Nai' Yohanis ankius niit neno tunan ma pah-pinan mamaas fe'u
21
Rarit au 'kius 'iit neno tunan ma pah-pinan huum maas fe'u, fin neno tunan ma pah-pinan huum maas amnaa' namnekun nrarin. Tais je msa', ka mamnita' fa gwen.a 2 Rarit au 'kius 'iit Uisneno In kota kninu', es re' Yerusalem Fe'u, ansaun neem na'ko sonaf neno tunan. Kota naan nabarab anrair, on re' baroit bifee re' he nnao nseun in mone.b 3 Rarit au 'neen hanaf ma'tain es, anpoi na'ko 'toko prenat naan am nak,“Amkius mirek-reko'!
Anmurai oras ia, Uisneno In Umi et mansian ii sin sonak ma sin atnaank ein.
Anmurai neno ia, Uisneno anmoin nabu-bua nok Iin na.
Fin In njair sin Uisneno.
Ma sin anjarin In aanh ein.
In of nok sin piut-piut.
Ma In nabu-bua nok sin nabar-baar.c
4 In of annoes nain sin maat nuu nggwin,
he sin kais ankae npin-piuns ein antein.
Natuin anbi bare naan, ka tiit tain fa amenat antein.
Ma nbi bare naan, ka tiit tain fa amates antein.
Are' kanan rais susat nana'renat re' un-unu' te, nasusab ma nnana'renab, ka tiit attein sin fa gwen.
Are' kanan ha'mu'it ma ma'ne'at re' un-unu' te nha'mui', namnekun nrarin.”d
5 Rarit In re' antuun On anbi 'toko prenat naan, na'uab am nak, “Amkius mirek-reko', natuin Au u'fe'u are' kanan saa'-saa'.” Rarit In na'uab antein neu kau mnak, “Amtui nai! Are' kanan mansian bisa npirsai Au Uabk ein, natuin uab ein naan, ro batuur!”
6 Rarit In natoon antein kau mnak,
“Are' saa'-saa' re' Au 'ba'an 'ain sin na'ko afi unu' naan, njarin nrarin.
Natuin Au re' ia,
Alfa ntea Omega.
Ma Au re' ia,
A ntea Z,
Are' saa'-saa' ii na'uun ma na'ba'an nbin Kau,
anmurai na'ko ahunut ntea amunit.
Are' kanan mansian ameon oe,
Au of a'feen sin oe ma ninun kuuk ruum-ruum aah,
na'ko oe mata' re' neiki 'honis, maut he mansian ein anmonin batuur.e
7 Are' kanan mansian re' naran ma natuin Uisneno In raan a'honis amneot ma amnonot,
sin of antoup naan kuuk tetus-athoen ein re' ia.
Fin Au of a'jair sin Uisneno,
ma sin anjarin Au aanh ein.f
8 Mes anmui' tuaf bian re' of anporin napoitan sin,
neun tais ai bariri, re' npiin ka nasnaas niit fa.
Nahuum on re' atoin amtaus,
tuaf re' nkoit Nai' Yesus,
tuaf re' an'oemeet,
tuaf re' anmakaken ma nmakonin nok tuaf re' sin ka moen ja fa, ai' ka fee ja fa,
aroor mansian,
afuat neu nitu,
araut,
ma aputa-kriut.
Sin ar-arsin naan of nait inporin sin neu tais ai,
re' anteek ee nak, ‘bare' 'maten no nuan ii.’”
Nai' Yohanis ankius niit kota Yerusalem huum maas fe'u
9 Onaim au 'kius 'iit tuaf es na'ko tua hiut ein na'kon sonaf neno tunan re' neon gwes ii anna'an bokor re' matua' nok Uisneno In to'os. In neem nateef nok kau, rarit na'uab am nak, “Uum meu ia fe'! Natuin au he ukrira' ko baroit bifee re' he nkabin nok 'Bib-kaes Ana'.”
10 Onaim Uisneno In Asmaan Akninu' ntoom kau. On naan amsa' ameput sonaf neno tunan tuaf es neik kau 'sae 'eu 'toe'f es, re' 'raat re'uf. Anbi naan, in na'krira' kau kota Yerusalem, es re' Uisneno In kota kninu' naan, re' ansaun neem na'ko Uisneno nbi sonaf neno tunan.g 11 Kota naan reok re'uf! Anmui' me'u re' ntana' npoi na'ko Uisneno In pina' ma kraha', on re' faut intan re' nariim. Tar antea kota naan me'u ok-oke'. 12 Anmui' rame' namteut nfuun natef-tefan kota naan. Anmui' eon ko'u bo'es am nua. Anmu'i ameput sonaf neno tunan tuaf bo'es am nua msa', re' anpao eon' ein naan. Anbi eon' ein naan, matu'i uuf bo'es am nua na'ko pah Isra'el sin kaank ein.h 13 Eon ko'u teun nbain ein neu pasa' neon-saet. Teun anbain ein neu pasa' neon-teas. Teun anbain ein neu pasa' ponain. Ma tenu ntenin nbain ein neu pasa' haa'-nua.i 14 Rame' naan nahaek ee nbi faut fanderen kou'-ko'un fua' bo'es am nua. Anbi fatun naan mese'-mese' matu'i kanaf tuaf mese'-mese' na'ko haef tuaf bo'es am nua. Haef ein naan esan re' antuthae 'Bib-kaes Ana' oras In nbi pah-pinan.
15 Rarit tuaf ameput re' na'uab neu kau naan, annaa' hau ukur amnatu' noon es, he n'ukur kota naan in eon ko'un ma in rame'.j 16 In n'ukur nahuun neu kota naan in rame' re' on re' segi empat. In amnanun ma mnaun paran, 'ratan huma' mese', es re' kiru nifun nua mnatun nua mbo' nua (2.220).k 17 Rarit in n'ukur rame' naan in mafaun, meter bo' nee mniim, natuin mansian ii in hau ukur.l 18 Rame' naan, sin nmoo' je na'ko faut arimat, re' in kaann ee, yaspis. Ma are' kanan saa'-saa' re' anbi kota naan in nanan, sin nmoo' je na'ko mnaut afa' re' nrear on re' ninu.
19 Faut fanderen fua' bo'es am nua re' naan, anmoe' sin na'kon faut arimat huma'-huma' re' ma'osa'. Faut fua' ahunut naan, npaek faut yaspis re' anpiin snaa mamate'. Faut fua' nuan ii, npaek faut nilam re' anpiin snaa biru. Faut fua' teun ii npaek faut mirah re' anpiin snaa me'e. Faut fua' haan ii npaek faut samrut re' anpiin snaa mamate'. 20 Faut fua' niim ii, npaek faut unam re' nmarapis soklat-muti'. Faut fua' nee' ji, npaek faut sardius re' anpiin snaa me'e. Faut fua' hiutn ii, anpaek faut ratna cempaka re' anpiin snaa moro-mnatu'. Faut fua' faun ii, anpaek faut beril re' anpiin snaa biur-mamate'. Faut fua' seo' gwi, npaek faut krisolit re' anpiin snaa moro'-moro'. Faut fua' bo' ii, anpaek faut krisopras re' anpiin snaa mamaet mainuki'. Faut fua' bo'es am mees ii, anpaek faut lasuardi re' anpiin snaa biru on re' oe tasi. Ma faut fua' bo'es am nua' ii, anpaek faut kecubung re' anpiin snaa umub. 21 Ma eon ko'u bo'es am nua naan, anmoe' sin na'kon mutiara fua' bo'es am nua. Eon es ate anmoo' je nok mutiara fua' es. Ma kota naan in raan uuf, anmoo' je na'ko mnaut afa' re' nariim on re' ninu.m
22 Mes au 'kius, ka tiit fa uim onen anbi kota naan, natuin Uisneno akuasat anneis-neis, nok 'Bib-kaes Ana' anbin naan piut-piut. Etun mansian ein na'besan an'ani haa Sin. 23 Kota naan amsa' ka nperluu fa manas ma funan he ntana', natuin Uisneno In masan ntana' anbi bare naan. Ma 'Bib-kaes Ana' naan njair on re' pauk apinat.n 24 Atoni' na'ko are' kanan uuf ma pah anbi pah-pinan, of neman ma ntaman neun me'u naan. Uisf ein abitan pah-pinan amsa', neman ma neik sin a'mui'k ein re' ma'tani' anbin bare naan.o 25 Anbi bare naan ka tiit attein fa oras fai. Etun ka nperluu fa he ta'eek eno' he ttaam teu kota. 26 Sin of antaam neikin neun kota naan, are' kanan saa'-saa' re' arekot, ma are' rais hormaat na'kon pah ma 'pen-pene nbi pah-pinan.p 27 Mes tuaf re' ka bole fa he ntaam neu bare naan, es re' amaufiunt ein ok-oke', on re' afuat, amakaket, ma aputa-kriut. Tuaf re' bole ntaam, es re' suma tuaf-tuaf re' in kaann ee matu'i et 'Bib-kaes Ana' naan In surat, re' antui kanaf na'ko tuaf amonit re' natuin Uisneno piut-piut.q