Noe ma roet re' neikin rasi 'honis
22
Rarit ameput na'ko sonaf neno tunan tuaf es nakrira' kau noe jes, re' oe nasai nbi bare naan neik rasi 'honis. Oe naan kniun ii on re' ninu. In nasai npoi na'ko Uisneno nok 'Bib-kaes Ana' Sin a'toko prenat.a 2 Onaim in nasai neu raan uuf ee in atnanan anbi kota naan. Anbi noe naan in bian am bian, anmui' naan hau roet uu' gwes re' neik rasi 'honis. Hau roet naan nafua toon es ate no bo'es am nua. Fuun es ate, nafua no gwes. In noon ee, bisa njair re'u he npairoir are' kanan uuf ma pah anbi pah-pinan.b 3 Mes are' saa'-saa' re' Uisneno antitar napoitan sin ma nfee kasat neu sin, ka tiit sin fa nbin kota naan. Abitan kota naan, suma es re' Uisneno ma 'Bib-kaes Ana' re' antuun Ok ma napreent Ein anbin Sin a'toko prenat, ma Sin aan renu'-aan reka' sin re' na'besan ma na'ruir ein neu Sin.c4 Sin ar-arsin bisa nkius niit Uisneno In human ma In masan. Ma Uisneno In kanan matu'i et sin iirk ein mese'-mese'. 5 Anbi bare naan, ka tiit tain fa oras fai. Onaim Uisneno Iin na, sin ka nperluun fa manas, ai' paku, natuin Uisneno kuun es antana' kota naan. Sin of annaa' nokan aprenat anbi bare naan tar antea nabar-baar.d
Usif Yesus nasoup In rais manba'an
6 Rarit ameput naan natoon kau mnak, “Are' saa'-saa' re' au utoon ko sin re' ia, ro batuur. Are' mansian bisa npirsain saa'-saa' re' au u'uab sin naan. Afi unu', Uisneno npaek In Asmaan ee he natoon In Kabin ma Prenat sin neu In mafefa kniun' ein. Mes oras ia, In npaek In ameput na'ko sonaf neno tunan he natoon neu In aanh ein anmatoom nok are' kanan rasi re' ka 'roo fa ntein ate, ro he njarin.”
7 Rarit Nai' Yesus na'uab am nak, “Mimnau! Ka 'roo fa nteni' te, Au 'uum een. Anbi surat re' ia, antui nain are' saa'-saa' re' he njarin. Are' kanan mansian re' natuin surat ia in tuis ein, sin of es re' an'ua pa'en ma n'ua rekon.”
8 Atui surat re' ia, es re' au, nai' Yohanis kau. Au re' ia, es re' a'neen a'rair, ma 'kius 'iit kuuk rasin re' ia ok-oke'. A'neen a'rair on naan ate, au 'ri'tuu he u'besan a'bi ameput sonaf neno tunan in haen. Fin in es re' nakrira' rasin re' ia ok-oke' neun kau. 9 Mes in nakain kau mnak, “Hoe! Ho kais ammoe' on naan! Ho ro he mu'besan meu Uisneno kuun. Kais mu'besan kau. Fin au re' ia, suma aan renu'-aan reka' on re' ho, ma ho aok-bian sin re' anjarin In mafefa kniun' ein, ma tuaf bian anteni' re' anmoe' natuin saa'-saa' re' matu'i nbin surat ia in nanan.
10 Ho kais mu'nifa' surat re' ia in afan meu tuaf bian. Natuin ka 'roo fa te, saa'-saa' re' matu'i nbin surat ia, ro he njarin.
11 Are' kanan mansian re' anhai'nisib ma n'oemetab,
amkonan sin he sin n'oemetan piut-piut.
Mes are' kanan mansian re' anmonin nok akninu',
sin aar sin ro he nmonin nok akninu' piut.
Are' kanan mansian re' anmaufinun,
amkonan sin he nmaufinun piut.
Mes are' kanan mansian re' anmo'en reko,
sin ro he nmo'en rais reko piut-piut.”e
12 Rarit Nai' Yesus na'uab antein am nak, “Mimnau mirek-reko'! Natuin ka 'roo fa ntein, Au 'uum een. Au of a'baras 'eu tuaf-tuaf, utuin saa'-saa' re' sin nmo'e nrair sin.f
13 Au re' ia,
Alfa ntea Omega.
Au re' ia,
A ntea Z.
Are' kanan saa'-saa' ii na'uun ma na'ba'an nbin Kau,
anmurai na'ko ahunut tar amunit.g
14 Tuaf-tuaf re' ansafen nrair sin paken, an'ua pa'en ma n'ua rekon.
Fin sin of napenin hak he ntaman npe'on eon ko'u neun kota naan in nanan.
Tuaf-tuaf re' anmonin nrarin nok akninu', an'ua pa'en ma n'ua rekon.
Fin sin of napenin mainuan he nbukae hau fua roet re' neiki 'honis abar-barat.h
15 Mes tua sona' ma 'teta', ka bole fa he ntaman neun bare naan.
Re' ka Uisneno Iin na fa, ka bole fa he natuan nbin bare naan.
Sin esan re' tuaf-tuaf re' ka npirsain fa neun Uisneno,i
amakaket, afuat,
amarorot, araut,
ma aputa-kriut.
Sin aar sin re' naan, ka bole fa he ntaman.
Sin aar sin re' naan, maut he sin nbin mone'.
16 Au re' ia, Nai' Yesus Kau. Au 'sonu' Au ameput na'ko sonaf neno tunan he natoon rasin re' ia ok-oke', he hi mnao mitoon Au rais manba'an neu jema'at bare hiut.
Au re' ia, usif nai' Daut in sufan-ka'un.
Au re' ia, Usif re' anaa' aprenat.
Au snaaf ii, meu re'uf,
nahuum on re' Faif Nome.
Au snaaf ii, ma'tain re'uf,
nahuum on re' Faif Nome.”j
17 Uisneno In Asmaan Akninu' naskau mnak, “Atkoen ok teem teu ia, tua!”
Baroit bifee naan no'en am nak, “Atkoen ok teem nai, tua!”
Maut he tuaf-tuaf re' anneen naskau msa' am nak, “Atkoen ok teem nai, tua!”
Maut he tuaf-tuaf re' anmeon oe, nkoen ok neman he nbukaen oe,
Maut he tuaf-tuaf re' anromin he nbukae oe re' neik rasi 'honis,
iim he msium ma mtoup nai, tua!
Tuaf bole nait oe naan,
ruum-ruum ahaa.
Tuaf bole niun oe naan,
ma ka nfee fa roit.k
Nai' Yohanis in rais manbasan amunit
18 Au re' ia, nai' Yohanis kau. Au umnaub tuaf-tuaf ki aar ki re' of amneen ma mrees saa'-saa' re' Uisneno nfei nrair sin neu kau anbi surat re' ia, on nai: karu anmui' tuaf re' nafaof ai' ansaot saa'-saa' antein neu surat re' ia, Uisneno of anhukun ma napein siraak hiut re' In nasanut sin neun pah-pinan naan. 19 Ma karu anmui' tuaf-tuaf re' nabait ma nakuran saa'-saa' na'ko surat re' ia, Uisneno of nait nain in hak, he kais antaam nok anbi kota kninu', ma in kais anbukae hau fua roet re' neik rasi 'honis abar-barat.l
20 Nai' Yesus kuun es re' neikn On anfei ma nakrira' rasin re' ia ok-oke'. In anbasan amsa' am nak, “Ro tebe! Ka 'roo fa gwen ate, Au 'uum een.”
Usi' Yesus, amkoen Om uum nai, tua!
21 Au 'toit he Usif Yesus nakrira' In nekan arekot neu Iin na ok-oke'. Tebes namneo. Amin.
Na'ko au,
Nai' Yohanis kau, tua.