Raja Darius kirim surat nomer dua
6
Andia ko raja Darius suru orang pi pareksa bae-bae pamarenta pung tulisan sajara dari nene-moyang dong yang tasimpan di Babel. 2 Cari-cari, ma sonde dapa di situ. Ais dia pung ahir, dong dapa itu gulungan di Ahmeta, andia kota bésar di propinsi Media. Di itu gulungan ada tulis bilang:“Surat parenta:
3 Waktu raja Kores pegang parenta taon partama, dia kasi kaluar putusan so'al Ruma Sambayang Pusat di kota Yerusalem. Dia pung bunyi bagini: Bosong musti kasi bangun kambali Tuhan Allah pung Ruma Sambayang Pusat di kota Yerusalem. Musti kasi bangun kambali di tampa yang lama tu, andia itu tampa orang Yahudi dong bawa persembahan deng korban bakar dong. Bekin fondasi sama ke yang lama tu. Itu Ruma Sambayang pung lebar, andia 27 meter. Dia pung tinggi, 27 meter ju.a 4 Pake batu pahat bésar-bésar, susun tiga lapis. Di dia pung atas, taro balok kayu, satu lapis. Raja yang tanggong ongkos bangun samua tu.
5 Naa, dolu ada banya barang mas-perak dong di itu Ruma Sambayang Pusat di kota Yerusalem, yang orang Yahudi dong pake ko sémba sang Tuhan Allah. Ma raja Nebukadnesar rampas ame samua, ju bawa pi Babel. Sakarang bosong musti kasi kambali itu barang samua, ais taro parsís di tampa yang dolu dong.”
Itu tu, yang raja Kores tulis dolu-dolu.
6 Baca abis itu tulisan, ju raja Darius kirim surat parenta. Dia pung bunyi bagini:
“Ini surat ni, kasi Tatenai, andia gubernor propinsi di kali Efrat pung sablá matahari turun, ju kasi Setar-Bosnai deng kawan-kawan dong.
Bosong sonde bole pi sana! Bosong jang campor di kota Yerusalem sana, é!
7 Bosong jang ganggu dong pung karjá, ko biar dong bisa kasi bangun kambali Tuhan Allah pung Ruma Sambayang Pusat tu. Biar ko dong bangun di itu tampa yang lama tu. Biar ko propinsi Yudea pung gubernor deng bos-bos orang Yahudi dong karjá jalan tarús bagitu. Jang palang sang dong!
8 Ma lebe dari itu, beta parenta sang bosong bagini: Bosong musti bantu sang dong. Bosong musti bantu orang Yahudi pung bos-bos dong ko kasi bangun kambali itu Ruma Sambayang Pusat tu. Bosong musti tanggong itu ongkos bangun samua. Ame itu doi dari pajak yang bosong kumpul di bosong pung propinsi di kali Efrat pung sablá matahari turun. Itu karjá sonde bole putus, deng bosong jang ba'eok sadiki ju.
9 Te samua-samua musti siap ko kapala agama dong pake bekin korban persembahan dong di Yerusalem. Dong parlú apa, na, bosong musti sadia kasi sang dong. Conto ke: sapi laki yang muda, domba laki, domba ana ko jadi korban bakar kasi sang Tuhan Allah di sorga. Deng padi-gandum, garam, aer anggor, deng minya saitun yang dong parlú tiap hari. Jang lupa, ó! 10 Beta pung mau ko dong bisa bawa persembahan yang pantas, yang bekin sanáng Tuhan Allah pung hati. Deng bagitu, dong ju bisa sambayang minta ko Tuhan kasi tunju Dia pung hati bae sang raja, andia beta, deng beta pung ana-ana dong.
11 Dengar bae-bae, te beta su bekin atoran bagini: sapa yang langgar, ko, roba ini atoran ni, beta suru bosong musti cabu kaluar balok kayu dari itu orang pung ruma. Ais bekin tajam itu balok pung ujung ko pake tikam kasi mati itu orang. Ais kasi badiri itu balok deng dia pung mayat ko biar banya orang bisa lia sang dia. Tikam abis, bosong musti bongkar kasi ancor itu orang pung ruma ju, deng bekin jadi tampa buang kotoran sa.
12 Inga te, Tuhan Allah sandiri yang pili kota Yerusalem jadi tampa yang kasi tunju hormat sang Dia. Biar ko Dia yang kasi ancor buang raja sapa, ko negara mana yang langgar ini atoran, ko, bekin ancor Dia pung Ruma Sambayang Pusat tu. Beta, andia raja Darius, yang kasi kaluar ini parenta. Biar ko samua orang bekin iko deng bae. Bagitu su!”
Dong bekin kalár Ruma Sambayang Pusat, ais kasi dingin
13 Dengar itu parenta deng dia pung hukuman tu, andia ko itu orang dong rajin bekin iko raja Darius pung parenta samua. Itu orang dong tu, andia: Tatenai, yang jadi gubernor propinsi di kali Efrat pung sablá matahari turun, ais Setar-Bosnai deng dong pung kawan-kawan dong ju.
14 Jadi tua-tua Yahudi dong karjá jalan tarús. Bukan bagitu sa, ma Hagai deng Sakaria (andia bapa Ido pung ana), jadi Tuhan Allah pung jubir yang ajar sang dong deng kasi kuat dong pung hati ju. Lama-lama ju, dong bekin abis itu Ruma Sambayang Pusat iko Tuhan Allah pung parenta, deng iko parenta dari orang Persia dong pung raja-raja. Andia: raja Kores, raja Darius, deng raja Artasasta.b 15 Dong karjá abis itu Ruma Sambayang Pusat tanggal 12 Maret, waktu raja Darius su pegang parenta 6 taon.c
16 Waktu su bangun kasi abis itu Ruma Sambayang Pusat tu, ju orang Isra'el dong samua kasi dingin itu Ruma. Dong tu, andia kapala agama dong, orang dari suku Lewi yang layani hari-hari di itu Ruma, deng samua orang yang su pulang dari negrí Babel dong. Dong samua pung hati talalu sanáng. 17 Waktu dong kasi dingin itu Ruma Sambayang tu, dong horo 100 sapi laki muda, 200 domba laki, deng 400 domba ana (ana domba laki) jadi korban persembahan. Dong ju horo 12 kambing laki ko jadi korban hapus dosa sang 12 suku Isra'el dong.
18 Kasi dingin abis, ju dong bekin roster karjá kasi kapala agama dong, deng orang suku Lewi dong, ko biar tiap kalompok layani di Tuhan Allah pung Ruma Sambayang Pusat di Yerusalem, iko apa yang su tatulis di ba'i Musa pung tulisan dong.
Dong makan pesta Paska
19 Kaná deng tanggal 21 April,d samua orang yang pulang pi Isra'el dari Babel makan pesta Paska. Dia pung carita bagini:e
20 Dong bole bekin bagitu, te kapala agama dong deng orang suku Lewi yang biasa bantu layani di Ruma Sambayang Pusat dong, su bekin barisi diri iko atoran. Ais dong horo domba ana ko bekin pesta Paska kasi samua orang yang su pulang dari Babel, kasi kapala agama yang laen dong, deng kasi dong pung diri ju.
21 Naa, badeka deng kota Yerusalem ada bangsa-bangsa yang idop kamomos, yang sonde idop iko Tuhan pung jalan lurus. Ma ada orang saparu ju yang sonde iko campor deng dong pung jalan idop yang sonde batúl. Ais, waktu kapala agama dong su bekin korban binatang abis, samua orang yang pulang dari Babel dong makan pesta Paska sama-sama deng orang yang su kasi pisa diri deng idop barisi, ju sémba sang orang Isra'el pung TUHAN Allah. 22 Dong rame-rame sanáng makan Pesta Roti Sonde Pake Ragi yang jalan tuju hari tu, te TUHAN yang bekin dong rasa sanáng. Te Tuhan yang su bekin uba raja Asyurf pung hati, ko biar dong bisa kasi bangun kambali Tuhan pung Ruma Sambayang Pusat sampe kalár. Apalai dia ju bantu sang dong.