Daftar orang yang jalan sama-sama deng Esra kambali pi Isra'el
8
Esra tulis dia pung laporan bilang, “Ini daftar ni, kapala keluarga bésar deng dong pung orang dong yang iko sang beta dari Babel ko kambali pi Isra'el. Botong jalan waktu raja Artasasta pegang parenta:2 Dari Pihenas pung turunan, Gersom.
Dari Itamar pung turunan, Daniel.
3 Dari Daud pung turunan, Hatus (andia Sekanya pung ana).
Dari Paros pung turunan, Sakaria deng 150 laki-laki yang laen dong.
4 Dari Pahat-Moab pung turunan, Eli-Oenai (andia Serahya pung ana), deng 200 laki-laki yang laen dong.
5 Dari Satu pung turunan, Sekanya (andia Yahasiel pung ana), deng 300 laki-laki yang laen dong.
6 Dari Adin pung turunan, Ebed (andia Yonatan pung ana), deng 50 laki-laki yang laen dong.
7 Dari Elam pung turunan, Yesaya (andia Atalya pung ana), deng 70 laki-laki yang laen dong.
8 Dari Sefaca pung turunan, Sebaja (andia Mikael pung ana), deng 80 laki-laki yang laen dong.
9 Dari Yoab pung turunan, Obaja (andia Yehiel pung ana), deng 218 laki-laki yang laen dong.
10 Dari Bani pung turunan, Selomit (andia Yosifya pung ana), deng 160 laki-laki yang laen dong.
11 Dari Bebai pung turunan, Sakaria (andia Bebai pung ana), deng 28 laki-laki yang laen dong.
12 Dari Asgad pung turunan, Yohanan (andia Hakatan pung ana), deng 110 laki-laki yang laen dong.
13 Dari Adonikam pung turunan, Elifelet, Yehiel, deng Semaya datang dari balakang deng 60 laki-laki yang laen dong.
14 Dari Bigwai pung turunan, Utai, Sabud, deng 70 laki-laki yang laen dong.
Dong ni, laki-laki yang kambali pi Isra'el sama-sama deng beta.”
Esra dong siap-siap pi Yerusalem
15 Esra sambung dia pung laporan bilang, “Botong balóm pi, ma beta suru dong samua yang mau iko sang beta ko bakumpul di kali Ahawa pung pinggir. Botong tidor tahan di situ tiga malam. Beta pareksa bae-bae itu daftar nama dari kapala agama dong deng dari rakyat dong, ma sonde dapa orang turunan suku Lewi satu ju.
16 Ais beta pange datang barapa pamimpin dong, andia: Eliesar, Ariel, Semaya, Elnatan, Yarib, Elnatan, Natan, Sakaria deng Mesulam. Beta ju pange datang Yoyarib deng Elnatan, te dong tu orang yang mangarti banya hal. 17 Sampe deng sampe ju, beta kirim dong pi katumu sang Ido, andia orang suku Lewi dong pung kapala di Kasifya. Sampe di sana, ju dong minta ko dia, dia pung kelu dong, deng orang yang bantu di Ruma Sambayang Pusat, ko biar dong kirim kasi botong, orang yang bisa layani di Tuhan Allah pung Ruma Sambayang Pusat di kota Yerusalem.
18 Naa, Tuhan taro mata di botong deng kasi tunju Dia pung hati bae. Te dong kirim kasi botong satu orang nama Serebya, yang mampu urus banya hal. Dia tu, turunan Mahli dari suku Lewi, andia ba'i Isra'el pung ana. Dong ju kirim Serebya pung ana-ana, dia pung adi-kaka, deng dia sapupu dong, 18 orang. 19 Dong ju kirim Hasabya deng Yesaya dari turunan Merari, sama-sama deng dong pung ana-ana deng adi-kaka dong, 20 laki-laki. 20 Dong ju kirim 220 laki-laki ko layani di Ruma Sambayang Pusat. Raja Daud deng dia pung pagawe dong parná utus sang dong ko bantu orang Lewi di Ruma Sambayang Pusat tu. Dong pung nama satu-satu ada tatulis dalam daftar.”
Dong sambayang sama-sama, baru dong jalan
21 Esra sambung dia pung laporan bilang, “Waktu botong masi di kali Ahawa pung pinggir, beta suru ko botong samua puasa, ko biar bekin diri randá hati di Tuhan pung muka, deng minta ko Dia jaga sang botong, botong pung ana-ana, deng botong pung barang dong samua ko biar botong bisa jalan deng salamat. 22 Te beta malu minta sang raja ko dia kasi botong tantara jalan kaki deng tantara nae kuda dong, ko iko sama-sama deng botong deng jaga botong dari musu dong. Te botong parná kasi tau sang raja bilang, ‘Botong pung Tuhan Allah ada jaga deng piara samua yang sémba sang Dia. Ma Dia mara deng kasi hukum samua orang yang bale balakang sang Dia.’ 23 Andia ko botong puasa deng minta sang Tuhan bagitu. Ju Dia dengar botong pung sambayang.”
Esra pili ame kapala agama dong ko jaga Ruma Sambayang Pusat pung barang dong
24 Esra sambung dia pung laporan bilang, “Botong puasa deng sambayang abis, ju beta pili ame 12 kapala agama yang mampu, andia Serebya, Hasabya deng dong pung kawan sapulu orang lai. 25 Beta angka sang dong ko bawa deng jaga bae-bae sang Ruma Sambayang Pusat pung barang dong. Andia itu barang-barang yang dari raja, dia pung tukang kasi nasiat dong, dia pung pagawe dong, deng Isra'el pung rakyat, yang dong su sarakan sang botong. Beta ju timbang deng bagi kasi sang dong itu barang mas, pérak, deng mangkok dong. 26 Waktu beta bagi kasi sang dong itu barang mahal dong, beta timbang bae-bae ju. Beta sarakan kasi pi sang dong bagini:
pérak tulen, 20 ton;
alat pérak, 3.400 kilo;
mas tulen, 3.400 kilo;
27 20 mangkok mas, yang dia pung harga sama deng 8,4 kilo mas;
deng dua barang dari tambaga yang orang su goso bekin mangkilat, ko biar dong pung harga sama deng mas.a
28 Ais beta pasán sang kapala agama dong bilang, ‘Bosong ni, barisi kasi sang TUHAN Allah. Ini barang dong ni, barisi kasi sang TUHAN Allah ju. Orang dong su kasi ini barang mas-pérak dong deng sanáng hati, ko jadi persembahan kasi sang TUHAN, andia bosong pung nene-moyang dong pung Allah. 29 Andia ko bosong musti jaga deng lia bae-bae sang dong sampe bosong bisa timbang ulang deng sarakan di kapala agama dong pung bos-bos, orang suku Lewi dong, deng tua-tua adat Isra'el dong pung tangan di kota Yerusalem, ko dong taro dalam TUHAN Allah pung Ruma Sambayang Pusat.’
30 Timbang abis itu barang dong ju, itu kapala agama dong deng orang suku Lewi dong tarima dong pung tugas deng itu barang dong yang botong su timbang kasi sang dong, ko dong bawa pi kota Yerusalem ko taro di Tuhan pung Ruma Sambayang Pusat.”
Esra dong jalan pi Yerusalem
31 Esra sambung dia pung laporan bilang, “Tanggal 19 April,b botong jalan kasi tenga kali Ahawa pung pinggir, ko jalan pi kota Yerusalem. Tuhan taro mata di botong deng kasi tunju Dia pung hati bae sang botong. Dia piara sang botong, deng jaga botong dari musu dong, ko biar sonde ada yang jahat yang tepa sang botong di jalan. 32 Sampe di kota Yerusalem ju, botong barenti cape tiga hari.”
Esra dong sarakan barang mas-perak di Yerusalem
33 Esra sambung dia pung laporan bilang, “Sampe di Yerusalem lewat ampa hari ju, botong pi di botong pung Tuhan pung Ruma Sambayang Pusat. Botong maso pi dalam, ais botong timbang bae-bae itu barang mas, pérak, deng mangkok dong, ju sarakan pi di kapala agama dong pung tangan. Andia: Meremot (Uria pung ana), Eleasar (Pinehas pung ana) yang bakawan deng Meremot, deng orang suku Lewi dong, andia, Yosabad (Yesua pung ana), deng Noaja (Binui pung ana). 34 Dong ju itong deng timbang ame samua barang dong tu, ko biar samua tau sonde ada yang ilang. Ais ju dong tulis ame samua-samua.”
Esra pung laporan sampe di situ sa.
35 Ais itu ju, samua orang dong yang su pulang dari Babel bawa datang dong pung binatang korban dong. Dong bekin korban bakar kasi sang Isra'el pung Tuhan Allah. Dong kasi persembahan 12 sapi laki kasi sang samua orang Isra'el. Dong ju kasi 96 domba laki deng 77 domba ana. Dong kasi 12 kambing laki jadi korban hapus buang sala. Ini samua ni jadi korban bakar kasi sang TUHAN Allah.
36 Ais ju, orang yang baru pulang saparu, antar itu surat parenta dari raja kasi sang dia pung pagawe dong, deng dia pung gubernor dong di propinsi-propinsi di kali Efrat pung sablá matahari turun. Abis baca ju, dong iko bantu rakyat deng Tuhan pung Ruma Sambayang Pusat.