Uisneno ntao marak neu tuaf nifun nautn es nifun bo' haa mhaa (144.000)
7
Rarit au 'iit Uisneno In ameput tuaf haa na'kon sonaf neno tunan anhaken nbin pah-pinan he ntahan anin. Es anbi pasa' neon-saet, es anbi pasa' neon-teas, es anbi pasa' ponain, ma es anteni' nbi pasa' haa'-nua. Rarit ain ii ka nfuu fa nbi pah meto' ma oe tasi, ma haun gwin.a 2 Uisneno nfee kuasa neu sin he nareu' puru-pah, ma tasi. Rarit au 'iit ameupt es na'ko sonaf neno tunan, neem na'ko pasa' neon-saet. In neik baer mamarak es na'ko Uisneno abar-barat. Onaim in nkoa' am natoon neu tua haa' ein naan am nak, 3 “Kaisa' fe'! Kais mireu' puru-pah, ai' tasi, ai' haun gwin. Ampao he hai mtao marak ambi Uisneno In aan renu'-aan reka' sin iirk ein naan fe'.”b4 Rarit sin natoon neu kau mnak, ameput naan anmarak naan Uisneno Iin na. Tuaf ein naan, sin nifun nautn es nifun bo' haa mhaa (144.000), re' na'kon uuf Isra'el. Sin aar sin esan re':
5 na'ko uuf nai' Yahuda, tuaf nifun bo'es am nua (12.000);
uuf nai' Ruben, tuaf nifun bo'es am nua;
uuf nai' Gat, tuaf nifun bo'es am nua;
6 uuf nai' Aser, tuaf nifun bo'es am nua;
uuf nai' Naftali, tuaf nifun bo'es am nua;
uuf nai' Manase, tuaf nifun bo'es am nua;
7 uuf nai' Simeon, tuaf nifun bo'es am nua;
uuf nai' Lewi, tuaf nifun bo'es am nua;
uuf nai' Isakar, tuaf nifun bo'es am nua;
8 uuf nai' Sebulon, tuaf nifun bo'es am nua;
uuf nai' Yusuf, tuaf nifun bo'es am nua;
uuf nai' Benjamin, tuaf nifun bo'es am nua.
Too neek akninu' sin npures ma nbo'is Uisneno ma 'Bib-kaes Ana'
9 Rarit au 'iit mansian ein amfau-rutun, tar antea ka bisa 'soi' 'ain sin fa barisi. Sin neman na'kon are' pah-pah, uuf-uuf, kanaf-kanaf, ma uab-uab anbin pah-pinan. Sin aar sin nabuan ma nbaisenun neun a'toko prenat ma 'Bib-kaes Ana' naan. Sin npaken baur muti mnanu' ma anna'an hau noo peta. 10 Rarit sin npures ma nbo'is bu'-bua' am nak,
“Hai mpures ma mbo'is hai Uisneno,
re' antuun On anbi 'toko prenat ia.
Hai maikas mi'ratan na'rat-raat 'Bib-kaes Ana' ia msa'!
Sin re' ia, esan re' ansoi nafetin kit, ma nfee kit saok sanat ma 'honis.
Sin re' ia, esan re' anrapin ma nfein raan a'honis neu kit.”
11 Na'uab ein anrarin on naan ate, Uisneno In ameput na'ko sonaf neno tunan re' nhaken nfuun naan 'toko prenat naan, nri'tuun ma na'ruir ein antean afu, ma nbaisenu 'toko prenat naan. Amnasit bo' nua mhaa re' anbin naan, ma mui' ma'tain haa' ein naan amsa', nmo'en on naan. Sin aar sin na'ruir ein ma na'besan neun Uisneno, 12 ma sin nsiin am nak,
“Tebes namneo, tua!
Hai mpures ma mbo'is Uisneno msa'!
Hai maikas ma mi'ratan Uisneno In kanan amsa'!
Uisneno In ronen ma tenab, ro ka nsaan niit fa.
Uisneno In kuasan, ro kou' besi.
Uisneno In ma'tanin, ro ma'tain besi.
Hai mtoit makasi meu Uisneno piut-piut.
Hai mfee hormaat meu Uisneno ka natfeek niit fa.
Tebes namneo, tua!”
13 Sin npures ma nbo'is anrarin on naan ate, tuaf es na'ko amnasit bo' nua mhaa naan nataan kau mnak, “Too mfaun ein re' anpaken baur muit ein ia, ho muhiin sin ii, oo? Sin aar sin re' ia, na'kon mee?”
14 Mes au utaah am 'ak, “Kaah fa, tua. Au ka uhiin sin fa, tua. Ho es muhiin sin, tua.”
Onaim in natoon kau mnak, “Sin re' naan, tuaf-tuaf re' napenin fetin na'ko suust am nana'renat ko'u.
Sin re' naan, tuaf-tuaf re' anpake nrair 'Bib-kaes Ana' naan In naa',
he nboe ma nsaef sin paken,
ma nakninu' sin barun.c
15 Natuin rasi naan, sin nhaken anbin Uisneno In a'toko prenat.
Sin ntuthae Je fai-manas anbi In Uim Onen.
Uisneno nok sin piut-piut.
Uisneno npafa' ma npanat sin piut-piut.
16 Sin of ka nnaben niit fa rais amnahas antein.
Sin of ka nnaben niit fa rais meon oe ntein.
Sin of ka nnaben niit fa maans ee in maputun antein.
Sin pausk ein of ka npoot ein fa ntein.d
17 'Bib-kaes Ana' re' anpaumaak nok a'toko prenat naan,
In of es re' njair sin atukus.
In of es re' napoo' neik sin,
ma na'inu' sin anbin oe mata' re' neiki 'honis.
Uisneno of es annoes nain sin susat,
henati' sin kais ankaen ntenin.”e