Sin nfutu' kaun naga npaek korenit tar antea toon niufn es
20
Rarit au 'kius 'iit ameput tuaf es ansaun neem na'ko sonaf neno tunan anbi neon gwe tnanan. In nnaa' korenit noon kou' gwes, ma nnaa' 'retu'-'fo'e nuat ha'mu'it re' ka ma'u'u fa. 2 Rarit in nnao nheek kaun naga naan, es re' nitu 'nakaf re' sin nteek ee te nak, “Iblis”. In es re' napoi naan mansian na'kon afi unu'. Onaim ameput naan anfuut kaun naga naan anpaek korenit, he nataam ee neu nuat naan tar antea toon niufn es.a 3 Onaim ameput naan antitar nataam kaun naga naan neu nuat ha'mu'it naan. Rarit in nsegel na'maet nuat naan in enon, he n'o'of ma nbui kaun naga naan, tar antea toon niufn es. Nok ranan naan, kaun naga naan ka bisa fa he nputa-kriu are' kanan uuf ma pah anbin pah-pinan tar antea toon niufn es. Rarit nafetin kaun naga naan, mes suma raab aah.4 Rarit au 'kius 'iit a'toko prenat amfaun ii kah een, ma anmui' tuaf-tuaf antoko nbin sin. Uisneno nasaeb 'piru'-baru he njarin afeek rasi. Sin aar sin re' naan, tuaf-tuaf re' unu' te nasina' ma nanaob rasi anmatoom nok Nai' Yesus In Rais Reko, ma Uisneno In Kabin ma Prenat, tar antea atoni' nroor niis sin. Sin aar sin re' naan, ka na'ruri' ma na'besan fa neu mui' fui apisut naan nok in faut maruna'. Sin es re' ka nromin fa he ntoup mui' fui apisut naan in marak anbi sin iirk ein, ai' sin a'niimk ein. Anroor niis sin, mes Uisneno namonib nafani' sin, he sin nna'an aprenat nabu-buan nok Kristus tar antea toon niufn es.b 5-6 Nok ranan naan, sin njarin tuaf ahunut re' Uisneno namonib nafani' sin na'kon rasi 'maten. Onaim sin re' ia, an'ua-pa'en ma n'ua-rekon, natuin sin njarin Uisneno Iin na. Ka ntitar napoitan ma nporin fa sin anbin baer ha'mu'it, he kais napein ma nnaben niit rasi 'maten no nuan ii. Fin sin re' anjarin a'naak rais pirsait re' antuthae Uisneno ma Kristus. Ma sin anna'an aprenat amsa' nabu-buan nok Kristus tar antea toon niufn es.
Mes amates bian, ro he npaon tar antea toon niufn es, na' Uisneno namonib nafani' sin.
Sin nporin nitu 'nakaf antaam neu tais ai
7 Oras toon niufn es namsoup gwen, Uisneno of anreun he nafetin kaun naga naan anpoi na'ko nuat ha'mu'it. 8 Rarit in nnao nputa-kriu uuf ma pah re' sin nteek ee nak, Gok ma Magok, re' neman na'kon bare-bare nbi pah-pinan. In of na'bua' naan sin too nggwin he nmakenan. Sin amfauk ein, on re' snae nuri et tais je ninin.c 9 Rarit sorarus na'kon Gok ma Magok anbairs ein ma nnaon maat, tar antea pah-pinan anfuun am nateef. Rarit sin ntoko nfuun am nateef Uisneno In kota re' In neek nain je, ma In tuaf ein. Mes Uisneno nasanut ai na'ko neon gwe tnanan, he nout niis soraurs ein naan ok-oke'. 10 Rarit sin nheek naan nitu 'nakaf re' napoi nrair too mfaun ein naan. Nitu 'nakaf naan, es re' Iblis. Onaim sin nporin nataam ee neu tais ai bariri re' anpiin ka nmaet niit fa. In of an'o'of naan on, nok mui' fui apisut ma in mafefa' aputa-kriut naan. Anbi bare naan, sin napenin ha'mu'it fai-manas, tar antea nabar-baar.
Uisneno nafeek are' kanan mansian ii, sin rasin
11 Rarit au 'kius 'iit a'toko prenat muit kou' gwes. Ma Uisneno antuun On anbi 'toko prenat naan. Nok askeken ate, pah-pinan ma neon gwe tnaan ee naen namnekun, tar ka tiit sin fa ntein.
12 Rarit au 'kius 'iit tuaf-tuaf re' anmaten nrarin. Sin ar-arsin ana'-ko'u anhaken ma nbain ein an'anin 'toko prenat naan. Onaim ameput na'ko sonaf neno tunan neem ma nfei suurt ein re' antui mansian ii sin a'moe'k ein ok-oke'. Rarit sin nfei ntein surat bian, es re' surat re' antui tuaf-tuaf re' of he nmoin nok Uisneno tar antea nabar-baar. Onaim In nafeek atoin amaets ein naan sin rasin, natuin saa'-saa' re' sin nmo'en, nahuum on re' matu'i et suurt ein naan.d 13 Rarit are' amaets ein ok-oke', sin aar sin neman ma nbaiseun 'toko prenat naan. Sin aar sin re' naan, re' anmaten nbin auf meto', ai' nbin tasi. Rarit Uisneno nafeek sin rasin mese'-mese', natuin saa'-saa' re' sin nmoe' sin. 14 Rarit Uisneno nporin nain ‘'Maten’ neu tais ai re' npiin nabar-baar naan. In nporin nain ‘Bare neu Amates’ amsa', n'ain tais ai naan amsa'. Tais ai abar-barat naan, es re' bare' 'maten no nuan ii. 15 Tuaf-tuaf re' sin kaank ein ka matu'i fa nbin surat naan amsa', nporin nataam sin neu tais ai abar-barat naan. Fin surat naan, es re' antui tuaf fatuf na'ko tuaf re' anmonin piut-piut nok Uisneno.