'Retu'-'fo'e no hiutn ii — Uisneno In ameupt ein antoup naan to'is hiut
8
Rarit 'Bib-kaes Ana' naan nfei 'retu'-'fo'e no hiutn ii. Nok askeken ate, abitan sonaf neno tunan mninu'-mninu'. Ka tiit tain fa es he na'uab, tar antea oni' menit bo' teun 2 Rarit au 'iit ameput tuaf hiut na'kon sonaf neno tunan re' anhaken piut-piut anbin Uisneno In human ma In matan, re' sin nabarab sin tuak ein he ntuthae Je. Sin aar sin tuaf mese'-mese' antoupun to'is.3 Rarit ameput tuaf es anteni' na'ko sonaf neno tunan annao nhake nbi mei jes in matan. Mei re' ia nati' te sin npaek je he noutun hau oef re' foo meni'. In nnaa' a'pik-noin moro' kbuub es, re' biasa sin npaek je he ntaon hau oef foo meni' naan. Rarit sin nfee ne hau oef foo meni' kou'-ko'u, he in nseor ee nok onen totis na'ko Uisneno Iin na. Rarit in neik a'pika-kbubu' naan, nahuum on re' fua'-turu' re' anfoo mein, ma na'tuun ee nbi mei noin moro' naan, anbi 'toko prenat naan in matan.a 4 Rarit in nout hau oef foo meni' naan. Onaim in foo menin naan ansae neu Uisneno In human ma In matan, ansae nabu-bua nok are' onen totis sin na'kon Uisneno Iin na.
5 Rarit ameput naan nait ai na'ko mei naan, ma antao naheun anbi 'pika-kbuub noni naan. Ma in nporin a'pika-kbubu' naan n'ain pah-pinan. Nok askeken ate, au 'iit rimat, re' nariim a'rii-'ne'u nbi pah-pinan. Rarit anmu'i 'rotos re' na'root ma na'ru'u kou'-ko'u. 'Rotos naan ka nasnaas niit fa. Ma pah ii na'beko'.b
6 Rarit ameput tuaf hiut na'kon sonaf neno tunan naan, sin nabaarb ein he nfuun to'is.
Anfuu to'is ahunut — are' kanan hau ma roet anputun
7 Oras ameput nomer ahunut anfuu in to'is, na'uur on re' eis fatu, ma ai re' masero' nok naa', nat'oop an'ain pah-pinan. Are' kanan huu mate' anputu nmaten et mee-mee. Karu hit tbait pah-pinan batis teun, aputus naan baits es. Karu hit tbait are' kanan hau ma roet ein pah-pinan njair batis teun, apuuts ein naan, baits es.c
Anfuu to'is no nuan ii — Are' kanan amonit anbi tasi anmaten
8 Oras ameput no nuan ii anfuu in to'is, nok askeken anmui' naan baer es nahuum on re' a'toe' kou' gwes anpiin, anpoirn on antaam neu tasi, tar antea baits es na'ko batis teun tasi naan anjair naa'. 9 Rarit baits es na'ko batis teun na'kon are' kanan amonit anbin tasi, nmaten sapu'. Ma batis es na'ko batis teun neu are' kanan abnao oe nbin tasi, namre'un sapu'.
To'is no teun ii — oe ji menu'
10-11 Oras ameput no teun ii anfuu in to'is te, anmui' naan kfuu gwes anmouf na'ko neno, nahuum on re' obor kou' gwes re' anpiin. Kfuu re' naan, kaann ee, ‘Menu'’. Oras in nmoufu te, oe nbi noe ma oe maat ein anjarin menu'. Rarit amniun oe nggwin anmaten amfaun. Karu hit tbatis are' noe ma oe mata' anbi pah-pinan anjair batis tenu te, re' anjair meun ii, baits es.d
To'is no haan ii — manas, funan ma kfuu nameis'okan
12 Rarit ameput no haan ii anfuu in to'is. Nok askeken manas, funan, ma kfuun ein sin napenin beso'. Onaim sin nameis'okan. Nateef oras manas, baits es na'ko batis teun oras manas naan, anjair meis'okan, natuin manas naan ka nasnaa batuur fa ntein. Ma oras fai, baits es na'ko batis teun oras fai naan anjair meis'okan batuur-batuur, natuin funan ma kfuun ein sin ka masnaa' ein fa ntein.e
13 Rarit au u'aiti' au matak ate, au 'iit kor-garuda es natpeen na'rat-raat anbi neno. In na'kaka' ma na'uab am nak, “Ampaant om, oo! Siraak ko'u of antoman are' mansian amonit anbi pah-pinan. Fin anmui' ameput tuaf teun fe' etan sonaf neno tunan, re' ka nfuu sin toi's ein fa fe'.”