Anfuu to'is no niimn ii — are' knamat anha'mui' mansian
9
Rarit ameput no niimn ii anfuu in to'is. Onaim au 'iit kfuu gwes anmoufu n'ain pah-pinan. Sin nfee 'reut es neu kfuu naan he in nasoit eon nuat re' ka nmui' fa tu'uf. Bare naan, naheun nok ha'mu'it ma nana'renat. 2 In nasoit nuat naan in enon, onaim maus metan anpoi on re' nais ji npuut. Masu' naan ansae kbo'es-akbo'es, tar antea neon gwe ma maans ee nameis'ook.a 3 Onaim anmui' knamat mfau-rutu natpenen npoin na'kon masu' naan, ma ansanun an'arin pah-pinan. Uisneno anfeen sin kuasa on re' kbiti.b 4 Mes In naprenat sin he kais an'eet nareu' huun, hau ma roet bian sin. Mes sin ro he nha'mui' mansian ein re' ka nmu'in fa marak Uisneno anbi sin iirk ein.c 5 Uisneno nkonan knaamt ein naan, he nha'mui' tuaf ein naan tar antea funan niim, mes kais na'maet sin. Suma nameenb ahaa sin on re' kbiit ji nrau. 6 Anbi funan niim in nanan re' naan, of mansian ii napenin ha'mu'it ma'tani ntein, tar antea sin ntotin he nmaetn aah. Maski on naan amsa', sin ka nmaten fa.d7 Au 'iit knaamt ein naan nahuum on re' bikase' re' anpaek sin anbin makenat. Sin npaken a'soeb noni mnatu' re' anmoo' je neu a'naak makenat. Sin huumk ein on re' mansian.e 8 Sin a'naak fuun ein amnaun ein on re' bifee. Ma sin niisk ein ma'aik ein on re' singa in nisin.f 9 Nahuum on re' sin npaek baur besi anbi sin a'baask ein, on re' iik' ee in pasun-a'pohon. Sin niink ein na'ru'u ko'u on re' sorarus batalion es sin bikaes ein anheer neik kreet makenat.g 10 Sin iuk ein ma'tain besin ma nmui' raso on re' kbiit ji in raso. Sin napenin kuasa he nha'mui' mansian ein npaek sin raso naan, tar antea funan niim. 11 Usif na'ko knaamt ein naan, es re' usif na'ko ameput re' anriu' napoitan sin na'kon nuat ha'mu'it re' ka nmui' fa uuf. In kaann ee anbi uab Ibrani, Abadon, ma anbi uab Yunani, Apolion. In a'moufn ii nak, “tuaf re' nareu'”.
12 Nok ranan naan, siraak ahunut naan, nkono nrair. Mes ampaant om, oo! Fin anmui' anteni' siraak huma' nua re' he ntaman.
Anfuu to'is no neen ii — rais ha'mu'it huma' teun anbi pah-pinan
13 Rarit ameput no neen ii anfuu in to'is. Au 'iit mei mnatu' naan, re' sin npaek je he noutun hau oef foo meni', re' anbani' n'ain Uisneno. Anmui' hanaf anpoi na'ko mei naan in suunk ein haa sin.h 14 Hanaf naan natoon neu ameput re' fe' anfuu nrair in to'is naan am nak, “Anmui' ameput tuaf haa re' mafutu' a'roo gwen etan noe kou' gwes, kaann ee, noe Efrat. Amnao mufetin sin nai!” 15 Onaim in nnao nafetin sin, he sin nnao nroor na'maet mansian re' nateef nok in neon toon, in funan, in neno, ma in eti-tabu re' Uisneno nafeek anrair sin. Karu hit tbatis mansian ein ok-oke' nbin pah-pinan ia njair batis tenu te, amaets ein naan, baits es. 16 Sin natonan neu kau mnak, ameupt ein sin soraurs ein re' ansaen bikaes makenat naan, tuaf hoto natun nua. 17 Rarit au 'iit soraurs ein nok sin bikaes ein. Soraurs ein naan anpaken baru re' anpafa' naan sin a'baask ein snaaf teun, es re' mee' apinat, biur arimat, ma moro on re' bariri. Bikaes ein naan sin a'naak ein on re' singa in a'nakan. Anmu'i msa' ai ma bariri re' anpuran anpoi na'ko bikaes ein sin feefk ein, 18 he neik rais ha'mu'it huma' teun. Rais ha'mui't ein re' anpoin na'kon bikaes ein sin feefk ein naan, na'maet baits es na'ko batis teun mansian amonit pah-pinan. 19 Rarit bikaes ein naan annaon ma nha'mui' mansian sin, anpaek sin feefk ein ma sin iuk ein. Anbi sin iuk ein naan, anmu'i 'nakaf on re' kaun aan in a'nakan.
20 Mes anmui' mansian anbi pah-pinan ia fe' re' ka na'maet sin fa na'ko siraak ein naan. Maski on naan amsa', mes sin ka nromin fa he nasaitan sin 'moe' maufinun. Sin na'besan neu niutn ee piut-piut, ma na'besan neu baer' ein re' anmoe' sin na'kon mnatu', noin muti', beis me'e, fatu ma hau. Maski baer' ein naan ka bisa nitan fa, ka bisa nnenan fa, ma ka bisa nnaon fa, mes sin na'besan neu sin piut-piut!i 21 Sin ka nromin fa msa' he nasnasab sin sanat-penu bian sin, nahuum on re' na'maet atoni', npaek re'u, nabaak, ma nmakaken nok tuaf re' sin ka moenk ein fa, ai' sin ka feek ein fa.