Dong mulai pake meja korban baru
3
Waktu su sampe bulan Oktober,a waktu orang Isra'el dong su ator abis tampa tenga di dong pung kampong sandiri-sandiri, ais dong samua datang bakumpul di kota Yerusalem. 2 Ju Yesua (andia bapa Yosadak pung ana) deng dia pung kawan kapala agama dong, Serubabel (andia bapa Sealtiel pung ana) deng dia pung adi-kaka dong, mulai bekin kambali meja korban kasi sang orang Isra'el pung Tuhan Allah. Te dolu, tantara Babel dong su kasi ancor buang sang itu meja. Jadi sakarang Serubabel dong bekin meja baru, ko biar dong pake bekin korban bakar kasi pi Tuhan, iko apa yang tatulis di Tuhan pung Atoran dong yang Dia kasi turun pi Dia pung orang, andia ba'i Musa.b 3 Biar dong taku sang orang dari bangsa laen yang tenga badeka deng dong, ma dong bekin itu meja korban baru di atas dia pung tampa lama dolu-dolu tu. Ais ju dong langsung mulai bekin korban bakar kasi sang TUHAN di atas itu meja. Dong bekin bagitu tiap matahari nae deng matahari turun.c4 Naa, sama ke su tatulis di Tuhan pung Atoran yang Dia kasi sang Musa tu, dong mulai bekin iko acara agama dong. Yang partama, dong bekin Pesta Teng yang jalan dalapan hari. Ju dong bekin korban bakar tiap hari, iko itu hari pung atoran.d
5 Ais itu ju, dong mulai bekin korban bakar yang tatáp. Conto ke: korban bakar bulan baru, deng korban bakar tiap taon yang dong kasi persembahan pi sang TUHAN. Ada itu korban wajib dong, ada ju korban rela yang orang dong kasi dari dong pung hati pi sang TUHAN.e
6 Waktu baru tenga 15 hari baru Pesta Teng, dong balóm mulai bekin fanderen di TUHAN pung Ruma Sambayang Pusat, ma dong su mulai bekin korban bakar kasi sang TUHAN.
Dong mulai kasi bangun kambali Tuhan pung Ruma Sambayang Pusat
7 Ais ju rakyat dong bayar tukang batu deng tukang kayu. Dong beli banya pohon arasf dari orang kota Tirus deng kota Sidon dong. Dong bayar pake makanan, aer anggor deng minya saitun. Orang yang tabáng itu pohon dong bawa turun itu kayu dong dari gunung-gunung di Libanon, ais hela ta'apung sang dong pake kapal iko-iko pinggir Laut Tenga sampe di kota Yope. Te negara Persia pung raja, andia Kores, su kasi loos ko dong bekin bagitu.
8 Waktu dong su pulang pi Yerusalem maso dua taon, kira-kira bulan April tua,g dong mulai kasi bangun kambali TUHAN Allah pung Ruma Sambayang Pusat. Yang iko karjá dong, andia samua orang yang su pulang dari Babel. Serubabel (andia Sealtiel pung ana), Yesua (andia Yosadak pung ana), deng dong pung adi-kaka kapala agama dari suku Lewi dong, ju iko karjá. Orang suku Lewi, mulai dari umur 20 taon pi atas, jadi mandor kasi tiap kalompok orang karjá dong. 9 Yang urus itu mandor dong, andia Hodavia pung turunan (andia Yesua deng dia pung ana-ana, Kadmiel deng dia pung ana-ana dong). Henadad pung turunan dari suku Lewi iko bantu sang dong ju.
10 Waktu dong mulai bangun Ruma Sambayang Pusat pung fanderen, kapala agama dong pake dong pung baju panjang, ais dong ame dong pung tampa di acara ko fuu tarompet dong. Asaf pung turunan dong dari suku Lewi puku gong kici ju. Samua tu, iko raja Daud pung parenta dolu-dolu ko angka nae puji sang TUHAN.h 11 Ju dong manyanyi satu babalas satu, ko angka nae sukur sang TUHAN bilang,
“TUHAN talalu bae!
Te Dia pung sayang sang orang Isra'el dong,
sonde pake barenti!”
Ais ju, samua orang batarea ukur kuat ko angka nae puji sang TUHAN, tagal dong su mulai kasi bangun kambali Ruma Sambayang Pusat pung fanderen tu.i
12 Ada banya kapala agama deng orang suku Lewi dong yang su tua, yang masi inga Tuhan pung Ruma Sambayang Pusat yang lama tu. Andia ko dong manangis kuat-kuat waktu dong lia fanderen baru tu. Deng ada laen lai ju yang batarea ukur kuat ko kasi tunju dong pung rasa sanáng. 13 Dong pung suara manangis deng dong pung suara sanáng talalu baribut, sampe-sampe orang sonde bisa bekin beda mana yang manangis deng mana yang sanáng. Orang yang di jao-jao dong ju dapa dengar itu suara.