Orang bangsa laen dong sonde suka kalo orang Yahudi dong kasi bangun kambali Ruma Sambayang Pusat
4
Orang laen yang bukan Yahudi dong yang tenga di itu da'era, dong malawan tarús sang orang suku Yahuda deng suku Benyamin yang su pulang dari tana Babel dong. Itu musu dong dapa dengar bilang, orang yang su pulang dong ada kasi bangun kambali Ruma Sambayang Pusat kasi sang orang Isra'el pung TUHAN Allah. 2 Andia ko itu musu dong datang cari sang Serubabel deng tua-tua adat laen dong, ko kasi tau bilang, “Botong mau bantu bangun sama-sama deng bosong. Te botong ju sambayang kasi Tuhan yNG sama ke bosong. Botong ju biasa kasi korban sang Dia mulai dari raja Esar-Hadon dari negrí Asyur yang paksa botong pung nene-moyang dong pinda datang di sini.a b3 Ma Serubabel, Yesua deng tua-tua adat Isra'el yang laen dong manyao bilang, “Jang mara, ma sonde bisa. Te ini tugas ni, botong pung urusan sandiri sa. Bosong sonde ada pung bagian dalam botong pung tugas ko kasi bangun kambali botong orang Isra'el pung TUHAN Allah pung Ruma Sambayang Pusat. Botong sandiri sa yang kasi bangun kambali, sama ke raja Persia, andia raja Kores su parenta ame sang botong.”
4 Ais ju, musu dong mulai coba-coba bekin taku sang orang suku Yahuda dong, ko biar dong ilang samangat ais sonde bangun lai itu Ruma. 5 Ju itu musu dong sogok pagawe barapa orang ko mau bekin rusak orang Yahuda pung rancana dong, ko biar dong jang karjá lai. Ini masala jalan tarús salama raja Kores pegang parenta di Persia sampe raja Darius ganti sang dia ko pegang parenta di Persia.
Lewat 60 taon, ju orang bangsa laen dong coba ulang lai ko orang Yahudi jang kasi bangun Ruma Sambayang Pusat
6 Lewat barapa taon, parkara yang sama jadi ulang lai, waktu Ahasuweros baru pegang parenta taon partama di Persia.c Te itu waktu orang suku Yahuda pung musu dong tulis surat kasi dia, ko lempar sala sang orang Yahuda deng orang yang tenga di kota Yerusalem dong.d
7 Deng satu kali lai, waktu Artasasta pegang parenta di Persia,e orang suku Yahuda pung musu dong bekin parkara yang sama. Te musu dong pung bos-bos, andia Bislam, Mitredat, Tabeel deng kawan-kawan tulis surat ko lempar sala lai. Dong tulis itu surat pake bahasa Aram. Waktu itu surat sampe di Persia, orang salin pi bahasa Persia ko biar raja bisa mangarti itu surat pung isi.
8 Tarús, Rehum, andia gubernor di propinsi Yahuda, deng Simsai, andia dia pung sekretaris istana, tulis satu surat ko lapor itu parkara di kota Yerusalem tu kasi sang raja Artasasta. 9 Di itu surat, Rehum deng Simsai titip salam dari dong sandiri, deng dari dong pung kawan-kawan, hakim-hakim, pagawe-pagawe, tua-tua adat, orang dari kota Erek dong, orang dari Persia dong, orang dari Babel dong, deng orang dari kota Susa dong (andia dari propinsi Elam). 10 Dong ju titip salam dari suku-bangsa laen dong yang raja Asnapar yang mulia parná usir buang sang dong pi kota-kota di Samaria deng di propinsi-propinsi di kali Efrat pung sablá matahari turun.
11 Itu surat yang dong tulis kasi raja Artasasta tu, dia pung bunyi bagini:
“Bapa raja yang mulia! Ini surat ni, dari bapa raja pung hamba-hamba dong di kali Efrat pung sablá matahari turun. Botong kirim salam.
12 Botong samua rasa kalo bapa raja parlú tau ini hal. Andia, orang Yahudi dong yang datang di kota Yerusalem dari Babel ada kasi bangun satu kota bésar. Dong sonde mau bekin iko bapa raja pung parenta, te dong orang jahat samua. Dong su bekin bae kambali fanderen dong, ais su mau bekin kalár itu tembok kuliling kota.
13 Bapa raja ju parlú tau bilang, kalo ini orang Yahudi dong su kasi bangun kambali abis itu kota deng dia pung tembok kuliling, na, nanti bapa raja rugi. Te dong sonde mau bayar pajak, bea, balasteng sang bapa raja lai.
14 Naa, botong ni, bapa raja pung rakyat yang bae. Andia ko botong sonde mau lia orang bekin rusak bapa raja pung nama deng kuasa. Andia ko botong musti lapor ini hal dong di bapa raja ko biar bapa raja tau.
15 Botong ada mau usul bagini: pareksa bae-bae pamarenta pung tulisan sajara dari nene-moyang dong. Di situ bapa raja bisa dapa tau bilang, dolu orang dari itu kota dong parná coba malawan sang pamarenta di Babel. Andia ko raja-raja dari Babel kirim tantara ko kasi ancor buang itu kota. Dari dolu-dolu tu, orang kota Yerusalem dong bekin kaco deng bekin onar negrí-negrí yang laen dong. Andia ko itu kota kaná ancor buang. 16 Jadi, iko botong, kalo dong jadi bekin kalár itu kota deng dia pung tembok kuliling tu, nanti bapa raja sonde akan pegang parenta lai di propinsi-propinsi di kali Efrat pung sablá matahari turun.”
17 Ais ju, raja Artasasta balas dong pung surat deng tulis bagini:
“Salam kasi sang gubernor Rehum, Simsai, andia dia pung sekretaris istana, deng dong pung kawan-kawan yang tenga di propinsi Samaria deng di propinsi-propinsi di kali Efrat pung sablá matahari turun yang laen.
18 Itu surat yang bosong tulis pake bahasa Aram, ais kirim kasi sang beta tu, orang su salin pake botong pung bahasa sini, ais dong su baca kasi beta. 19 Baca abis ju, beta suru orang ko pareksa bae-bae pamarenta pung tulisan sajara dari nene-moyang dong. Tau-tau te bosong pung omong yang batúl. Te dolu-dolu orang kota Yerusalem su lama baparáng malawan sang raja-raja dong. Dong ju omong tar bae so'al pamarenta, deng jadi tukang kipas ko biar rakyat dong sonde usa dengar sang pamarenta lai. Su lama bagitu!
20 Padahal, ada banya raja yang kuat yang su pegang parenta di Yerusalem sana deng di propinsi-propinsi di kali Efrat pung sablá matahari turun yang laen. Ais rakyat dong su bayar banya pajak, bea deng balasteng kasi sang dong.
21 Andia ko sakarang bosong musti kasi tau orang kota Yerusalem dong bagini: Raja bésar tu suru ko dong barenti tahan, ko jang kasi bangun kambali kota Yerusalem dolo. Cuma kalo beta kasi turun keputusan baru, yang kasi tau ‘bole’, baru dong bole mulai karjá lai ko kasi bangun kambali itu kota yang su ancor tu. 22 Jang pake tunggu-tunggu lai. Te sonde bae kalo kotong kasi biar dong bekin tamba kaco deng tamba rugi lai.”
23 Tarima ame raja bésar pung surat tu, ais Rehum, Simsai deng kawan-kawan dong capát-capát pi kota Yerusalem ko suru orang Yahudi dong barenti karjá.
[Ini parkara jadi partama kali waktu Serubabel dong ada karjá. Parkara yang sama tu jadi ulang lai, waktu raja Artasasta pegang parenta.]
Serubabel dong mulai karjá ulang lai
24 Serubabel deng dia pung orang dong yang karjá deng dia, su dapa takán ulang kali dari orang laen dong yang tenga badeka. Andia ko dong barenti kasi bangun kambali Tuhan pung Ruma Sambayang Pusat di kota Yerusalem. Sonde ada yang maju sadiki ju sampe raja Kores dari Persia pung pegang parenta maso dua taon.f g