasi sang dia deng jang ba'eok. Te dia tu, kapala agama deng juru tulis yang rajin balajar deng rajin ajar Tuhan Allah di sorga pung atoran dong. 22 Kasi dia uang perak sampe 3.400 kilo, padi-gandum sampe 9.000 kilo, aer anggor sampe 2.000 liter, minyak saitun sampe 2.000 liter, deng jumla garam sonde pake batas.c 23 Bendahara dong tu musti sadia kasi samua-samua yang Tuhan Allah di sorga su parenta so'al Dia pung Ruma Sambayang Pusat. Dong musti rajin bekin iko itu samua, ko biar Tuhan pung mara jang jato kaná di raja pung karaja'an deng raja pung ana-ana dong.
24 Ada satu hal lai. Beta kasi tau sang bosong bagini: bosong sonde bole kumpul pajak ko tagi bea dari kapala agama dong, dari orang suku Lewi dong, dari tukang musik dong, dari tukang jaga pintu dong, dari yang layani di Ruma Sambayang Pusat dong, ko dari orang laen yang bantu-bantu di Ruma Sambayang Pusat dong.
25 Esra, pake itu pintar yang Tuhan su kasi sang lu ko angka pamimpin deng hakim dong yang bisa ator rakyat dong di propinsi di kali Efrat pung sablá matahari turun. Dong tu, musti jadi orang yang tau Tuhan Allah pung atoran dong. Kalo ada orang yang sonde tau Tuhan pung atoran dong, bosong musti ajar sang dong ko biar dong tau. 26 Kalo ada orang yang sonde mau iko lu pung Tuhan Allah pung atoran dong, ko, sonde mau iko raja pung atoran dong, nanti kaná hukum memang. Itu hukuman bisa hukuman mati, bisa kaná usir buang, bisa ame bawa dong pung harta samua, ko, bisa lempar kasi maso dalam bui.”
Esra angka nae puji deng sukur kasi sang Tuhan Allah
27 Abis baca raja Artasasta pung surat tu, ju Esra angka nae puji kasi sang Tuhan Allah bilang, “Puji deng sukur kasi sang TUHAN, andia kotong pung nene-moyang pung Allah! Te Dia yang karjá di raja pung hati, ko biar raja sandiri mau bekin bae TUHAN Allah pung Ruma Sambayang Pusat di Yerusalem, ko kasi tunju itu Ruma pung hebat ju. 28 Beta mau kasi tau samua orang so'al Tuhan pung bae. Te Dia yang kasi tunju Dia pung sayang yang sonde pake barenti pi beta di muka raja, raja pung tukang kasi nasiat dong, deng raja pung pagawe dong yang hebat samua.
Andia ko beta pung hati rasa kuat, te TUHAN kasi tunju Dia pung hati bae sang beta. Ais beta kumpul ame pamimpin dong dari Isra'el ko kambali pi Yerusalem sama-sama deng beta.”